U Nga Tinyaji—U Nga Swi Kota Ku Fambisa Dyondzo ya Bibele Hambiloko U Tshama U Khomekile
1. Ha yini van’wana va kanakana ku kombela ku sungula ku dyondza na munhu Bibele?
1 Van’wana va kanakana ku kombela ku sungula ku dyondza na munhu Bibele hikwalaho ka leswi va tshamaka va khomekile. Ku fambisa dyondzo ya Bibele swi teka nkarhi. Ku laveka nkarhi leswaku u kota ku lunghiselela dyondzo ya Bibele ni ku yi fambisa u tlhela u pfuna xichudeni leswaku xi kota ku hlula swihinga leswi xi nga ha hlangavetanaka na swona. Muapostola Pawulo u vule leswaku u nyikele hi moya xiviri wakwe leswaku a pfuna lava nga le Tesalonika leswaku va tiva Yehovha. (1 Tes. 2:7, 8) Hi nga yi fambisa njhani dyondzo ya Bibele hambiloko hi tshama hi khomekile?
2. Xana ndlela leyi hi rhandzaka Yehovha ha yona yi wu khumba njhani nkarhi wa hina?
2 Ku Gandzela Yehovha Swi Lava Nkarhi: Entiyisweni ku gandzela swi lava nkarhi. Hi xikombiso, hakanyingi hi tirhisa nkarhi leswaku hi ya eminhlanganweni, entirhweni wa nsimu, ku hlaya Bibele ni ku khongela. Munhu la ngheneleke vukati la tshamaka a khomekile u tixavela nkarhi wo dzumba ni katakwe. Leswi hi rhandzaka Yehovha hi fanele hi “tixavela nkarhi” wo n’wi gandzela. (Efe. 5:15-17; 1 Yoh. 5:3) Yesu u vule leswaku ntirho wa hina wa nkoka swinene i ku endla vadyondzisiwa. (Mat. 28:19, 20) Ku endla tano swi ta hi pfuna leswaku hi amukela vutihlamuleri bya hina byo fambisa dyondzo ya Bibele.
3. Hi nga ti fambisa njhani tidyondzo ta Bibele hambiloko swiyimo swi kavanyeta xiyimiso xa hina xa nsimu?
3 Kambe ku vuriwa yini loko xiyimiso xa hina xi kavanyetiwa hi ntirho, vuvabyi lebyi nga tshungulekiki kumbe swiavelo swa vandlha? Vahuweleri van’wana lava minkarhi yin’wana va nga kumekiki va fambisa dyondzo ya Bibele hi ku tirhisa riqingho kumbe va vulavurisana ni xichudeni hi ku tirhisa khompyuta. Lava nga ni vuvabyi lebyi nga tshungulekiki va endla malunghiselelo ya leswaku swichudeni swa vona swi va endzela emakaya leswaku va dyondza. Van’wana va endle lunghiselelo ra leswaku muhuweleri un’wana a va fambisela dyondzo ya Bibele loko va nga ri kona.
4. Hi yihi mikateko leyi hi nga ta yi kuma hi ku fambisa tidyondzo ta Bibele?
4 Pawulo u kume ntsako hi ku nyikela hi nkarhi ni hi matimba yakwe leswaku a pfuna van’wana va dyondza ntiyiso. (Mint. 20:35) Loko a anakanya hi vanhu hinkwavo lava a koteke ku va pfuna eTesalonika, u nkhense Yehovha. (1 Tes. 1:2) Loko hi nga pfumeleli ku tshama hi khomekile swi hi kavanyeta ku fambisa tidyondzo ta Bibele, hi ta ya hi va ni ntsako naswona hi ta eneriseka.