U Nga Kanakani Ku Fambisa Dyondzo Ya Bibele!
1. Hi yihi ndlela leyi ha yona hi nga va ‘endlelaka leswinene’ vanhu?
1 Loko hi hlanganyela hi ku hiseka eku twariseni ka mahungu lamanene ya Mfumo wa Xikwembu, hi va hi va “endlela leswinene” vanhu lava nga emasin’wini lawa hi averiweke wona. (Swiv. 3:27) A ku na rungula leri antswaka leri hi nga ri chumayelaka vanhu handle ko va byela leswaku va ta hanya vutomi byo antswa loko ku fuma Xikwembu. Swi nga endleka leswaku u hlanganyela hi xitalo eku byeleni van’wana ntshembo wa Mfumo hi ku chumayela hi xitshuketa kumbe hi ku fambisa minkandziyiso, kambe i swinene leswaku u tivekela pakani yo fambisa dyondzo ya Bibele loko ku ri leswaku a wu na yona!
2. I yini lexi nga hi sivelaka leswaku hi fambisa dyondzo ya Bibele?
2 Minkarhi yin’wana xihinga lexikulu lexi hi sivelaka ku fambisa dyondzo ya Bibele i ndlela leyi hi titwaka ha yona hi ku fambisa dyondzo ya Bibele. Van’wana va kanakana ku fambisa dyondzo ya Bibele hikwalaho ko titwa va nga faneleki kumbe hikwalaho ka leswi va tshamaka va khomekile. Swiringanyeto leswi landzelaka swi nga ku pfuna leswaku u nga kanakani ku fambisa dyondzo ya Bibele.—Mat. 28:19; Mint. 20:20.
3. Ha yini hi faneleka ku dyondzisa Bibele?
3 Ku Tivona U Nga Faneleki: Swi nga ha endleka leswaku a wu dyondzekanga kumbe hikwalaho ka swivangelo swin’wana u tivona u nga faneleki ku fambisa dyondzo ya Bibele. Vakreste lava a va humelela entirhweni wo chumayela eka lembe-xidzana ro sungula a va nga ‘dyondzekanga naswona a va ri vanhu lava tolovelekeke.’ I yini lexi nga va pfuna leswaku va kota ku dyondzisa van’wana ntiyiso? Va pfuniwe hileswi “a va tshama va ri na Yesu.” (Mint. 4:13) Va dyondze eka Mudyondzisi Lonkulu, Yesu, loyi tidyondzo ta yena ni tindlela leti a a ti tirhisa, hi hlayiseriweke tona eMatsalweni. Hambiloko u nga dyondzekanga, u kuma dyondzo leyi nga pimanisiwiki na nchumu malunghana ni Xikwembu ni swikongomelo swa xona.—Esa. 50:4; 2 Kor. 3:5.
4. Xana hi nga dyondza yini eka xikombiso xa Amosi?
4 Minkarhi yin’wana Yehovha u tirhise vaprofeta ku tshinya vafumi kumbe vanhu van’wana va swikhundlha swa le henhla. Van’wana va vaprofeta volavo, vo kota Amosi, a va ri vanhu va xiyimo xa le hansi. Amosi u te: “A ndzi nga ri muprofeta naswona a ndzi nga ri n’wana wa muprofeta; kambe a ndzi ri murisi, ndzi kha makuwa ya swinkuwana.” (Amo. 7:14) Nilokoswiritano, Amosi a nga kanakananga ku twarisa vuavanyisi bya Yehovha eka muprista Amaziya loyi a a ri mugandzeri wa rhole. (Amo. 7:16, 17) Minkarhi hinkwayo hi fanele hi tsundzuka leswaku hi endla ntirho wa Xikwembu naswona xi ta hi pfuna leswaku hi kota ku wu endla kahle ntirho lowu hi faneleke hi wu endla.—2 Tim. 3:17.
5. Ha yini hi fanele ku tikarhatela ku sungula dyondzo ya Bibele hambiloko ku ri leswaku hi tshama hi khomekile?
5 Ku Tshama U Khomekile: Hambiloko u tshama u khomekile, swi nga endleka leswaku ana se u tiendlele xiyimiso xo kuma nkarhi wo hlanganyela entirhweni wo chumayela. Ku fambisa dyondzo ya Bibele ku nga va yin’wana ya tindlela to tiphina entirhweni wo chumayela. I lunghelo ku vona Rito ra Yehovha ri hundzula vutomi bya munhu. (Hev. 4:12) Yehovha wa tsaka loko a hi vona hi titsona swo karhi leswaku hi pfuna van’wana va “fikelela vutivi lebyi kongomeke bya ntiyiso.” (1 Tim. 2:4) Hambi ku ri tintsumi ta tsaka loko ti vona munhu a hundzula mahanyelo ya yena a va nandza wa Xikwembu.—Luka 15:10.
6. Hi rihi lunghelo leri hi nga na rona leswaku hi endla ku rhandza ka Xikwembu?
6 Xikwembu xi ‘rhandza leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.’ (1 Tim. 2:4) Hi ni lunghelo ro endla ntirho lowu pfumelelanaka ni ku rhandza ka Xikwembu, hileswi hi nga kanakaniki ku fambisa tidyondzo ta Bibele!