Bokisi Ra Swivutiso

◼ Xana swi fanerile leswaku mavandlha kumbe vahuweleri va tirhisa mimfungho ya mavandla ya le nawini lama tirhisiwaka hi Timbhoni ta Yehovha?

Vito kumbe mfungho wa nchumu wo karhi wu endleriwa leswaku munhu a kota ku tiva vini va wona hi ku hatlisa. Mfungho lowu nge Watch Tower wu yimela Watch Tower Bible and Tract Society of Pennsylvania swin’we ni mavandla lama tirhisiwaka hi nhlengeletano. Vandlha ra Vakreste ra Timbhoni ta Yehovha ri tirhisa mfungho wa Bibele leyi pfulekeke lowu tsariwaka ehenhla ka papila. Kambe mavandla man’wana lama tirhisiwaka hi Timbhoni ta Yehovha ma ni mimfungho yin’wana yo hambana.

Mavandlha kumbe vahuweleri a va fanelanga va tirhisa mfungho kumbe mavito ya mavandla ya le nawini lama tirhisiwaka hi nhlengeletano kumbe lama yelanaka na wona, ku nga va eHolweni ya Mfumo, etibodweni leti kombaka laha Holo ya Mfumo yi nga kona, ehenhla ka mapapila, eka swilo swa vona vini ni le ka swilo swin’wana. Ku tirhisa mimfungho yoleyo swi nga endla leswaku vatirhela-mfumo, vahuweleri swin’we ni vanhu van’wana va nga ku voni ku hambana eka ndlela leyi mavandla ya le nawini ya nhlengeletano ni vandlha hi roxe swi tirhaka ha yona. Hi hala tlhelo, leswi swi nga endla leswaku swi nga olovi ku vona leswaku mapapila lama rhumeriwaka ma huma eyindlu-nkulu ya misava hinkwayo kumbe ku suka emarhavini ma huma kwihi.

Mfungho lowu wa Watch Tower kumbe wun’wana lowu fambisanaka na wona, a wu fanelanga wu tirhisiwa loko ku akiwa Tiholo ta Mfumo hambiloko Holo yoleyo yi tsarisiwe hi vito ra Watch Tower. Mavandlha lama nga ni mfungho lowu eTiholweni ta wona ta Mfumo a swi bohi leswaku ma hatla ma wu susa, tanihi leswi ku wu susa swi nga va koxaka timali swin’we ni nkarhi wa vona. Hambiswiritano, loko ku ri leswaku ku wu susa swi ta olova naswona a swi nge dyi nkarhi ni timali, vandlha ri nga wu susa. Kambe loko ku ri leswaku a swi olovi, ku nga ha endliwa malunghiselelo ya leswaku wu susiwa loko ku lunghisiwa Holo.