Pfuna Vahuweleri Lavantshwa Leswaku Va Tiyiselela Nkaneto
1 Loko vanhu va sungula ku dyondza Bibele naswona va ‘navela ku hanya hi ku tinyiketela loku nga ni vukwembu,’ Sathana u ringeta hi matimba ku lwisana na vona. (2 Tim. 3:12) Va nga ha kanetiwa hi vatirhi-kulobye, vadyondzi-kulobye kumbe vaakelani. Timhaka ti nga nyanya ku biha loko vahuweleri lavantshwa va kanetiwa ni hi maxaka ya vona ya le kusuhi.—Mat. 10:21; Mar. 3:21.
2 Swi Profetiwile Leswaku Nkaneto Wu Ta Va Kona: Vahuweleri lavantshwa va fanele va swi tiva leswaku va ta xanisiwa nileswaku sweswo swi kombisa leswaku hakunene i vadyondzisiwa va Kreste. (Yoh. 15:20) Minkarhi yin’wana vahuweleri va nga ha kanetiwa hikwalaho ka leswi vanhu va vulavulaka mavunwa hi hina Timbhoni ta Yehovha. Tsundzuka leswaku hi fanele hi tsaka loko vanhu va hi sandza hikwalaho ka leswi hi nga valandzeri va Yesu naswona hi yingisaka Xikwembu. (Mint. 5:27-29, 40, 41) Tiyisekisa vahuweleri lavantshwa leswaku Yehovha u ta va seketela hi rirhandzu. (Ps. 27:10; Mar. 10:29, 30) Loko va tshama va tshembekile va ta va kombisa leswaku va yima na Yena emhakeni ya ku lweriwa ka vuhosi byakwe evuakweni hinkwabyo.—Swiv. 27:11.
3 Ndlela Leyi Vutlhari Lebyi Kongomeke Byi Pfunaka Ha Yona: Eka swichudeni swa wena swa Bibele, kandziyisa mhaka ya leswaku i swa nkoka leswaku swi hambeta swi nghenisa vutivi lebyi kongomeke ku nga khathariseki miringo leyi swi nga ha vaka swi langutane na yona. Sathana u tirhisa nkaneto leswaku a ringeta ku sivela leswi swi swi dyondzaka leswaku swi nga dzimi timitsu etimbilwini ta swona to fanekisela. (Swiv. 4:23; Luka 8:13) Swichudeni swa Bibele swi fanele swi hambeta swi nghenisa vutivi lebyi kongomeke bya Rito ra Xikwembu leswaku ripfumelo ra swona ri dzima timitsu.—Ps. 1:2, 3; Kol. 2:6, 7.
4 Va Fanele Va Tiyisela: Ku tiyisela xiyimo xihi ni xihi lexi tikaka i swa nkoka naswona swi nga tswala mihandzu leyinene. (Luka 21:16-19) Loko vahuweleri lavantshwa va tiyiselela ku kanetiwa, ku vuyeriwa vona vini swin’we ni van’wana. Va vona ndlela leyi Yehovha a va katekisaka ha yona vanhu lava tiyiselaka hi ku tshembeka.—Yak. 1:12.
5 Muapostola Pawulo a a tsakile loko a vona Vakreste va le Tesalonika va ya emahlweni va tiyisa vuxaka bya vona na Yehovha. Hambileswi vo tala va vona a ku ri lava a nga va pfuna leswaku va kuma ntiyiso, u nkhense Xikwembu hikwalaho ka leswi a va swi endla. (2 Tes. 1:3-5) Na hina hi nga kuma ntsako ni ku eneriseka hi ndlela yoleyo loko hi pfuna swichudeni swa hina swa Bibele leswaku swi tiyiselela nkaneto.