Vona Leswinene Hikwalaho Ka Ku Tikarhata Ka Wena
1. I yini lexi nga endlaka leswaku hi nga ha hiseki evutirhelini bya hina?
1 Munhu u vumberiwe ku “vona leswinene hikwalaho ka ku tikarhata kakwe.” (Ekl. 2:24) Hambiswiritano, loko hi tsandzeka ku vona vuyelo lebyinene evutirhelini bya hina, hi nga hela matimba ivi hi nga tsaki naswona hi tshika ku hiseka. I yini lexi nga hi pfunaka leswaku hi tshama hi ri ni langutelo lerinene?
2. Ha yini hi fanele hi langutela leswinene eka ndlela leyi vanhu va angulaka ha yona ensin’wini?
2 Langutela Swilo Leswinene: Tsundzuka leswaku vanhu lava pfumeleke eka Yesu a va nga talanga, kambe u humelerile evutirhelini byakwe. (Yoh. 17:4) Eka xikombiso xakwe xa muhaxi, Yesu u vulavule hi mbilu leyi eku heteleleni yi nga ta ka yi nga fanisiwi ni mbewu ya mahungu ya Mfumo. (Mat. 13:3-8, 18-22) Nilokoswiritano, matshalatshala ya hina ya ku gingiriteka ma hetiseka.
3. Hi nga “humesa mihandzu” hi ndlela yihi hambiloko vanhu va nga amukeli loko hi va chumayela?
3 Ndlela Leyi Hi Vekaka Mihandzu Yo Tala Ha Yona: Hi ku ya hi xikombiso xa Yesu, lava va amukelaka rungula va ta “humesa mihandzu.” (Mat. 13:23) Endzhaku ka loko rihlanga ra koroni ri kurile a ri humesi rihlanga rin’wana ra koroni kambe ri humesa mbewu leyintshwa. Hilaha ku fanaka mihandzu leyi Vakreste lava wupfeke va yi humesaka a hi vadyondzisiwa lavantshwa, kambe i mbewu ya Mfumo—ku byela van’wana hi Mfumo. Vuyelo lebyi hi byi kumaka i “byinene” hikuva ha eneriseka, ku nga khathariseki ndlela leyi vanhu va angulaka ha yona. Hi hoxa xandla eku kwetsimisiweni ka vito ra Yehovha. (Esa. 43:10-12; Mat. 6:9) Ha tiphina hi lunghelo ro va vatirhi-kulobye ni Xikwembu. (1 Kor. 3:9) Naswona “mbhandzu wa milomu” wu tsakisa Yehovha.—Hev. 13:15, 16.
4. Hi byihi vuyelo lebyi nga ha vaka kona ensin’wini, lebyi hi nga byi tiviki?
4 Ku engetela kwalaho, ku tikarhata ka hina ku nga va ni vuyelo lebyi hi nga byi nga voniki. Swi nga ha endleka leswaku van’wana lava tweke Yesu loko a ri karhi a chumayela a va vanga vadyondzisiwa va yena ku kondza a heta vutirheli byakwe bya laha misaveni. Hilaha ku fanaka, swi nga endleka leswaku mbewu ya Mfumo leyi hi yi haxaka yi nga kuli etimbilwini ta vanhu hi nkarhi wolowo naswona va nga hetela va ve Timbhoni hi nga swi tivi. Hakunene, vutirheli bya hina byi humesa vuyelo lebyinene. Hi kwalaho, onge hi nga ‘hambeta hi tswala mihandzu yo tala’ naswona hi tikombisa hi ri vadyondzisiwa va Yesu!—Yohane 15:8.