Chumayela Hi Xihatla!
1. Hi xihi xikhutazo xa Pawulo lexi hi faneleke hi xi tekela enhlokweni namuntlha?
1 “Chumayela rito, u va eka rona hi xihatla.” (2 Tim. 4:2) Ha yini xikhutazo xa Pawulo xi ri xa nkoka namuntlha? Xana marito lawa ma byi khumba njhani vutomi bya hina swin’we ni bya van’wana?
2. Ha yini hi fanele hi tikarhatela ku kuma vanhu lava nga si tshamaka va twa mahungu lamanene?
2 Vutomi Bya Vanhu Byi Le Khombyeni: Emisaveni hinkwayo ku ni vanhu va timiliyoni lava ha faneleke va twa mahungu lamanene lama nga ta va ponisa. (Rhom. 10:13-15; 1 Tim. 4:16) Vanhu vo tala va timbilu letinene va kumiwa ensin’wini leyi tirhiwaka nkarhi na nkarhi. Loko hi endzela vanhu hi masiku yo hambana-hambana kumbe hi nkarhi wun’wana wa siku hi nga ha kuma munhu un’wana. Ku tikarhata ko tano ku ta hi siya hi ri ni ripfalo leri baseke naswona hi nga ri na nandzu wa ngati.—Mint. 20:26.
3. Xana nkarhi wa hina hi nga wu tirhisa njhani hi vutlhari loko hi ri ensin’wini?
3 Ku nga khathariseki nkaneto wa tihanyi, Vakreste va lembe-xidzana ro sungula va ‘tate Yerusalema hi dyondzo ya vona.’ (Mint. 5:28) Xana na hina hi tiyimiserile ku “nyikela vumbhoni bya rixaladza”? (Mint. 10:42) Loko hi ri ensin’wini, xana hi wu tirhisa hi vutlhari nkarhi wa hina? Loko ha ha yimele van’wana loko va endla maendzo yo vuyela, xana ha va chumayela vanhu lava hundzaka hi ndlela?
4. Ku chumayela hi xihatla swi hi pfuna njhani leswaku hi tshama hi rindzile?
4 Ku Engetela Ndlela Leyi Hi Xalamukeke Ha Yona: Leswi makumu ya mafambiselo lawa ya swilo ma nga kwala nyongeni, hi fanele hi tshama hi xalamukile naswona hi tshama hi rindzile. (1 Tes. 5:1-6) Loko nkarhi na nkarhi hi vulavula hi ntshembo lowu hi nga na wona hi Mfumo, hi ta papalata ku tshikileriwa hi mafambiselo lawa ya swilo. (Luka 21:34-36) Hi hala tlhelo, loko hi tshama hi ri karhi hi “tsundzuka” siku ra Yehovha, hi ta susumeteleka ku engetela nkarhi lowu hi wu heteka hi ri entirhweni wo chumayela lowu ponisaka vutomi.—2 Pet. 3:11, 12.
5. Ku xixima vutomi swi nga hi khutaza njhani loko hi ri ensin’wini?
5 Loko hi chumayela hi xihatla, hi kombisa ndlela leyi Yehovha a byi langutaka ha yona vutomi: “A nga naveli leswaku ku lova ni un’we kambe u navela leswaku hinkwenu mi hundzuka.” (2 Pet. 3:9; Ezek. 33:11) Onge hi nga tiyimisela ku chumayela vanhu vo tala hilaha hi nga kotaka hakona ensin’wini ya hina leswaku hi vangamisa Yehovha!—Ps. 109:30.