Hi Fanele Hi Lehisa Mbilu eVutirhelini Bya Hina
1. Xana Yehovha u swi kombise njhani leswaku u lehisela vanhu mbilu?
1 Xikwembu xi lehisela vanhu mbilu. (Eks. 34:6; Ps. 106:41-45; 2 Pet. 3:9) Xin’wana xa swikombiso leswikulu swa ku lehisa ka xona mbilu swi nga voniwa eka ntirho wo chumayela hi Mfumo wa misava hinkwayo. Yehovha u tirhisane ni vanhu ku ringana malembe ya kwalomu ka 2 000 naswona u ya emahlweni a kokela vanhu va timbilu letinene eka yena. (Yoh. 6:44) Loko hi ri entirhweni wa nsimu hi nga n’wi tekelela njhani Yehovha emhakeni yo lehisa mbilu?
2. Hi nga swi kombisa njhani leswaku hi lehisa mbilu loko hi tirha ensin’wini ya hina?
2 Vutirheli Bya Yindlu Ni Yindlu: Hi tekelela ku lehisa mbilu ka Yehovha hi ku chumayela hi “nga rhuteli” ensin’wini leyi vanhu va kona va nga kombisiki ku tsakela. (Mint. 5:42) Hi lehisa mbilu hi ku va hi tiyisela loko rungula ra hina ri nga tsakeriwi, loko hi sandziwa ni loko hi kanetiwa evutirhelini bya hina. (Mar. 13:12, 13) Nakambe hi lehisa mbilu hi ku phikilela eka matshalatshala ya hina yo cheleta mbewu ya ntiyiso hambiloko swi tika ku kuma vanhu lava tsakelaka emakaya.
3. Ha yini ku lehisa mbilu ku laveka loko hi endla maendzo yo vuyela ni loko hi fambisa tidyondzo ta Bibele?
3 Tidyondzo Ta Bibele: Ku kurisa ximilana swi lava ku lehisa mbilu. Hi nga xi hlakulela, kambe a hi nge swi koti ku endla leswaku xi hatla xi kula. (Yak. 5:7) Hilaha ku fanaka, ku kula hi tlhelo ra moya ku vonaka hakatsongo-tsongo. (Mar. 4:28) Vanhu lava hi dyondzaka na vona swi nga ha endleka leswaku swa va tikela ku tshika tidyondzo ta mavunwa leti va pfumelaka eka tona kumbe mikhuva leyi nga sekeriwangiki eMatsalweni. A hi fanelanga hi ringeta ku endla leswaku swichudeni swa hina swi hatla swi kula hi tlhelo ra moya hi ku va hi swi sindzisa ku endla ku cinca ko karhi. Hi fanele hi lehisa mbilu leswaku moya wa Xikwembu wu kota ku tirha embilwini ya xichudeni.—1 Kor. 3:6, 7.
4. Ku lehisa mbilu swi nga hi pfuna njhani leswaku hi chumayela hi ndlela leyi humelelaka eka maxaka lama nga riki vapfumeri?
4 Maxaka Lama Nga Riki Vapfumeri: Hambileswi hi swi navelaka swinene leswaku maxaka ya hina lama nga riki vapfumeri ma dyondza ntiyiso, hi kombisa ku lehisa mbilu hi ku rindzela nkarhi lowu faneleke leswaku hi ma byela hi ripfumelo ra hina naswona hi va ni vuxiyaxiya leswaku hi nga ma fumbi hi rungula ro tala. (Ekl. 3:1, 7) Hi nkarhi lowu fanaka, hi endla leswaku swiendlo swa hina ku va swona leswi kombisaka leswaku ntiyiso wu hi endle hi va vanhu va njhani naswona hi tshama hi lunghekele ku hlamusela ripfumelo ra hina hi moya wo rhula ni hi xichavo lexikulu. (1 Pet. 3:1, 15) Hakunene, loko hi lehisa mbilu evutirhelini bya hina hi ta va lava humelelaka naswona hi ta tsakisa Tata wa hina wa le tilweni.