Ku Chumayela Swi Tiyisa Vuxaka Bya Hina Na Yehovha
1. Hi vuyeriwa njhani hi ku endla ntirho wo chumayela?
1 Ku tshama hi khomekile hi ntirho wo chumayela swi tiyisa vuxaka bya hina na Yehovha naswona swi endla leswaku hi tshama hi tsakile. Hi tshama hi khomekile hi ntirho wo chumayela hikwalaho ka leswi hi lavaka ku tsakisa Yehovha. Loko hi yingisa xileriso xa ku “chumayela rito,” Yehovha wa hi katekisa naswona hi vuyeriwa hi tindlela to tala. (2 Tim. 4:2; Esa. 48:17, 18) Xana ntirho wo chumayela wu hi tiyisa njhani naswona wu hi pfuna njhani leswaku hi tshama hi tsakile?
2. Xana ntirho wo chumayela wu hi tiyisa hi tindlela tihi?
2 Ha Tiyisiwa Ni Ku Katekisiwa: Ku chumayela ku hi pfuna leswaku hi tshama hi langutele mikateko ya Mfumo ku nga khathariseki swiphiqo leswi hi langutanaka na swona sweswi. (2 Kor. 4:18) Ku hlamusela van’wana tidyondzo ta Bibele swi endla leswaku hi ya hi swi tshemba swinene switshembiso swa Yehovha naswona swi hi pfuna leswaku hi ya hi wu tlangela swinene ntiyiso. (Esa. 65:13, 14) Loko hi pfuna vanhu van’wana leswaku va va ni vuxaka lebyinene na Yehovha naswona va nga vi “xiphemu xa misava,” sweswo swi hi pfuna leswaku na hina hi ya hi tihambanisa ni misava.—Yoh. 17:14, 16; Rhom. 12:2.
3. Ntirho wa hina wo chumayela wu hi pfuna njhani leswaku hi hlakulela timfanelo ta Vukreste?
3 Ku hlanganyela entirhweni wo chumayela swi hi pfuna leswaku hi hlakulela timfanelo ta Vukreste. Hi xikombiso, ku lwela ku va “swilo hinkwaswo eka vanhu va mixaka hinkwayo” swi hi pfuna leswaku hi ya hi titsongahata swinene. (1 Kor. 9:19-23) Loko hi vulavula ni vanhu lava ‘vavisekeke ni ku tsalangana ku fana ni tinyimpfu leti nga riki na murisi’ hi dyondza ku va ni ntwela-vusiwana. (Mat. 9:36) Loko hi xanisiwa hi dyondza ku tiyisela, naswona hi tshama hi tsakile loko hi tinyiketela ku pfuna van’wana.—Mint. 20:35.
4. U titwa njhani hi ntirho wo chumayela?
4 Hakunene i nkateko lowukulu ku hlanganyela entirhweni wo chumayela lowu yisaka ku dzuneka eka Yehovha Xikwembu lexi ku nga xona ntsena lexi hi faneleke hi xi gandzela! Ntirho wo chumayela wa hi tiyisa. Un’wana ni un’wana wa hina u kuma mikateko yo tala loko a hisekela ku ‘chumayela mahungu lamanene hi rixaladza.’—Mint. 20:24.