Xikwembu Xi Vulavula Na Hina Hi Ku Tirhisa Yeremiya

1. Hi yihi buku leyi humesiweke entsombanweni wa muganga wa 2010 naswona hi ta yi tirhisa njhani?

¹ Hakunene a hi tsakile loko buku yoleyo leyintshwa yi humesiwa eNtsombanweni wa Muganga wa 2010 lowu a wu ri ni nhloko-mhaka leyi nge, “Tshamani Ekusuhi Na Yehovha!” Buku leyi yi kandziyisa tidyondzo leti kumekaka ebukwini ya Yeremiya na Swirilo leti hi nga ti tirhisaka evuton’wini bya hina bya siku ni siku. (Rhom. 15:4) Yi endleriwe ku tirhisiwa eka Dyondzo ya Bibele ya Vandlha naswona yi ta dyondziwa hi vhiki leri sungulaka hi November 5, 2012.

2. Ha yini hi ta vuyeriwa loko hi kambisisa tibuku ta Bibele ta Yeremiya na Swirilo?

² Ya Vuyerisa Namuntlha: Yeremiya, mutsari wa buku leyi ya Bibele leyi huhuteriweke, u profete hi nkarhi lowu eYuda a ku ri ni mpfilumpfilu. Eku sunguleni, a a titwa a nga faneleki ku endla xiavelo xakwe. (Yer. 1:6) U tlhele a xanisiwa hi vanghana hambi ku ri maxaka yakwe ya le mutini wa rikwavo wa Anathoti. (Yer. 11:21, 22) Swa twisiseka leswi minkarhi yin’wana Yeremiya a pfa a tshikileleka. (Yer. 20:14) Loko hi ri karhi hi hetisisa ntirho wa hina wa ku “endla vanhu va matiko hinkwawo va va vadyondzisiwa,” hakanyingi hi hlangavetana ni swiphiqo ni ku titwa hi ndlela leyi Yeremiya a titweke ha yona. (Mat. 28:19) Ku kambisisa matsalwa yakwe swi ta hi pfuna leswaku hi endla vutirheli bya hina hi ku tshembeka ni hi ku hiseka.

3. Xana hi ta swi tirhisa njhani swin’wana swa swilo leswi nga endzeni ka buku ya Yeremiya?

³ Leswi Nga Endzeni: Matsalwa lawa ma faneleke ma hlayiwa hi nkarhi wa bulo ma voyamisiwile. Emakumu ka dyondzo ya vhiki ni vhiki ku ni xivutiso xin’we kumbe swimbirhi swa nkoka leswi dzwihatiweke leswi kandziyisaka tinhla ta nkoka ta dyondzo. Swivutiso sweswo swi fanele swi vutisiwa vayingiseri tanihi mpfuxeto. Ebukwini leyi hinkwayo ku ni swifaniso swo saseka leswi handle ko kanakana vandlha ri nga tsakelaka ku swi hlamusela.

4. Xana hi nga vuyeriwa njhani hi ku helela loko hi kambisisa buku ya Yeremiya?

⁴ Leswaku u vuyeriwa swinene, lunghiselela dyondzo ka ha ri emahlweni. Lava tinhla leti u nga ti tirhisaka evuton’wini bya wena ni le nsin’wini. Hlanganyela hi xitalo eku nyikeleni ka tinhlamulo. Hikwalaho ko pfuniwa hi Yehovha, Yeremiya u hetisise xiavelo xakwe hi ntsako ni hi ku eneriseka. (Yer. 15:16) Onge ku kambisisa ka hina buku leyi leyintshwa ku nga hi pfuna leswaku hi endla vutirheli bya hina hi ndlela leyi fanaka.