Landzela Ntila Wa Vaprofeta—Yonasi
1. Hi tihi timfanelo letinene leti Yonasi a ti kombiseke?
1 I yini leswi taka emianakanyweni ya wena loko u anakanya hi muprofeta Yonasi? Van’wana va n’wi teka tanihi toya kumbe munhu wo oma nhloko. Hambiswiritano, u kombise moya wo titsongahata, xivindzi ni ku tinyiketela. Xana hi nga ‘teka timfanelo ta nkoka ta Yonasi ku ri ntila’ hi ndlela yihi?—Yak. 5:10.
2. Xana hi nga ku tekelela njhani ku titsongahata ka Yonasi?
2 Ku Titsongahata: Eku sunguleni Yonasi u balekele xiavelo xa yena. Leswi a swi hlamarisi hikuva Vaasiriya a va ri ni tihanyi naswona muti wa Ninivha a a wu vitaniwa “muti lowu halataka ngati.” (Nah. 3:1-3) Nilokoswiritano, Yehovha u tshinye Yonasi loyi a titsongahateke hi ku amukela xiavelo loko a nyikiwe xona ra vumbirhi. (Swiv. 24:32; Yon. 3:1-3) Ku nga khathariseki ku va a arile eku sunguleni, u endle ku rhandza ka Yehovha. (Mat. 21:28-31) Xana na hina hilaha ku fanaka hi tiyimisele ku chumayela mahungu lamanene hambi loko hi langutane ni swiyimo leswi tlhontlhaka ensin’wini?
3. Hi le ka swiyimo swihi laha hi faneleke hi va ni xivindzi ni ku tinyikela ensin’wini ya hina?
3 Xivindzi Ni Ku Tinyiketela: Loko Yonasi a xiya leswaku xiboho xa yena xo biha xi veke vutomi bya vatluti ekhombyeni, a a tiyimisele ku nyikela hi vutomi byakwe. (Yon. 1:3, 4, 12) Endzhaku ka sweswo loko a ri karhi a hetisisa ntirho wakwe eNinivha, u ye exivindzini xa muti wolowo, kumbexana hi leswi a lava ndhawu leyi faneleke laha a nga ta huwelela hi vuavanyisi bya Yehovha. Xiendlo xexo a xi nga ri xa vutoya kambe a ku ri xa xivindzi lexi kombisiweke hi muprofeta wa Xikwembu. (Yon. 3:3, 4) Ku vuriwa yini hi hina namuntlha? Ku laveka xivindzi lexi Xikwembu xi hi nyikaka xona leswaku hi kota ku chumayela vakaneti hi vurhena. (Mint. 4:29, 31) Nakambe ku laveka ku tinyiketela leswaku hi tirhisa nkarhi ni swilo leswi hi nga na swona ensin’wini.—Mint. 20:24.
4. Ha yini hi fanele hi tinyika nkarhi wo kambisisa swikombiso leswi vekiweke hi vaprofeta va Yehovha?
4 Nkarhi ni nkarhi loko hi hlaya mhaka yo karhi malunghana ni un’wana wa vaprofeta va Yehovha, hi ta vuyeriwa loko hi titeka hi ri eka swiyimo sweswo. Tivutise: ‘Xana a ndzi ta angula njhani? Xana ndzi nga ti tekelela njhani timfanelo takwe letinene evuton’wini bya mina?’ (Hev. 6:11, 12) Swihloko leswi nga ta va kona eka Vutirheli Bya Hina Bya Mfumo swi ta hlamusela tidyondzo ta nkoka leti hi nga ti dyondzaka eka vaprofeta vo tshemba va Yehovha.