Vana Ni Vuxiyaxiya Loko U Ri eNsin’wini
1. Ha yini hi fanele hi va ni vuxiyaxiya loko hi ri ensin’wini?
1 “Kukota tinyimpfu exikarhi ka timhisi,” malandza ya Xikwembu ma chumayela “exikarhi ka xitukulwana xo homboloka ni lexi gombonyokeke.” (Mat. 10:16; Filp. 2:15) Swiviko leswi chavisaka swa nyimpi etikweni, madzolonga lama vangiwaka hi ntshungu wa vapfukeri ni ku tlhakisiwa hi tihanyi i vumbhoni bya leswaku vanhu vo homboloka va ya emahlweni “va nyanya evubihini bya vona.” (2 Tim. 3:13) Hi yihi milawu ya Matsalwa leyi nga hi pfunaka leswaku hi ‘va ni vuxiyaxiya’ ensin’wini?—Mat. 10:16.
2. Hi swihi swiyimo leswi nga ha koxaka leswaku u suka ensin’wini kutani u ya chumayela endhawini yin’wana?
2 Tlhariha: Swivuriso 22:3 yi kandziyisa ndlela leyi swi nga vutlhari ha yona ku “tumbela” khombo. Tshama u xalamukile! Swiyimo endhawini leyi hi ntolovelo yi hlayisekeke swi nga ha cinca hi xitshuketa. U nga ha vona maphorisa yo tala kumbe mintshungu exitarateni. Minkarhi yin’wana n’wini wa muti loyi a nga ni musa a nga ha mi lemukisa. Ematshan’weni yo va mi yima mi lava ku vona leswi endlekaka, i vutlhari ku songa rigogo ra ha tsakama kutani mi ya chumayela kun’wana.—Swiv. 17:14; Yoh. 8:59; 1 Tes. 4:11.
3. Xana nawu lowu nga eka Eklesiasta 4:9 wu tirha njhani ensin’wini ya hina?
3 Tirha Ni Van’wana: Eklesiasta 4:9 yi vula leswaku “vambirhi va antswa ku tlula un’we.” Hambiloko u tolovele ku tirha nsimu u ri wexe naswona u sirhelelekile, xana sweswi a swi na khombo ku endla tano? Etindhawini tin’wana a swi na khombo. Kambe etindhawini tin’wana sweswi swi na khombo ku va makwerhu wa xisati kumbe muntshwa a tirha hi yindlu ni yindlu a ri swakwe, ngopfu-ngopfu endzhaku ka ku pela ka dyambu. Vumbhoni byi kombisa leswaku munhu loyi u tirhaka na yena loyi a tshamaka a xalamukile i wa nkoka. (Ekl. 4:10, 12) Makwerhu un’wana ni un’wana u fanele a xalamukela vuhlayiseki bya vamakwerhu lavan’wana lava nga entlaweni wakwe. Loko u hetile ku tirha nsimu, swi endle mukhuva ku byela van’wana lava u tirhaka leswaku wa famba.
4. Xana hi nga swi endla njhani leswaku hinkwerhu hi sirheleleka evandlheni?
4 Tanihi leswi vakulu ‘va tshama va rindze mimoya-xiviri ya hina’ va ni vutihlamuleri byo nyikela nkongomiso lowu pfunaka hi ku ya hi swiyimo swa ndhawu yoleyo. (Hev. 13:17) Ha tiyiseka leswaku Yehovha u ta hi katekisa loko hi kombisa xichavo xa Vukreste naswona hi tirhisana na vona hi ku helela. (Mik. 6:8; 1 Kor. 10:12) Onge malandza hinkwawo ya Xikwembu ma nga hoxa xandla eku nyikeleni vumbhoni hi ndlela leyi humelelaka, kambe minkarhi hinkwayo ma va ni vuxiyaxiya.