Ku Sukela Hi January 6 Hi Ta Dyondza Buku Leyi Nge, Tshinela Eka Yehovha
1. Ku sukela hi January 6, hi ta dyondza buku yihi leyi nga ta hi pfuna leswaku hi tshinela eka Yehovha?
1 Yehovha u lava leswaku hi tshinela eka yena. (Yak. 4:8) Leswaku hi kota ku endla tano, ku sukela hi January 6, hi ta dyondza buku leyi nge, Tshinela Eka Yehovha eka Dyondzo ya Bibele ya Vandlha. Malunghana ni xikongomelo xa buku leyi, tluka ro sungula ri te: “Loko ho ehleketisisa hi ndlela leyi Yehovha a yi tirhisaka ha yona mfanelo yin’wana ni yin’wana yakwe, hi vona ndlela leyi Yesu Kreste a ti tekeleleke ha yona timfanelo leti hilaha ku hetisekeke, ni ku tiva ndlela leyi na hina hi nga ti hlakulelaka ha yona, sweswo swi ta hi tshineta ekusuhi ni Xikwembu.” Mavandlha ma tshame ma yi dyondza buku leyi hi 2004 na 2005. Kambe, ku ni vahuweleri va kwalomu ka timiliyoni timbirhi lava amukeleke ntiyiso endzhaku ka malembe wolawo naswona va ta va vo sungula ku tlhuvutsa timfanelo ta Yehovha leti rhandzekaka. Eka lava va tshameke va yi dyondza buku leyi, loko va tlhela va yi hlaya swi ta va pfuna leswaku va ti tlangela swinene timfanelo ta Yehovha.—Ps. 119:14.
2. Yi ta dyondziwa njhani buku leyi nge, Tshinela Eka Yehovha?
2 Ndlela Leyi Yi Nga Ta Dyondziwa Ha Yona: Makwerhu la nga ta yi fambisa u ta sungula hi xingheniso xo koma. Buku leyi a yi kombisi leswaku hi wahi matsalwa lama faneleke ma hlayiwa, hikwalaho hi nkarhi wa dyondzo loyi a yi fambisaka u ta hlawula matsalwa-nkulu lama nga ta hlayiwa. Emakumu ka dyondzo ha yin’we ku nga ha vutisiwa xivutiso xin’we kumbe swimbirhi swa mpfuxeto. Loko dyondzo yi katsa ni bokisi leri nge, “Swivutiso Swo Gayela Ha Swona,” ri fanele ri tirhisiwa ku endla mpfuxeto ha rona. Loko nkarhi wu ri kona, loyi a yi fambisaka a nga hlela leswaku matsalwa man’wana lama nga eka bokisi ma hlayiwa kutani a vutisa swivutiso swa le tlhelo leswaku vayingiseri va ta hlamula.
3. Loko hi ri karhi hi dyondza buku leyi, hi fanele hi endla yini naswona ha yini?
3 Vuyeriwa Hi Xitalo: Lunghiselela ka ha ri emahlweni hambiloko u tshame u yi dyondza buku leyi. Hlanganyela eku hlamuleni tanihi leswi leswi swi nga ta yisa ku dzuneka eka Yehovha, swi ku pfuna leswaku u tsundzuka rungula leri dyondziweke ni ku khutaza van’wana lava nga kona. (Ps. 35:18; Hev. 10:24, 25) Loko u ri karhi u anakanyisisa hi timfanelo ta Yehovha leti tlakukeke u ta tshinela swinene eka yena. (Ps. 77:11-13) Naswona u ta tiyimisela ku yingisa swileriso swa yena u tlhela u susumeteleka ku n’wi twarisa eka van’wana.—Ps. 150:1-6.