Dyondzisa Hi Ndlela Yo Olova
1. Hi wihi nchumu wa nkoka lowu nga ta hi pfuna leswaku hi dyondzisa hi ndlela yo olova ni leyi twisisekaka?
1 Ku dyondzisa hi ndlela yo olova i swa nkoka ngopfu-ngopfu loko u lava leswaku vanhu va kuma mongo wa leswi u swi dyondzisaka. Ku kambisisa ndlela leyi Yesu, Mudyondzisi Lonkulu a a dyondzisa ha yona swi ta hi pfuna leswaku hi antswisa ‘vutshila bya hina byo dyondzisa.’—2 Tim. 4:2; Yoh. 13:13.
2. I yini leswi katsekaka emhakeni yo dyondzisa hi ndlela yo olova naswona ku endla tano swi nga va ni vuyelo byihi?
2 Vulavula Hi Ndlela Yo Olova: A ku na dyondzo yin’wana leyi nga tshama yi hlamuseriwa hi ndlela yo olova ni leyi twisisekaka ku fana ni Dyondzo ya Yesu ya le Ntshaveni. (Mat., tindz. 5-7) Mintshungu leyi a yi yingisele Yesu yi ‘hlamarisiwe hi ndlela yakwe yo dyondzisa.’ Tindhuna leti a ti rhumiwe ku ya n’wi khoma ti khumbiwe hi leswi a a swi dyondzisa kutani ti ku: “Ku hava munhu un’wana la tshameke a vulavula hi ndlela leyi.” (Mat. 7:28, 29; Yoh. 7:46) Leswaku hi khorwisa vanhu hi ntiyiso wa Rito ra Xikwembu, a swi kali swi lava hi tirhisa marito yo tika, swiga leswi rharhanganeke kumbe hi hlamusela vuxokoxoko byo tala loko hi endla swifaniso. Hi nga swi kota ku hlamusela ntiyiso hi ndlela leyi twisiseka hi ku tirhisa marito lama tolovelekeke.
3. Ha yini vanhu van’wana va dyondzisa vayingiseri va vona rungula ro tala hi nkarhi wun’we, naswona leswi swi nga papalatiwa njhani?
3 Mi Nga Dyondzi Rungula Ro Tala: Loko Yesu a dyondzisa a a anakanyela vayingiseri vakwe naswona a nga va dyondzisi rungula ro tala hi nkarhi wun’we. (Yoh. 16:12) Hi fanele hi va ni vuxiyaxiya naswona hi pfumelelana ni swiyimo ngopfu-ngopfu loko hi chumayela maxaka, lava ha sungulaka ku tsakela kumbe vana. A hi fanelanga hi va dyondzisa rungula ro tala hambiloko va tikomba va ha rhiye ndleve. Vanhu va timbilu letinene va ta hambeta va nghenisa vutivi hi Xikwembu xa ntiyiso ku nga Yehovha.—Yoh. 17:3; 1 Kor. 3:6.
4. Ha yini swi ri swa nkoka ku kandziyisa tinhla-nkulu ematshan’weni yo hlamusela vuxokoxoko byo tala?
4 Kandziyisa Tinhla-Nkulu: Loko Yesu a dyondzisa, rungula rakwe a ri nga rharhangananga hikuva a nga hlamuseli vuxokoxoko byo tala. Loko a ku: “Hinkwavo lava nga eka masirha-bako ya xitsundzuxo va ta . . . huma,” a ku nga ri nkarhi wa leswaku a hlamusela swo tala malunghana ni vanhu volavo lava nga ta pfuxiwa. (Yoh. 5:28, 29) Loko hi fambisa tidyondzo ta Bibele hi fanele hi kandziyisa tinhla-nkulu naswona hi papalata mukhuva wa ku nghenisa rungula leri nga riki kona eka leswi ku dyondziwaka ha swona.
5. Hi yihi mikateko leyi hi nga ta yi kuma loko hi dyondzisa hi ndlela yo olova?
5 Ha tsaka leswi Yehovha a hi dyondzisaka hi ndlela yo olova eka hinkwaswo leswi hi faneleke hi swi tiva! (Mat. 11:25) Onge hi nga tiyimisela ku dyondzisa hi ndlela yo olova leswaku hi ta tsaka loko hi vona vanhu lava hi va dyondzisaka va kuma mongo wa leswi hi va dyondzisaka swona.