Bokisi Ra Swivutiso
◼ I yini leswi vana va faneleke va dyondzisiwa swona leswaku va ta wupfa hi tlhelo ra moya?
Vatswari lava nga Vakreste va tirha hi matimba leswaku va kurisa vana va vona “hi ku tshinya ni nkongomiso wa mianakanyo wa Yehovha.” (Efe. 6:4) Hi xikombiso, vatswari va kume leswaku swa pfuna ku hlaya ndzimana ya siku ni vana va vona mixo wun’wana ni wun’wana. Hi nkarhi wa vugandzeri bya ndyangu ni hi minkarhi yin’wana, mindyangu yi nga ha hlalela vhidiyo swin’we ivi yi bula ha yona, yi vulavula hi rungula ro karhi leri nga eka swihloko leswi nge Vantshwa Va Vutisa, yi encenyeta rungula ro karhi ra le Bibeleni kumbe yi endla minkombiso. Hambiswiritano, leswaku vana va ‘chivirikela eku wupfeni,’ va fanele va tlhela va dyondzisiwa ntiyiso lowu dzikeke wa le Bibeleni.—Hev. 6:1.
Anakanya hi leswi hi swi dyondzisaka lava hi va kumaka ensin’wini. Eka riendzo ro sungula kumbe leri landzelaka, hi ntolovelo hi tikarhatela ku sungula dyondzo ya Bibele hi tirhisa buku leyi nge Xana Bibele Yi Dyondzisa Yini Hakunene? Loko hi hete buku yoleyo, hi tirhisa leyi nge “Tihlayiseni eRirhandzwini Ra Xikwembu.” Ha yini? Buku leyi nge Leswi Bibele Yi Swi Dyondzisaka yi endla leswaku swichudeni swi va ni vutivi bya xisekelo bya Matsalwa. Buku leyi nge ‘Rirhandzu Ra Xikwembu’ yi swi dyondzisa ndlela yo tirhisa milawu ya Bibele siku ni siku. Ku dyondza tibuku toleto hatimbirhi swi pfuna vanhu lavantshwa leswaku va “dzima timitsu” eka Kreste ni ku “tiyisiwa eripfumelweni.” (Kol. 2:6, 7) Xana tibuku toleto a ti nge va pfuni ni vana va hina? Na vona va fanele va dyondzisiwa hi nkutsulo, Mfumo ni xiyimo xa vafi. Vana va fanele va tlhela va swi tiva leswaku ha yini Xikwembu xi pfumelela ku xaniseka ni leswaku va nga ma vona njhani masiku yo hetelela ya mafambiselo lawa ya swilo. Va fanele va khorwiseka leswaku Timbhoni ta Yehovha ti ni ntiyiso. Vana na vona va fanele va twisisa milawu ya le Bibeleni ni ndlela yo letela “matimba ya vona ya ku twisisa.” (Hev. 5:14) Vatswari va fanele va ma tekela enhlokweni malembe ya vana va vona ni ndlela leyi vana va vona va twisisaka ha yona. Hambiswiritano, vana vo tala va kota ku dyondza ntiyiso lowu dzikeke wa le Bibeleni hambiloko va ha ri vatsongo swinene.—Luka 2:42, 46, 47.
Leswaku ku pfuniwa vatswari, eka jw.org ku ta va ni swilo swo pfuneta ku dyondza leswi sekeriweke ebukwini leyi nge Leswi Bibele Yi Swi Dyondzisaka. Mindyangu yi nga swi kuma eka Web site ya hina hi ku languta ehansi ka nhloko-mhaka leyi nge TIDYONDZO TA BIBELE > VANTSHWA. Enkarhini lowu taka, ku ta lunghiseleriwa swilo swo pfuneta ku dyondza leswi engetelekeke leswi sekeriweke ebukwini leyi nge ‘Rirhandzu Ra Xikwembu.’ Ni tibuku tinene ti nga tirhisiwa. Vatswari va nga tiendlela xiboho xa loko va ta tirhisa rungula leri hi nkarhi wa Vugandzeri bya vona bya Ndyangu bya nimadyambu, loko va fambisa dyondzo ni n’wana un’wana wa vona kumbe loko va dyondzisa n’wana ku tiendlela dyondzo ya munhu hi yexe.