U Nga N’wi Pfuna Njhani Munghana Wa Vukati La Nga Riki Mbhoni?
1. Ha yini Vakreste lava nga ni vanghana va vukati lava nga riki Timbhoni, ku nga ri vona ntsena lava lavaka ku pfuna vanghana va vona va vukati leswaku va amukela ntiyiso?
1 Xana ku ni vahuweleri vo karhi evandlheni ra n’wina lava nga ni vanghana va vukati lava nga riki Timbhoni? Loko swi ri tano, a swi kanakanisi leswaku vahuweleri lava va lava leswaku vanghana va vona va hlanganyela na vona evugandzerini bya ntiyiso. Kambe a hi vona ntsena lava lavaka sweswo. Ku fana ni Xikwembu, vandlha hinkwaro ri navela leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Hi nga va pfuna njhani vanhu lava nga riki Timbhoni lava tekaneke ni vahuweleri evandlheni?
2. Xana loko hi ri ni ku twisisa hi nga n’wi pfuna njhani munghana wa vukati loyi a nga riki Mbhoni?
2 Xo sungula, hi fanele hi ringeta ku languta swilo hilaha a swi langutaka hakona loyi a nga riki Mbhoni. Vanghana va vukati vo tala lava nga riki Timbhoni va yi rhandza mindyangu ya vona naswona va ringeta ku khomisana ni vatekani va vona ni ku va vatswari lavanene kambe swi nga endleka va rhandza vukhongeri byo karhi lebyi hambaneke ni bya hina. Swi nga ha endleka a swi talanga leswi va swi tivaka hi Timbhoni ta Yehovha handle ka leswi va byeriweke swona hi vanhu lava ti vengaka. Van’wana va vilela hi leswi vanghana va vona va hetaka nkarhi wo tala eka swilo swa moya ematshan’weni yo va swin’we ni ndyangu. Ku twisisa swi nga hi pfuna leswaku hi n’wi khoma hi musa ni xichavo naswona hi papalata ku nga ntshunxeki loko hi ri na yena.—Swiv. 16:20-23.
3. I yihi ndlela yo antswa swinene leyi hi nga yi tirhisaka leswaku hi hundzula munghana wa vukati la nga riki Mbhoni?
3 Kombisa Nkhathalelo: Ndlela leyi hi tikhomaka ha yona i ndlela yo antswa swinene ya ku va hi hundzula munghana wa vukati handle ko bula na yena hi Bibele. (1 Pet. 3:1, 2) Nchumu wa nkoka emhakeni leyi i ku kombisa nkhathalelo. Vamakwerhu va xisati evandlheni va fanele va kombisa nkhathalelo eka nsati loyi a nga riki Mbhoni naswona vamakwerhu va xinuna na vona va fanele va kombisa nkhathalelo eka nuna loyi a nga riki Mbhoni. Njhani?
4. Hi nga wu kombisa njhani nkhathalelo?
4 Loko mi nga tivani ni nuna kumbe nsati wa makwerhu yoloye, kumbexana u nga ya titivisa eka yena endzhaku ko kombela mpfumelelo eka nuna kumbe nsati wakwe la nga Mukreste. U nga khunguvanyeki loko munhu yoloye a nga kombisi ku tsakela. Moya wa hina wa rirhandzu ni nkhathalelo swi nga endla leswaku a rhandza Timbhoni ta Yehovha. (Rhom. 12:20) Vakreste van’wana lava wupfeke hi tlhelo ra moya va rhambe loyi a nga riki Mbhoni ni ndyangu wa yena leswaku va ta dya swin’we na vona, va ri ni xikongomelo xa leswaku va tivana ku antswa naswona va herisa xihlawuhlawu xin’wana ni xin’wana lexi a nga ha vaka a ri na xona. Va vulavule hi swilo leswi a swi rhandzaka ematshan’weni yo sindzisa leswaku va bula hi swilo swa moya. Endzhaku ka loko loyi a nga riki Mbhoni se a ntshunxekile, swi nga ha koteka leswaku mabulo ma khumba Matsalwa. Kumbe a nga ha amukela xirhambo xa leswaku a ta eminhlanganweni ya vandlha leswaku a ta twa leswi dyondziwaka hi nsati wakwe, tanihi leswi se a tivaka van’wana evandlheni. Hambiloko a nga si tiyimisela leswaku a dyondza ntiyiso, u fanele a bumabumeriwa hi leswi a seketelaka munghana wakwe wa vukati loyi a nga Mbhoni.
5. Vakulu va nga n’wi pfuna njhani la nga riki Mbhoni?
5 Vakulu hi vona ngopfu-ngopfu lava va faneleke va pfuna vanghana va vukati lava nga riki Timbhoni naswona va xalamukela tindlela to chumayela. Munhu la nga riki Mbhoni a nga tsakela mabulo ya le Bibeleni kumbe a nga yingisa swikhutazo swa le Matsalweni loko a ri exibedlhele kumbe loko a vabya swinene. Loko ndyangu lowu hambaneke hi tlhelo ra vupfumeri wu langutane ni swiyimo swa mangava, swo fana ni loko wu loveriwe hi xirho xa ndyangu, vakulu va nga ha rhamba xirho lexi nga riki Mbhoni leswaku xi va kona loko va chavelela ndyangu.
6. Hi swihi swivangelo leswi endlaka leswaku hi pfuna lava nga riki Timbhoni?
6 Anakanya ndlela Mukreste a nga tsakaka ha yona loko nuna kumbe nsati wa yena a hundzuka kutani a nghena entiyisweni! Xiendlakalo xexo xa ntsako xi ta tlhela xi tsakisa Yehovha, tintsumi swin’we ni vandlha hinkwaro. (Luka 15:7, 10) Hambiloko la nga riki Mbhoni a nga hundzuki, hi fanele hi tsaka hi leswi matshalatshala ya hina lama ya ka emahlweni ma tsakisaka Yehovha loyi ‘a nga naveliki leswaku ku lova ni un’we kambe a navelaka leswaku hinkwavo va hundzuka.’—2 Pet. 3:9.
[Marito lama tshahiweke exihlokweni lama nga eka tluka 6]
Ndlela leyi hi tikhomaka ha yona i ndlela yo antswa swinene yo va hi hundzula munghana wa vukati handle ko bula na yena hi Bibele