Tirhisa Web Site Ya Hina Leswaku U Dyondzisa Vana Va Wena
1. Hi xihi xikongomelo xa xiyenge lexi nga ni nhloko-mhaka leyi nge, “Vana” xa Web site ya hina?
1 Web site ya hina ya jw.org, yi endleriwe ku koka rinoko ra vanhu hinkwavo. Xiyenge xa Web site lexi nga ni nhloko-mhaka leyi nge, “Vana” (nghena eka lexi nge, Tidyondzo Ta Bibele > Vana) xi pfuna vana lavatsongo ni vatswari va vona leswaku va va vanghana ni ku tlhela va tshinela ekusuhi na Yehovha. (Det. 6:6, 7) Xana u nga xi tirhisa njhani xiyenge lexi leswaku u dyondzisa vana va wena?
2. Xana u nga ri hlawula njhani rungula leri faneleke leswaku u ta dyondza ni vana va wena?
2 Pfumelelana Ni Swiyimo: N’wana ha un’we u ni swilaveko swakwe. (1 Kor. 13:11) Kutani, xana u nga ri hlawula njhani rungula leri faneleke leswaku u ta dyondza ni vana va wena? Tivutise: ‘I yini leswi nga ta tsakisa vana va mina? Xana va ta swi twisisa ku fikela kwihi? Xana va ta rhiya ndleve ku ringana nkarhi wo tanihi kwihi eka rungula leri dyondziwaka? Eka vana lava nga ni malembe ya nharhu kumbe ehansi ka wona, u nga bula na vona hi switori leswi nga ehansi ka nhloko-mhaka leyi nge, “Tidyondzo Ta Mina Ta Bibele.” Mindyangu yin’wana yi tiphina hi switori swa Bibele leswi nga eka xiyenge lexi nge, “Dyondzisa Vana Va Wena.” Nakambe, xiya tinhla leti landzelaka.
3. Xana vatswari va nga swi tirhisa njhani switori ni mintlango leswi kumekaka ehansi ka nhloko-mhaka leyi nge, “Mintlango Ya Vugandzeri Bya Ndyangu” hi ndlela leyi humelelaka?
3 Mintlango Ya Vugandzeri Bya Ndyangu: Mintlango leyi yi pfuna tinhloko ta mindyangu leswaku ti dyondza ni vana va tona. Tlilika batheni leyi nge kopa kutani u hlaya ehansi ka nhloko-mhaka leyi nge, “Nkongomiso eka Vatswari” eka ntlango ha wun’we leswaku mi dyondza ndlela yo tirhisa switori ni mintlango. Tirhisa mintlango ya swifaniso yo tanihi matluka yo pendela leswaku u dyondzisa vana lavatsongo. Pfuna vana va wena lavakulu ku hlaya mintlango hinkwayo va yi heta. Ntlango ha wun’we wa fambisana ni tidyondzo ta Bibele, kutani vana va malembe yo hambana-hambana va nga hlanganyela eka mintlango leyi fanaka ya vugandzeri bya ndyangu.
4. I yini leswi kumekaka eka xiyenge lexi nge, “Vana Munghana Wa Yehovha”?
4 Vana Munghana Wa Yehovha: Tivhidiyo, tinsimu ni mintlango leswi nga eka Web site ya hina swi pfuna vatswari leswaku va dyondzisa vana va vona lavatsongo Rito ra Xikwembu. (Det. 31:12) Vhidiyo yin’wana ni yin’wana yo koma ya tiphophayi yi dyondzisa dyondzo ya nkoka. Mintlango yo tanihi ku lava mintlango yi kandziyisa nkoka wa tidyondzo teto. Tanihi leswi vana va rhandzaka ku yimbelela—naswona tinsimu ta va pfuna leswaku va tsundzuka leswi va swi dyondzeke—tinsimu ta Mfumo ni tinsimu leti tsaleriweke vana ta kumeka nkarhi na nkarhi.
5. Ha yini vatswari va fanele va kombela Yehovha leswaku a va pfuna va dyondzisa vana va vona ntiyiso?
5 Vatswari, Yehovha u lava leswaku mi va vamanana na vatatana lava humelelaka. Kutani n’wi kombeleni leswaku a mi pfuna ku dyondzisa vana va n’wina ntiyiso. (Vaav. 13:8) Hi ku pfuniwa hi Yehovha, mi nga letela vana va n’wina leswaku va ‘tlhariha leswaku va ta pona hi ripfumelo mayelana na Kreste Yesu.’—2 Tim. 3:15; Swiv. 4:1-4.