Vuyeriwa Hi Ku Dyondza Buku Leyi Nge Tshinela Eka Yehovha
1 Eka Ntsombano wa Muganga wa “Vachumayeri Va Mfumo Lava Hisekaka,” hi tsakile loko hi amukela buku leyi nge Tshinela Eka Yehovha. Van’wana a va kalanga va yima-yima, va hlaye buku leyi loko va yi kuma. Van’wana lava engetelekeke va nga ha va va khutaziwe hi ndzimana ya lembe ya 2003 leyi nge: “Tshinelani eka Xikwembu, kutani xi ta tshinela eka n’wina.”—Yak. 4:8.
2 Hi March hi ta sungula ku dyondza buku leyi nge Tshinela Eka Yehovha eka Dyondzo ya Buku ya Vandlha. Hi nga endla yini leswaku hi vuyeriwa swinene eka dyondzo leyi? Ku lunghiselela i swa nkoka. Ndzima yin’wana ni yin’wana yi ta heta mavhiki mambirhi, ku ta va ni tindzimana titsongo leti dyondziwaka vhiki na vhiki. Leswi swi ta mi nyika nkarhi wa ku tiphofula hi leswi mi swi dyondzeke ni leswi mi swi kumeke loko mi anakanyisisa hi dyondzo leyi. Ku engetela kwalaho, loko ku dyondziwa xiphemu xo hetelela xa ndzima, ku ta va ni tindzimana tintsongo swinene leswaku ku ta kumiwa nkarhi wa ku kambisisa nchumu wo hlawuleka eka buku leyi.
3 Ku sukela eka ndzima 2, ku ni bokisi leri nge “Swivutiso Swo Gayela Ha Swona” eku heleni ka ndzima yin’wana ni yin’wana. Endzhaku ko bula hi ndzimana yo hetelela ya ndzima yo karhi, mulanguteri wa dyondzo ya buku u ta tlulela eka bokisi, leswaku ku buriwa ha rona. U ta vutisa swirho swa ntlawa, leswaku swi boxa leswi swi swi kumeke loko swi anakanyisisa hi Matsalwa lawa. (Swiv. 20:5) Ku tlhandlekela eka swivutiso leswi nga eka bokisi leri, minkarhi yin’wana a nga ha vutisa swivutiso swo tanihi leswi: “Xana rungula leri ri ku byela yini hi Yehovha? Xana ri byi khumba njhani vutomi bya wena? Xana u nga ri tirhisa njhani leswaku u pfuna van’wana?” Xikongomelo xakwe ku ta va ku ri ku lava ndlela leyi va titwaka ha yona, ku nga ri ku tikisela ntlawa hi vuxokoxoko lebyi nga pfuniki nchumu.
4 Buku leyi nge Tshinela Eka Yehovha yi hlawulekile. Hambileswi tibuku hinkwato ta “hlonga ro tshembeka ni ro tlhariha” ti kwetsimisaka Yehovha, buku leyi yi vulavula ntsena hi timfanelo ta Yehovha. (Mat. 24:45-47) Hi ta tiphina swinene! Hi ta vuyeriwa swinene hi ku dyondzo vumunhu bya Yehovha hi vuenti. Onge dyondzo leyi yi nga hi pfuna leswaku hi tshinela eka Tata wa hina wa le tilweni naswona onge hi nga humelela eku pfuneni ka van’wana leswaku va endla leswi fanaka.