Ku Langutana Ni Ntlhontlho Wo Chumayela Vavanuna
1. Hi xihi xilaveko xa xihatla lexi nga kona entirhweni wa Mfumo?
1 Leswi ntirho wa Mfumo wu yaka wu andza emasikwini lawa yo hetelela, ku ni xilaveko xa xihatla xa vavanuna lava fanelekaka leswaku va ta rhangela entirhweni lowu. (Mar. 4:30-32; Mint. 20:28; 1 Tim. 3:1-13) Kambe etindhawini tin’wana vavasati hi vona va amukelaka rungula ra Mfumo ku tlula vavanuna. Eka mindhavuko yin’wana, vavanuna va ehleketa leswaku i vavasati lava faneleke va landzelela timhaka ta vukhongeri ni ku dyondzisa vana va vona. Hi nga va pfuna njhani vavanuna leswaku va khathala hi xilaveko xa vona xa moya kutani va amukela vugandzeri bya ntiyiso?
2. Matshalatshala ya Pawulo na Petro yo chumayela vavanuna ma ve ni vuyelo byihi?
2 Ku Chumayela Vavanuna: Loko nhloko ya ndyangu yi amukela ntiyiso, swa olova leswaku yi pfuna swirho leswin’wana swa ndyangu leswaku swi amukela vugandzeri lebyi tengeke. Hi xikombiso, loko Pawulo na Silasi va ri ekhotsweni hikwalaho ko chumayela, va chumayele mulanguteri wa khotso. Eku heteleleni, mulanguteri wa khotso ni ndyangu wakwe hinkwawo va khuvuriwile. (Mint. 16:25-34) Loko Pawulo a chumayela eKorinto, “Krispo ndhuna leyi ungamelaka sinagoga u ve mupfumeri eHosini, ni ndyangu wakwe hinkwawo wu endlise sweswo.” (Mint. 18:8) Yehovha u tirhise Petro leswaku a chumayela Korneliyo ndhuna ya vuthu leyi hlamuseriwaka tanihi “wanuna la tinyiketeleke, la chavaka Xikwembu.” Korneliyo swin’we ni maxaka yakwe ni vanghana vakwe lavakulu va khuvuriwile.—Mint. 10:1-48.
3. Hi ku tekelela Filipi, i mani loyi a nga ‘exiyin’weni lexi tlakukeke’ loyi u nga n’wi chumayelaka?
3 Ku chumayela vavanuna lava nga “eswiyin’weni leswi tlakukeke” swi nga ha va ni vuyelo lebyinene. (1 Tim. 2:1, 2) Hi xikombiso, ntsumi ya Yehovha yi byele Filipi leswaku a ya vulavula ni “wanuna la lawulaka” loyi a langutela xuma xa hosi ya xisati ya Vaetiyopiya. Filipi u twe wanuna loyi “a hlayela ehenhla marito ya muprofeta Esaya” kutani a n’wi byela mahungu lamanene hi Yesu. Wanuna loyi wa Muetiyopiya u ve mudyondzisiwa naswona u chumayele mahungu lamanene loko a ri endleleni yo ya etikweni ra rikwavo. Swi nga ha endleka leswaku u chumayele hosi ya xisati ni van’wana lava a va tirha eka yona. Vanhu lava wanuna loyi a nga va chumayela swi nga ha endleka leswaku a swi nga ta olova leswaku va twa mahungu lamanene.—Mint. 8:26-39.
4. I yini leswi hi nga swi endlaka leswaku hi pfuna vavanuna vo tala va twa mahungu lamanene?
4 Ndlela Yo Chumayela Vavanuna Vo Tala: Leswi vavanuna va tshamaka va ri emintirhweni siku hinkwaro, xana u nga hlela xiyimiso xa wena leswaku u heta nkarhi wo tala u ri ensin’wini nimadyambu, hi mahelo-vhiki kumbe hi tiholideyi? Ku heta nkarhi wo tala u tirha nsimu etindhawini ta mabindzu swi nga ku pfuna leswaku u chumayela vavanuna lava swi nga oloviki ku va kuma emakaya. Vamakwerhu va xinuna va nga endla matshalatshala yo chumayela vatirhi-kulorhi va xinuna hi xitshuketa. Loko ku chumayeriwa hi yindlu ni yindlu, ngopfu-ngopfu ensin’wini leyi tirhiwaka nkarhi na nkarhi, vamakwerhu va xinuna minkarhi yin’wana va nga kombela ku vulavula ni nhloko ya ndyangu loko va nghena emutini.
5. I yini leswi makwerhu wa xisati a faneleke a swi endla loko a kuma wanuna la kombiseke ku tsakela rungula ra Mfumo?
5 Loko makwerhu wa xisati a kuma wanuna la kombiseke ku tsakela, a nga fanelanga a tlhelela a ri swakwe. A nga famba ni nuna wakwe kumbe muhuweleri un’wana. Loko wanuna yoloye a ya a kombisa ku tsakela, swi nga va swinene leswaku dyondzo yoleyo a yi nyika makwerhu wa xinuna la fanelekaka.
6. Hi nga n’wi tekelela njhani muapostola Pawulo leswaku hi ta “kuma vanhu vo tala”?
6 Hlawula Tinhloko-mhaka Leti Khumbaka Vavanuna: Muapostola Pawulo a a khathala hi vayingiseri vakwe naswona a cinca-cinca xingheniso xakwe leswaku a “kuma vanhu vo tala.” (1 Kor. 9:19-23) Hilaha ku fanaka, hi fanele hi hlawula tinhloko-mhaka leti nga ta khumba vavanuna lava hi nga ta va kuma naswona hi ti lunghiselela kahle. Hi xikombiso, vavanuna va karhateka ngopfu hi swiphiqo swa ikhonomi, hulumendhe leyi nga ta fuma vanhu hi ndlela leyinene, vuhlayiseki ni nsirhelelo wa mindyangu ya vona. Va nga swi tsakela swinene ni ku tiva hi xikongomelo xa vutomi, vumundzuku malunghana ni misava ni leswaku ha yini Xikwembu xi pfumelela ku xaniseka. Swingheniso swa hina malunghana ni rungula ra Mfumo swi nga va ni vuyelo lebyinene loko hi bula hi timhaka to tanihi leti nga hlamuseriwa laha henhla.—Swiv. 16:23.
7. Xana vandlha hinkwaro ri nga yi pfuna njhani nhloko ya ndyangu leyi nga riki Mbhoni kambe yi vaka kona eminhlanganweni ya hina?
7 Ku Pfuna Vavanuna Lava Nga Ni Vavasati Lava Nga Timbhoni: Hambileswi minkarhi yo tala mahanyelo ya vamakwerhu va xisati lava nga Timbhoni ma pfunaka vavanuna va vona lava nga riki Timbhoni leswaku va vona ntiyiso, swirho swa vandlha na swona swi nga hoxa xandla. (1 Pet. 3:1-4) Loko makwerhu wa xisati a ta ni munghana wakwe wa vukati la nga riki Mbhoni eminhlanganweni kutani vandlha ri n’wi amukela hi mandla mambirhi, sweswo swi nga n’wi pfuna leswaku a amukela ntiyiso. Ku ta ka yena eminhlanganweni swi kombisa leswaku wa swi lava ku tiva ntiyiso naswona swi nga ha endleka leswaku a amukela dyondzo ya Bibele.
8. Vamakwerhu va xinuna va nga va pfuna njhani vavanuna lava nga ni vavasati lava nga Timbhoni kambe u kuma leswaku vavanuna va kona a va ti tsakeli ngopfu timhaka ta Bibele?
8 Minkarhi yin’wana u kuma leswaku vavanuna lava nga teka vavasati lava nga Timbhoni eku sunguleni a va nga titsakeli ngopfu timhaka ta Bibele, kambe hi ku famba ka nkarhi va nga cinca kutani va tsakela ku bula hi timhaka ta Bibele ni makwerhu un’wana loyi va titwaka va ntshunxekile loko va ri na yena. Vamakwerhu va le vandlheni rin’wana a va tivekele pakani ya leswaku loko va endzela endyangwini lowu nhloko ya muti wa kona yi nga riki Mbhoni va burisana na yona hi swilo leswi va swi tivaka leswaku ya swi tsakela. Eku heteleleni leswi swi endle leswaku va bula hi timhaka ta le Bibeleni naswona sweswi se yi khuvuriwile. Makwerhu un’wana na yena u tinyike nkarhi leswaku a ya pfuna wanuna la nga ni nsati la nga Mbhoni ku vamba darata ekaya rakwe. Leswi makwerhu loyi a nga swi endla swi endle leswaku va sungula dyondzo ya Bibele ni wanuna yoloye. (Gal. 6:10; Filp. 2:4) Loko u ri makwerhu wa xinuna la nga Mukreste, ha yini u nga tivekeli pakani ya leswaku u tihlanganisa ni un’wana wa vavanuna lava nga teka vavasati lava nga Timbhoni?
9. Ku letela vavanuna lava nga Vakreste swi nga va ni vuyelo byihi?
9 Va Leteleni Leswaku Va Ta Va Ni Vutihlamuleri Hi Ku Famba Ka Nkarhi: Loko vavanuna va amukela rungula ra Mfumo kutani va va ni vutihlamuleri entirhweni wa Yehovha, va nga tikuma se va ri “tinyiko [leti nga] vanhu” kumbe vakulu lava nga Vakreste lava tirhisaka vuswikoti ni matimba ya vona leswaku va pfuna mavandlha lama nga lo mphaa, hi vanhu va Yehovha. (Efe. 4:8; Ps. 68:18) Vavanuna volavo va risa vandlha hi ku swi rhandza ni hi mapfundza. (1 Pet. 5:2, 3) Hakunene vavanuna lava i nkateko eka vandlha hinkwaro!
10. Matshalatshala ya Ananiya yo pfuna Pawulo ma ve ni vuyelo byihi?
10 Hi xikombiso, Sawulo u ve “muapostola eka matiko” hambileswi eku sunguleni a a ri muxanisi wa Vakreste. (Rhom. 11:13) Eku sunguleni, mudyondzisiwa Ananiya a a kanakana ku ya chumayela Sawulo hikwalaho ka leswi Sawulo a ri ni mahanyelo yo biha. Nilokoswiritano, Ananiya u landzele nkongomiso wa Hosi kutani a chumayela wanuna loyi eku heteleleni a nga va muapostola Pawulo. Hi ku famba nkarhi, ku chumayela ka Pawulo swi pfune magidi ya vanhu lava nga n’wi twa loko a chumayela, naswona ku ni timiliyoni ta vanhu leti ta ha yaka emahlweni ti vuyeriwa emapapileni yakwe lama huhuteriweke, lama nga eRitweni ra Xikwembu.—Mint. 9:3-19; 2 Tim. 3:16, 17.
11. Ha yini hi fanele hi endla hinkwaswo leswi hi nga swi kotaka leswaku hi chumayela vavanuna?
11 Onge hi nga endla hinkwaswo leswi hi nga swi kotaka leswaku hi langutana ni ntlhontlho wo chumayela vavanuna. Ha tiyiseka leswaku Yehovha u ta ma katekisa matshalatshala ya hina yo endla ku rhandza kakwe ni ku khathalela timhaka ta Mfumo.