Ku Dyondza Buku Leyi Nge Gandzela Xikwembu

Buku leyi nge Gandzela Xikwembu Xi Ri Xin’we Xa Ntiyiso yi endleriwe ku dyondza ni vanhu lava va ha ku hlanganyelaka loko va heta ku dyondza buku leyi nge Vutivi. Ku dyondza buku leyi eka Dyondzo ya Buku ya Vandlha swi ta hi hlomisela ku tirhisa xitirho lexi evutirhelini bya nsimu naswona swi ta hi pfuna ku kurisa rirhandzu ra hina hi Yehovha ni nhlengeletano yakwe. Xana hi nga vuyeriwa njhani hi xitalo loko hi dyondza buku leyi nge Gandzela Xikwembu?

Ndlela Yo Fambisa Dyondzo: Tanihi leswi hi nga ta dyondza ndzima hinkwayo vhiki rin’wana ni rin’wana, valanguteri va dyondzo ya buku va fanele va tirhisa nkarhi hi vutlhari. Va fanele hatlisisa dyondzo eka tindzimana to sungula, leswaku ku ta va ni nkarhi lowu engetelekeke wo kambisisa tinhla ta nkoka, leti hakanyingi ti kumekaka eku heleni ka ndzima. Ku bula hi bokisi ra mpfuxeto eku heleni ka dyondzo yin’wana ni yin’wana, swi ta pfuna vayingiseri ku tsundzuka tinhla ta nkoka.

Kwalomu ka hafu ya tindzima ta buku leyi, leyi nge Gandzela Xikwembu, ti ni swivutiso swo anakanyisisa ha swona ni swa ku bula ha swona leswi sungulaka endzeni ka layini. Xikombiso xa leswi xi kumeka eka matluka 48-9. A swi bohi leswaku *swivutiso swo tano swi hlayiwa loko ku hlayiwa tindzimana. Loko mi bula ha swona tanihi ntlawa, mulanguteri u fanele a tiyiseka leswaku matsalwa lama kombisiweke ma hlayiwa ku tlhela ku buriwa ha wona loko nkarhi wu pfumela.

Ku Lunghiselela Ka Ha Ri Emahlweni: Ku lunghiselela dyondzo kahle a hi ku khwatihata tinhlamulo ntsena. Ku anakanyisisa hi matsalwa lama kombisiweke swi ta hi pfuna leswaku hi nga lunghiseleli tinhlamulo ntsena kambe xa nkoka ngopfu, hi lunghiselela timbilu ta hina. (Ezra 7:10) Hinkwerhu ka hina hi nga swi kota ku khutaza van’wana hi ku nyikela tinhlamulo ta hina hi ku komisa.—Rhom. 1:11, 12.

Ku dyondza ka hina buku leyi nge Gandzela Xikwembu swi ta hi pfuna leswaku hi tshinela ekusuhi na Yehovha naswona swi ta hi hlomisela ku pfuna lava nga ni timbilu letinene leswaku va hlanganyela na hina eku n’wi gandzeleni. (Ps. 95:6; Yak. 4:8) Onge hinkwerhu ka hina hi nga vuyeriwa swinene eka lunghiselelo leri lerinene ra moya.