Tekelelani Xikombiso Xa Vaprofeta—Amosi
1. Ha yini xikombiso xa Amosi xi hi khutaza swinene?
1 Xana u tshame u titwa u nga faneleki ku chumayela hileswi u nga dyondzekangiki? Loko swi ri tano, u nga va ni xivindzi hi ku tekelela xikombiso xa Amosi. A a ri murisi wa tinyimpfu naswona a a ri murimi kambe Yehovha u n’wi nyike matimba ya ku chumayela rungula ra nkoka. (Amo. 1:1; 7:14, 15) Hilaha ku fanaka ninamuntlha, Yehovha u tirhisa lava titsongahataka. (1 Kor. 1:27-29) Hi tihi tidyondzo tin’wana leti hi nga ti dyondzaka malunghana ntirho wa hina wa nsimu eka muprofeta Amosi?
2. Hi nga yima njhani hi tiyile loko hi kanetiwa ensin’wini?
2 Yima U Tiya Hambiloko U Kanetiwa: Loko Amaziya, muprista loyi a gandzelaka rhole wa le n’walungwini wa tinyimba ta khume ta Israyele, a twa loko Amosi a profeta, u hlamule a ku: ‘Muka! Hi tshike! Hi ni vugandzeri bya hina!’ (Amo. 7:12, 13) Amaziya u hembile loko a endla xikombelo eka Hosi Yerobuwamu leswaku a yirisa ntirho wa muprofeta Amosi. (Amo. 7:7-11) Kambe Amosi a nga chavanga. Namuntlha, vafundhisi van’wana va lava nseketelo eka tipolitiki loko va endla matshalatshala yo xanisa vanhu va Yehovha. Kambe, Yehovha wa hi tiyisekisa leswaku a ku na tlhari leri endleriweke ku hi hlasela leri nga ta humelela.—Esa. 54:17.
3. Hi rihi rungula ra swiyenge swimbirhi leri hi ri chumayelaka namuntlha?
3 Chumayela Hi Vuavanyisi Bya Yehovha Ni Mikateko Ya Nkarhi Lowu Taka: Hambileswi Amosi a profeteke hi vuavanyisi lebyi a byi ta wela tinyimba ta khume ta Israyele, u gimete buku ya le Bibeleni leyi vitaniwaka hi vito ra yena hi xitshembiso xa Yehovha xo vuyetela ni mikateko yo tala. (Amo. 9:13-15) Na hina hi vulavula hi “siku ra vuavanyisi” leri taka ra Xikwembu, kambe i xiphemu xa “mahungu lamanene lawa ya mfumo” ntsena lawa hi faneleke hi ma chumayela. (2 Pet. 3:7; Mat. 24:14) Ku va Yehovha a lovisa vanhu vo homboloka hi nyimpi ya Armagedoni swi ta endla leswaku ku va ni misava leyi nga paradeyisi.—Ps. 37:34.
4. I yini lexi hi tiyisekisaka leswaku hi ta swi kota ku hetisisa ku rhandza ka Yehovha?
4 Hakunene ku chumayela mahungu ya Mfumo emisaveni leyi teleke hi vakaneti swi ringa ku tiyimisela ka hina ku hanya hi ku tinyiketela ni ku endla ku rhandza ka Yehovha. (Yoh. 15:19) Hambiswiritano, ha tiyiseka leswaku Yehovha u ta hambeta a hi nyika leswi hi swi lavaka leswaku hi hetisisa ku rhandza ka yena, hilaha Amosi a endleke hakona.—2 Kor. 3:5.