N’hweti Ya August Yi Ta Va Yo Hlawuleka!

1. I tsima rihi ro hlawuleka leri nga ta endliwa emisaveni hinkwayo leswi hi nga le kusuhi ni lembe ra vu-100 ra ku fuma ka Mfumo wa Xikwembu?

¹ Lembe ra vu-100 ra ku velekiwa ka Mfumo wa Xikwembu ri tshinele. Swi fanerile leswaku hi dzunisa Yehovha hi ku hlanganyela eka tsima ro hlawuleka! Hi August hi ta hlanganyela eka tsima leri nga ta endliwa emisaveni hinkwayo ro fambisa xiphephana lexintshwa lexi nga ni nhloko-mhaka leyi nge, Hi Nga Ti Kuma Kwihi Tinhlamulo Ta Swivutiso Swa Nkoka eVuton’wini? Xiphephana lexi xi khutaza vahlayi va xona leswaku va lavisisa tinhlamulo ta kona eBibeleni xi tlhela xi hlamusela ndlela leyi jw.org yi nga va pfunaka ha yona.

2. Hi nga hlanganyela njhani hi August eku ‘huweleleni lokukulu, hi dzunisa Yehovha’?

² Ku Huwelela Swinene Hi Dzunisa: Ku endliwe lunghiselelo ro hlawuleka leswaku ku pfuniwa muhuweleri un’wana ni un’wana la navelaka ku teka vuphayona bya nkarhinyana hi n’hweti ya August, leswaku a tirha nkarhi lowu engetelekeke ensin’wini. Hi n’hweti yoleyo, vahuweleri lava khuvuriweke va ta pfumeleriwa ku teka vuphayona bya nkarhinyana va vika tiawara ta 30. Leswi August yi nga ni Ravuntlhanu, Migqivela ni Tisonto ta ntlhanu, vahuweleri vo tala lava tirhaka ntirho wo tihanyisa kumbe lava nghenaka xikolo exikarhi ka vhiki va ta kota ku teka vuphayona bya nkarhinyana. Loko u ri ni xichudeni xa Bibele lexi fanelekaka ku va muhuweleri kumbe n’wana la lavaka ku va muhuweleri, namba u vulavula ni muhlanganisi wa huvo ya vakulu. Hakunene swi ta khutaza loko vanhu vo tano va hi joyina va va vahuweleri hi n’hweti leyi yo hlawuleka! Hambileswi maphayona yo tala ya nkarhi hinkwawo ma yaka eku wiseni hi August endzhaku ka loko ma hlanganise tiawara leti ma faneleke ma tihlanganisa hi lembe, ma nga ha swi kota ku cinca xiyimiso xa wona leswaku ma ta hlanganyela hi xitalo eka tsima leri ro hlawuleka. Mindyangu yi fanele yi namba yi sungula sweswi ku bula hi ndlela leyi yi nga hoxaka xandla ha yona hi August eku ‘huweleleni lokukulu, yi dzunisa Yehovha.’—Ezra 3:11; Swiv. 15:22.

3. I yini lexi hi nga ni ntshembo wa xona malunghana ni tsima leri ro hlawuleka?

³ Hambileswi hi tshameke hi hlanganyela eka matsima yo fana ni leri enkarhini lowu hundzeke, hi tshemba leswaku leri ri ta va ri hlawulekile. Xana hi nga fikelela nhlohlorhi leyintshwa ya tiawara, ya vahuweleri ni ya maphayona ya nkarhinyana hi August? Loko hi gimeta lembe ra ntirho ra 2014, onge Yehovha a nga katekisa matshalatshala ya vanhu vakwe emisaveni hinkwayo yo endla leswaku n’hweti ya August yi va yo hlawuleka swinene ku tlula hinkwato entirhweni wo chumayela!—Mat. 24:14.