Mi Nga Tihlanganisi Ni Lava Nga Riki Vapfumeri
“Mi nga rhwaleni mpingu wun’we ni lava nga riki vapfumeri; hikuva . . . mupfumeri a nga fambelana hi mukhuva wihi ni loyi a nga riki mupfumeri xana?”—2 VAKORINTO 6:14, 15.
1. Xana makwerhu un’wana wa xisati swi tise ku yini leswaku a tekana ni la nga pfumeriki ke?
UN’WANA wa Timbhoni ta Yehova wo huma evupela-dyambu xikarhi bya United States u lahlekeriwe hi nuna wakwe eka khombo ra movha malembe ma nga ri mangani lama hundzeke. “A ndzi karhatekile eku sunguleni,” wa tsundzuka, “kambe a ndzi tiyimiserile ku ka ndzi nga swi pfumeleli leswi swi kavanyeta ntirho wa mina eka Yehova. Kambe, endzhaku ka malembe yo hlayanyana, ndzi sungule ku titwa ndzi ri ni xivundza exikarhi ka mimpatswa ya le bandlheni. Mina ni n’wana wa mina wa wanhwana a hi nga tali ku rhambiwa eku tihungaseni ka mindyangu. Loko ndzi xiye mimpatswa ya Vukriste yi kombisana rirhandzu, ndzi titwe ndzi lahliwile hakunene. A ku nga ri na munhu loyi a a vonaka a swi xiya leswaku a ndzi ya ndzi tsana hi tlhelo ra moya. Kutani loko wanuna wa misava loyi a ndzi n’wi tivela entirhweni a ndzi kombele ku ya dya na yena, ndzi yile. Handle ko swi xiya, a ndzi rhandzana na yena. Eku heteleleni, a ndzi tsanile naswona ndzi hluriwe hi xivundza xa mina lerova ndzi pfumela ku tekiwa hi yena.”
2. Ha yini ku navela ku nghenela vukati ku ri ka ntumbuluko naswona vukati a byi kunguhateriwe ku vumba yini?
2 Ina, ku navela ku avelana vutomi ni munghana ku nga va lokukulu naswona i ka ntumbuluko. Hi laha Yehova hi yexe a swi vekeke ha kona: “A ŝi sasekanga loko munhu a ṭhama a ri ŝakwe; nḍi ta ṅwi endlela nakulobye [“munghana,” xin’wana lexi n’wi fanelaka] l’a fanaka na yena.” (Genesa 2:18, New World Translation Reference Bible, nhlamuselo) Vukati a byi endleriwe ku vumba xiboho lexikulu, xa nkarhi hinkwawo xa ku hlangana exikarhi ka wanuna ni wansati. A ku nga ri Adamu kambe i Yehova la nga te: “Wanuna o ta siya tata wa kwe ni mana wa kwe, o ta namarela e nsati wa yena, v̌a ta endla nyama yi ri yiṅwe.” (Genesa 2:22-24; ringanisa Matewu 19:4-6.) Kumbexana mbilu ya wena yi langutele munghana wo tano.
3, 4. (a) Bibele yi tsundzuxa ehenhleni ka ku vumba vuxaka lebyikulu ni lava nga riki vapfumeri hi ndlela yihi ke? (b) Xana xitsundzuxo xa Pawulo mayela ni ku hlangana loku nga faniki xi nga tirhisa ku yini evukatini ke? (c) Vakriste va le Korinto va fanele va twisise xiga lexi nge “lava nga riki vapfumeri” hi ndlela yihi? (Vona nhlamuselo.)
3 Kambe, Bibele yi tsundzuxa ku lwisana ni ku vumba vunghana lebyikulu ni lava nga riki vapfumeri. Hi laha muapostola Pawulo a swi vekaka ha kona: “Mi nga rhwaleni mpingu wun’we [“Mi nga tihlanganisi ni ntlawa lowu nga mi faneriki,” The Jerusalem Bible] ni lava nga riki vapfumeri;a hikuva . . . mupfumeri a nga fambelana hi mukhuva wihi ni loyi a nga riki mupfumeri xana?”b (2 Vakorinto 6:14, 15) Pawulo kumbexana a a tsundzuka Nawu wa Muxe lowu yirisaka ku pana nkuzi ni mbhongolo leswaku swi rima. (Deuteronoma 22:10) Mbhongolo i yintsongo hi mpimo naswona a yi na matimba ngopfu kutani a yi ta karhateka hikwalaho ka ku paniwa koloko loku nga ringaniki. Tanihi leswi vukati byi fanaka ni joko leri hlanganisaka wanuna ni wansati, loko Mukriste a tekana ni la nga riki mupfumeri swi ta vanga ku hlanganisa leswi nga ringaniki. (Matewu 19:6) Ku hlangana ko tano hakanyingi ku tisa ntshikilelo ni ku karhateka loku engetelekeke evukatini.—Ringanisa 1 Vakorinto 7:28.
4 Kambe, hi laha ntokoto wo sungula wu kombisaka ha kona, Vakriste van’wana va hlawule ku tekana ni lava nga riki vapfumeri. Ha yini van’wana va swi kuma swi nonon’hwa ku nghenela vukati ‘eHosini ntsena’?—1 Vakorinto 7:39.
Mhaka Leyi Van’wana Va Yaka Kun’wana Ha Yona
5. Kombisa ndlela leyi van’wana va katsekaka erirhandzwini ni la nga riki mupfumeri ha yona.
5 A hi swona leswaku kahle-kahle va tiyimisele ku honisa xitsundzuxo xa Xikwembu. Anakanya hi xiyimo xa makwerhu wa xisati wa Mukriste loyi a nga ha navelaka ku nghenela vukati. A nga ha lava wanuna wa Mukriste, kambe kwalaho swi tikomba ku nga ri na vamakwerhu va xinuna vo tala lava fanelekaka eka vanghana lava a va tivaka lava nga vapfumeri. U khathalela malembe yakwe. A nga ha navela ku va ni ndyangu. Ku chava ku dyuhala a ri yexe ni xilaveko xo rhandziwa swi nga ha n’wi endla a tsana. Kutani, loko wanuna wa misava a kombisa ku n’wi tsakela, swi nga nonon’hwa ku ala. A nga ha vonaka a ri ni musa, a ri lonene. A nga ha va a nga dzahi kumbe ku tirhisa nhlamba. Kutani a sungula ku pimanisa: ‘Phela, u kahle ku tlula vamakwerhu vo tala lava ndzi va tivaka!’ ‘U rhandza ku dyondza.’ ‘Ndzi tiva hi xiendlakalo xin’wana laha makwerhu wa xisati a tekaneke ni la nga riki mupfumeri naswona eku heteleleni u ve mupfumeri-kulobye.’ ‘Ku ni vukati byin’wana bya Vukriste lebyi nga humeleliki!’—Vona Yeremia 17:9.
6, 7. (a) Xana makwerhu un’wana wa xisati la nga tekiwangiki u ku hlamusele njhani ku karhateka kakwe? (b) I xivutiso xihi lexi faneriwaka hi nkambisiso wa hina?
6 Ina, swi nga va leswi vavisaka swinene eka Mukriste la nga yexe loyi a lavaka ku nghenela vukati. Van’wana va titwa va heleriwe hi ntshembo. “Nhlayo ya vamakwerhu va xinuna lava fanelekaka i yintsongo swinene,” ku vule makwerhu un’wana wa xisati la nga yexe loko a hlamusela xiyimo xa le ndhawini ya ka vona. “Kambe nhlayo ya vamakwerhu va xisati lava nga voxe i yikulu swinene. Loko makwerhu wa xisati a vona vuntshwa bya yena byi hundza, ku hlawula ka yena i ku ka a nga tekiwi kumbe ku tekiwa hi nkarhi wo sungula lowu a wu kumaka.”
7 Hambi swi ri tano, xitsundzuxo xa Bibele xi le rivaleni: ‘Mi nga tihlanganisi ni lava nga riki vapfumeri.’ (2 Vakorinto 6:14) Xana xitsundzuxo lexi xa Xikwembu i xa tihanyi kumbe a xi twali ke?
Xikombiso Xa Nkhathalelo Wa Xikwembu Wa Rirhandzu
8. Xana Yehova u swi kombisise ku yini leswaku u hi navelela leswinene?
8 Yehova u khathalela swinene ku tshamiseka ka hina. Xana a nga nyikelanga hi N’wana wa yena “ku kutsula lavo tala” hi nxavo lowukulu eka yena ke? (Matewu 20:28) Xana a hi yena ‘La hi dyondzisaka leswaku a hi pfuna’? (Esaya 48:17) Xana a nga tshembisi leswaku ‘a nge hi pfumeleli hi ringiwa hi leswi hi nga tsandzekaka ku swi tiyiselela’? (1 Vakorinto 10:13) Kutani ke, swa twala, loko a hi byela leswaku hi nga tihlanganisi ni lava nga riki vapfumeri, u fanele a hi navelela leswinene! Xiya ndlela leyi xitsundzuxo lexi xi nga xikombiso xa nkhathalelo wakwe wa rirhandzu eka hina ha yona.
9. (a) I xitsundzuxo xihi lexi Pawulo a xi nyikaka ehenhleni ka ku vumba ka Mukriste xiboho lexikulu ni la nga riki mupfumeri? (b) Hi yihi nhlamuselo ya rito ra Xigriki leri hundzuluxeriweke ku “ku twanana,” naswona ri ku hlamusela njhani ku nonon’hwa loku tlhekekaka loko Mukriste a tihlanganisa ni la nga riki mupfumeri?
9 Vukati a byi kunguhatiwe hi Muvumbi leswaku a vumba xiboho lexikulu exikarhi ka vanhu, wanuna ni wansati va va “nyama yi ri yiṅwe.” (Genesa 2:24) Xana i vutlhari eka Mukriste ku vumba xiboho xo tano lexikulu ni la nga riki mupfumeri ke? Pawulo u hlamula hi ku tlakusa nxaxamelo wa swivutiso leswi twisisekaka, xin’wana ni xin’wana xa swona xi ringanyeta nhlamulo leyi hambaneke: “Hikuva ku tirhisana ku kwihi exikarhi ka ku lulama ni ku homboloka xana? Kumbe ku vonakala ku ni ku yelana kwihi ni munyama ke? Xana Kriste na Beliyali [Sathana] va nga hela hi ku twanana [Xigriki, sym·phoʹne·sis] xana? Kumbe mupfumeri a nga fambelana hi mukhuva wihi ni loyi a nga riki mupfumeri xana?” (2 Vakorinto 6:14, 15) Rito ra Xigriki leri nge sym·phoʹne·sis hi ku kongoma ri vula “ku yimbelela swin’we” (ri huma eka syn, “ni” na pho·neʹ, “mpfumawulo”). Ri kombetela eka ku twanana loku humesiwaka hi swichayachayana. Kavula, a ku na ku twanana exikarhi ka Kriste na Sathana. Hi ku fanana, eka ku hlangana loku nga faniki, swa nonon’hwa eka wanuna ni wansati leswaku ‘va yimbelela noti leyi fanaka.’ Va fana ni swichayachayana swimbirhi leswi swi nga twananiki, leswi baka pongo ematshan’wini yo humesa vuyimbeleri.
10. Hi swihi swiaki swa nkoka eka vukati lebyi tsakisaka naswona i mimpfuno yihi leyi nga kona loko ku ri ni ku hlangana loku fanaka?
10 Kutani ke, xana munhu wa moya a nga ku kumisa ku yini ku twanana loku heleleke ni munhu wa nyama ke? (1 Vakorinto 2:14) Vupfumeri, misinya ya milawu ni tipakani leti fanaka i swiaki swa nkoka eka vukati lebyi tsakisaka. Ku hava lexi nyikaka matimba lamakulu evukatini ku tlula ku tinyiketela lokukulu eka Muvumbi. Loko ku ri ni ku hlangana loku fanaka, wanuna ni wansati va nga khutazana evugandzerini. Havambirhi va nga ya eMatsalweni leswaku va tlhantlha swiphiqo swa vona. Kutani ke, xana a swi le rivaleni leswaku Yehova u hi byela leswaku hi nga tihlanganisi ni lava nga riki vapfumeri hi mhaka ya leswi a lavaka leswaku hi tiphina hi xiboho lexikulu swinene ni munghana wa hina wa vukati ke?
11. Ha yini vuxaka bya vukati ni lava nga riki vagandzeri a byi yirisiwile eIsrayele, naswona i xivutiso xihi lexi tlhontlhaka mianakanyo lexi tlakusiwaka?
11 Ku yingisa xitsundzuxo xa Bibele nakambe ku hi sirheleta eka mimbuyelo yo vava leyi hakanyingi yi vaka kona loko Mukriste a tihlanganisa ni la nga riki mupfumeri. Hi xikombiso, swi nga ha endleka leswaku la nga pfumeriki a tshikisa munghana wa Mukriste ku tirhela Yehova. Xiya xitsundzuxo xa Yehova eka Israyele wa khale. Ku nghenela vukati ni lava nga riki vagandzeri a swi yirisiwile. Ha yini? Yehova u tsundzuxile a ku: “Hikuv̌a v̌a ta hambukisa v̌ana v̌a wena kule na mina, v̌a ya tirela ŝikwembu ŝiṅwana.” (Deuteronoma 7:3, 4) Loko a langutane ni nkaneto wo huma eka munghana la nga pfumeriki, ku nga va ni mboyamelo wo tlhentlhela eka ndlela leyi ku nga hava ntshikilelo eka yona. Swa olova ku anakanya leswaku, ‘A swi nge humeleli eka mina!’ Kambe swi humelerile eka Solomoni, wanuna wa vutlhari. Xana leswi fanaka a swi nge humeleli eka wena ke?—1 Tihosi 11:1-6; ringanisa 1 Tihosi 4:29, 30.
12. Xana nawu wa Xikwembu wo yirisa vukati ni vanhu vambe wu tirhise ku yini tanihi nsirhelelo eka Vaisrayele? Hlamusela.
12 Hambi loko mupfumeri a nga hambukisiwi evugandzerini bya ntiyiso, ka ha ri ni swiphiqo ni mintshikilelo leswi hakanyingi swi fambisanaka ni kaya leri hambaneke hi tlhelo ra vukhongeri. Nakambe, xiya nawu wa Xikwembu eka Israyele. A hi nge wanhwana wa Muisrayele u pfumele ku tekiwa hi wanuna wa Mukanana. Loko a tinyiketele mikhuva ya rimbewu leyi a yi tele etikweni ra Kanana, xana i xichavo xihi lexi a a ta va na xona eka nawu wa Xikwembu xa yena ke? Hi xikombiso, xana a a ta papalata vuxaka bya rimbewu hi ku tirhandzela loko a ri enkarhini, hi laha a swi laviwa ha kona hi Nawu wa Muxe ke?c (Levitika 18:19; 20:18; ringanisa Levitika 18:27.) Emhakeni ya wanuna wa Muisrayele la tekeke wanhwana wa Mukanana, xana a a ta n’wi seketela ku fikela kwihi loko a teka riendzo ro ya eYerusalema kanharhu hi lembe ku ya hlanganyela eka minkhuvo ya lembe na lembe? (Deuteronoma 16:16) Swi le rivaleni, nawu wa Xikwembu wo yirisa vukati byo tano wu tirhe tanihi xisirhelelo eka Vaisrayele.
13. (a) Ha yini munhu wa misava a pfumala ripfalo leri leteriweke hi Bibele, ra Vukriste? (b) I mintshikilelo ni swiphiqo swihi leswi kongomaneke ni van’wana emakaya lama avaneke hi tlhelo ra vukhongeri ke?
13 Ku vuriwa yini hi namuntlha ke? Mimpimanyeto ya mahanyelo ya vanhu va misava yi hambane swinene ni leya Bibele. Ku nga khathariseki leswi vanhu van’wana va misava va nga ha langutekaka va basise swona, a va na rona ripfalo leri leteriweke hi Bibele, ra Vukriste. A va hetanga malembe va dyondza Rito ra Xikwembu, ‘va hundzula mianakanyo ya vona’ kutani ‘va hluvula vumunhu bya vona bya khale.’ (Varhoma 12:2; Vakolosa 3:9) Hikwalaho, Mukriste la tihlanganisaka ni la nga riki mupfumeri hakanyingi u tipaluxa eka swiphiqo ni mahlomulo. Van’wana va kongomana ni mintshikilelo leyi phikelelaka ya ku hlanganyela eka mikhuva ya rimbewu leyi thyakeke kumbe ku tlangela tiholideyi ta misava. Naswona van’wana va vilela hikwalaho ka xivundza. Hi laha makwerhu un’wana wa xisati a tsaleke ha kona: “Xivundza lexi u xi twaka loko u tekane ni munhu loyi a nga n’wi rhandziki Yehova i xivundza xo tlula hinkwaswo leswi nga anakanyiwaka. Phela, a wu na yena wo avelana ntiyiso na yena, lexi ku nga xilo xa nkoka swinene evuton’wini bya wena.”
14. (a) Ekaya leri avaneke, ha yini swi nonon’hwa ku kurisa vana “hi ku va laya ni ku va dyondzisa ta [Yehova]”? (b) Vuyelo byi nga va byihi eka vana endyangwini lowu avaneke?
14 Ekaya leri avaneke, swi nga nonon’hwa swinene ku kurisa vana “hi ku va laya ni ku va dyondzisa ta [Yehova].” (Vaefesa 6:4) Hi xikombiso, xana la nga pfumeriki u ta pfumelela vana hi ku swi rhandza ku ya eminhlanganweni kumbe ku hlanganyela evutirhelini bya nsimu ke? Hakanyingi vana va hetelela va hambanile eka rirhandzu ra vona—va va rhandza vatswari va vona havambirhi, kambe i mutswari un’we la rhandzaka Yehova. Makwerhu un’wana wa xisati la tekaneke ni la nga riki mupfumeri u te: “Ndzi ve ni swiphiqo hi nkarhi wa vukati bya mina bya malembe ya 20. Vana va mina va kule va pfilunganyekile naswona va karhateka emintlhavekweni naswona sweswi va vumba xiphemu xa misava. N’wana wa mina wa wanhwana hakanyingi wa karhateka hi ku va ekule na mina swinene hikwalaho ka mimpfumelelo ya tata wakwe ya ku endza. Swiphiqo leswi swi hikwalaho ka leswi loko ndzi ri ni malembe ya 18, ndzi hlawuleke ku honisa wun’wana wa misinya ya milawu ya Yehova.” Nsinya wa kona wa nawu hi wihi ke? U nga tihlanganisi ni lava nga riki vapfumeri!
15. Ha yini Yehova a hi tsundzuxa leswaku hi nga tihlanganisi ni lava va nga riki vapfumeri ke?
15 Entiyisweni, Yehova u lava leswaku hi tiphina evuton’wini. Leswi a hi kombelaka swona, ku katsa xitsundzuxo xa leswaku hi nga tihlanganisi ni lava nga riki vapfumeri, swi pfuna hina. (Deuteronoma 10:12, 13) Ku tekana ni la nga riki mupfumeri i ku honisa xitsundzuxo xa Matsalwa, vutlhari lebyi nga erivaleni, ni ntokoto wa van’wana lowu vavaka wa nkarhi na nkarhi.
Swivutiso Leswi Hi Ntolovelo Swi Vutisiwaka
16, 17. (a) Loko hi nga xalamuki, xana mintlhaveko yi nga lwisa ku yini ni mianakanyo leyinene? (b) Xana xitsundzuxo xa Xikwembu xi fanele ku honisiwa hikwalaho ka swiyimo swo karhi laha Mukriste a tekaneke ni la nga riki mupfumeri naswona sweswi havambirhi va tirhelaka Yehova ke? Hlamusela.
16 Kambe, loko hi nga tivoneli, mintlhaveko yi nga lwisana ni mianakanyo leyinene. Hi nga ha sungula ku vona onge swo hambana swi nga endliwa emhakeni ya hina. Kambisisa swin’wana swa swivutiso leswi hi ntolovelo swi vutisiwaka swinene.
17 Ku vuriwa yini hi swiyimo laha makwerhu wa xinuna kumbe wa xisati a tekaneke ni la nga riki mupfumeri ivi sweswi havambirhi va tirhela Yehova? Hambi swi ri tano, misinya ya milawu ya Yehova yi tluriwile. Xana makumu ma endla goza ri va lerinene ke? Lexi fanisaka langutelo ra Xikwembu hi lava va honisaka xitsundzuxo xa xona i mhaka ya ku huma ka Vayuda evuhlongeni eBabilona. Loko van’wana va titekele vavasati va vahedeni, vatsari va Bibele Ezra na Nehemiya a va tshikanga ku sola swiendlo swa vona. Vayuda volavo ‘va kanganyisile,’ va endla ‘vubihi lebyikulu,’ naswona va engetela ‘xidyoho.’ (Ezra 10:10-14; Nehemia 13:27) Xin’wana xo xi kambisisa: Loko hi honisa xitsundzuxo xa Xikwembu, hi nga ha tivavisa hi tlhelo ra moya, hi dlaya ripfalo ra hina. Makwerhu un’wana wa xisati loyi nuna wa yena la nga pfumeriki eku heteleleni a veke mupfumeri u te: ‘Ndza ha kongomane ni ku karhateka ka mintlhaveko. A ndzi swi koti ku phofula ndlela leyi ndzi chavaka ha yona loko van’wana va vulavula hi hina ivi va ku, “Kambe va humelerile.”’
18. Hi yihi ndlela ya vutlhari loko u rhandza un’wana loyi a nga siki khuvuriwaka naswona xisweswo u ta va u kombisa yini?
18 Ku vuriwa yini loko u tsakela munhu loyi a dyondzaka Bibele naswona a vaka kona eminhlanganweni, hambi loko a nga si khuvuriwa ke? Ha tsaka loko munhu a kombisa ku tsakela ntiyiso wa Bibele. Kambe, xivutiso xi ri: Xana u fanele ku hlakulela mboyamelo wa wena ke? Entiyisweni, ndlela ya vutlhari i ku yima nkarhinyana munghana wa wena a kondza a khuvuriwa naswona a endla nhluvuko eku kombiseni ka mihandzu ya moya wa Xikwembu mi nga si gangisana. (Vagalatiya 5:22, 23) Swi nga ha nonon’hwa ku tirhisa xitsundzuxo xexo, kambe ku endla tano u ta kombisa ku yingisa misinya ya milawu ya Bibele; leswi swi ta veka xisekelo lexinene xa ntsako wa ntiyiso evukatini. Loko munghana wa wena a ku khathalela hakunene naswona entiyisweni a ta rhandza Yehova, handle ko kanakana u ta tiyimisela ku rindza ku kondza n’wina havambirhi mi va ‘eHosini’—mi tinyiketerile ni ku khuvuriwa—mi nga si gangisana. Nakambe, tsundzuka leswaku rirhandzu ra ntiyiso a ri herisiwi hi ku hundza ka nkarhi.—1 Vakorinto 7:39; Genesa 29:20.
19. I yini lexi u faneleke u xi tsundzuka loko u nonon’hweriwa ku kuma munghana wa vukati exikarhi ka vapfumeri-kulobye?
19 Ku vuriwa yini loko swi ku nonon’hwela ku kuma munghana wa vukati la fanelekaka exikarhi ka vapfumeri-kuloni? Makwerhu un’wana wa xisati u te: “Ndzi ni malembe ya 26 hi vukhale, a ndzi tekiwanga naswona ndzi ni xivundza hakunene.” I ntiyiso, ku titshamela wexe swi nga ha ku nonon’hwela, kambe swiphiqo leswi vaka kona hikwalaho ka ku hlangana loku nga faniki evukatini swi nga va leswi nonon’hwaka swinene! Ku yingisa xitsundzuxo xa Xikwembu swi nga lava ripfumelo, ku tikhoma ni ku tiyisela, kambe tiyiseka leswaku Yehova wa swi tiva naswona u ku navelela leswinene. (1 Petro 5:6, 7) Swi endli mhaka ya xikhongelo ivi u rindzela Yehova. (Psalma 55:22) Eka mafambiselo lawa ya swilo, a nga kona loyi a nga ni vutomi lebyi anerisaka hi ku hetiseka. Mbilu ya wena yi nga ha navela munghana. Kambe, van’wana va ni swiphiqo swa vona, leswi swin’wana swa swona swi nga tshungulekiki eka mafambiselo lawa. Hi le misaveni leyintshwa leyi taka laha ‘ku navela ka xivumbiwa xin’wana ni xin’wana lexi hanyaka’ ku nga ta anerisiwa hi ku helela.—Psalma 145:16.
20. Xana makwerhu un’wana wa xisati u phofule ku tiyimisela ka yena hi ndlela yihi, naswona hi ku va ni ku tiyimisela loku fanaka i ku aneriseka kwihi loku u nga vaka na kona?
20 Enkarhini wa sweswi, tiyimisele ku ka u nga tihlanganisi ni la nga riki mupfumeri. Makwerhu wa xisati la nga ni malembe ya 36 hi vukhale u phofule ku tiyimisela ka yena hi ndlela leyi: “Ndzi khongela Yehova siku rin’wana ni rin’wana ku kuma munghana wa vukati. A ndzi swi naveli ku languta ehandle ka nhlengeletano ya Yehova, kambe miringo yi kona. Enkarhini wa sweswi, ndzi kunguhata ku hlakulela timfanelo leti nga ta ndzi antswisa tanihi munhu leswaku ndzi ta va muxaka wa wansati wa moya loyi wanuna wa moya a n’wi lavaka.” Xana na wena u tiyimisele hi ndlela yoleyo ke? Loko swi ri tano, u nga kuma ku aneriseka loku humaka eku kombiseni ka ku tshembeka ka wena eka Xikwembu xa vululami.—Psalma 37:27, 28.
[Tinhlamuselo ta le hansi]
a Vona Xihondzo xo Rindza xa Xinghezi xa September 15, 1972, matluka 575-6.
b Eka 1 Vakorinto 14:22, Pawulo u tirhise xiga lexi nge “lava nga riki vapfumeri” ku hambana ni “vapfumeri,” kumbe vanhu lava khuvuriweke. Kutani, Vakorinto a va ta twisisa xiga lexi nge “lava nga riki vapfumeri” xi ri lexi kombetelaka eka vanhu lava nga khuvuriwangiki.—Vona Mintirho 8:13; 16:31-34; 18:8.
c “Hi ndlela leyi ndlandlamuxiweke nsinya lowu wa nawu wu nga ha hlamuseriwa hi ndlela leyi: ‘U nga vumbi vuxaka byo karhi, hambi bya xinkarhana kumbe bya nkarhi hinkwawo, ni lava nga riki vapfumeri lava nga ta hundzula mimpimanyeto ya Vukriste kumbe ku nghenisa ku tshembeka ka vumbhoni bya Vukriste ekhombyeni. Naswona ha yini ku va ni ku tihambanisa ko tano? Hikuva la nga riki mupfumeri a nga hlanganyeli eka mimpimanyeto, mintlhaveko kumbe tipakani ta Vukriste.’”—The Expositor’s Bible Commentary, Vholumo 10, tluka 359.
Xana U Nga Hlamusela Ke?
◻ Bibele yi tsundzuxa ehenhleni ka ku vumba vunghana lebyikulu ni lava nga riki vapfumeri hi ndlela yihi?
◻ Ha yini Vakriste van’wana lava tinyiketeleke va lava vanghana va vukati ehandle ka bandlha?
◻ Xitsundzuxo xa Yehova ehenhleni ka ku hlangana loku nga faniki i xikombiso xa nkhathalelo wa yena wa rirhandzu hakunene eka hina hi ndlela yihi?
◻ Hi swihi swivutiso leswi talaka ku vutisiwa mayelana ni ku kuma munghana naswona u nga swi hlamurisa ku yini?