Swiringanyeto Swinharhu Swo Antswisa Ndlela Leyi U Dyondzisaka Ha Yona
1. Ha yini hi fanele hi lwela ku antswisa ndlela leyi hi dyondzisaka ha yona?
1 Vahuweleri hinkwavo i vadyondzisi. Ku nga khathariseki leswaku hi le ka riendzo ro sungula, hi endla riendzo ro vuyela kumbe hi dyondza na munhu Bibele, hi dyondzisa vanhu rungula. Naswona rungula leri hi va dyondzisaka rona ri hlawuleke ngopfu. Hi byela vanhu “matsalwa yo kwetsima” lama nga ta endla leswaku va ‘tlhariha leswaku va ta pona.’ (2 Tim. 3:15) Mawaku lunghelo ro hlawuleka swonghasi! Hi leswi swiringanyeto swinharhu swo antswisa ndlela leyi hi dyondzisaka ha yona.
2. Hi nga dyondzisa njhani hi ndlela yo olova?
2 Ndlela Yo Olova: Loko mhaka yo karhi hi yi tiva kahle, hi nga ha rivala leswaku swi nga endleka vanhu van’wana yi va tikela. Xisweswo, loko u fambisa dyondzo ya Bibele u nga byeli munhu vuxokoxoko byo tala lebyi nga fanelangiki. Ematshan’weni ya sweswo, kandziyisa tinhla ta nkoka. Ku vulavula ngopfu a swi vuli swona leswaku u le ku dyondziseni. (Swiv. 10:19) I swa nkoka ku hlaya matsalwa lama seketelaka mhaka leyi mi bulaka ha yona. Endzhaku ko hlaya tsalwa, dzika eka yinhla leyi fambisanaka ni mhaka leyi mi bulaka ha yona. Dyondzo ya le Ntshaveni leyi rhekhodiweke eka Matewu ndzima 5 ku ya eka 7, yi na dyondzo ya nkoka swinene leyi nga ntiyiso hikuva Yesu a a dyondzisa hi ndlela yo olova naswona a a nga tati marito.
3. Hi wihi nkoka wo tirhisa swifaniso, naswona hi swihi swifaniso leswi hakanyingi swi nga swinene?
3 Swikombiso: Swikombiso swi vuyisa mianakanyo, swi endla leswaku munhu a tsakela naswona swi endla leswaku mhaka ya kona yi nga rivaleki hi ku olova. A swi vuli swona leswaku u fanele u kota ku rungula switori leswaku u ta kota ku nyika swikombiso leswinene. Hakanyingi Yesu a a tirhisa swikombiso swo koma, leswi nga rharhanganangiki. (Mat. 7:3-5; 18:2-4) Swifaniso swo olova leswi mpfampfarhutiweke ephepheni swi nga pfuna. Ku lunghiselela kahle swi nga ku pfuna leswaku u anakanya hi swikombiso leswi u nga swi tirhisaka.
4. Hi nga swi tirhisa njhani swivutiso hi ndlela leyinene?
4 Swivutiso: Swivutiso swi endla leswaku xichudeni xa wena xi anakanya. Hikwalaho, lehisa mbilu endzhaku ko vutisa xivutiso. Loko u hatlisela ku byela xichudeni xa wena nhlamulo, a wu nge swi tivi loko xi swi twisisa kahle leswi mi swi dyondzaka. Loko nhlamulo leyi xi yi nyikaka yi nga ri yona, swi nga va swinene ku xi vutisa swivutiso leswi engetelekeke ematshan’weni yo xi lulamisa. (Mat. 17:24-27) I ntiyiso leswaku hinkwerhu hi vadyondzisi lava nga hetisekangiki. Ku endla tano swi ta tisa mikateko eka hina swin’we ni le ka lava hi va dyondzisaka.—1 Tim. 4:16.