The Wonders of Creation Reveal God’s Glory

Vanhu vo tala va tsakela ku hlalela ntumbuluko. Kambe a va talanga vanhu lava swi xiyaka leswaku ntumbuluko wu hlavutela swo tala malunghana ni mianakanyo ni ndlela leyi Muvumbi wa hina la Tlakukeke a titwaka ha yona. (Rhom. 1:20) Khale swinene, Davhida u dyondze hi Yehovha hi ku kambisisa Rito ra Yena. Nakambe u tlhele a tshinela ekusuhi na Yena hi ku kambisisa ntumbuluko. (Ps. 8:3, 4) Vhidiyo leyi nga ni nhloko-mhaka leyi nge The Wonders of Creation Reveal God’s Glory yi ta pfuna hina, vana va hina swin’we ni lava hi dyondzaka na vona Bibele leswaku hi kambisisa swin’wana swa swilo leswi Yehovha a swi tumbuluxeke, hi vona timfanelo ni vumunhu bya Muvumbi wa hina la Tlakukeke naswona hi tshinela ekusuhi na yena. Endzhaku ko yi hlalela, vona loko u ta swi kota ku hlamula swivutiso leswi landzelaka.

(1) Xana mpimo ni ndlela leyi vuako hinkwabyo byi hleriweke ha yona swi ku endla u n’wi khensa ku fikela kwihi Yehovha? (Esa. 40:26) (2) Loko hi xiyisisa mati hi vurhon’wana, hi nga dyondza yini hi Xikwembu? (Nhlav. 14:7) (3) Xana mpimo wa misava ni ndlela leyi yi vandzamaneke ni dyambu ha yona swi kombisa yini malunghana ni vutlhari bya Yehovha? (4) N’weti wu tirha yini? (Ps. 89:37) (5) Yehovha u va vumbe njhani vanhu leswaku va tsakela vutomi? (6) DNA i yini? (Ps. 139:16) (7) Xana vanhu va hambana njhani ni swivumbiwa hinkwaswo leswi Yehovha a swi tumbuluxeke? (Gen. 1:26) (8) I yini leswi u swi languteleke hi mahlo-ngati emisaveni leyintshwa?

Leswi Engetelekeke: (9) Xana mivala yi huma kwihi? (10) Xana mati ma wu hlula njhani nkoka-misava ku kondza ma fika emaninginingini ya mirhi? (11) Mati ma tirha yini emimirini ya hina? (12) Nyika swikombiso swa ndlela leyi swilo leswi hanyaka swi tirhisanaka ha yona. (13) Xana swilo leswi tumbuluxiweke swi swi kotisa ku yini ku tirhisana? (14) I yini “golden angle” naswona yi vonaka njhani eka ntumbuluko?

“Xiyisisani Swinene” Mintirho Ya Yehovha: Yesu u hi khutaze ku ‘xiyisisa swinene tinyenyana ta tilo’ ni ku ‘dyondza eka makhon’wa ya nhova.’ (Mat. 6:26, 28) Sweswo swi nga endla leswaku ripfumelo ra hina ri kula, hi n’wi tshemba swinene Muvumbi naswona swi nga hi pfuna ku tlangela vutlhari bya Yehovha, matimba yakwe yo ponisa vanhu vakwe ni rirhandzu rakwe. Ematshan’weni yo kavanyetiwa hi mintirho ya misava, tinyike nkarhi u tlhela u endla matshalatshala yo kambisisa ntumbuluko wa Yehovha lowu hlamarisaka kutani u kombisa leswi wu hi byelaka swona malunghana ni Xikwembu xa hina.—Ps. 19:1.