Xana Ndzi Languteka Njhani eMahlweni Ka Yehovha?
1. Bibele yi fana njhani ni xivoni?
1 U tilanguta kangani exivonini? Vo tala va hina hi tilanguta siku ni siku hikuva xi hi pfuna ku vona laha hi faneleke hi lunghisa kona eka ndlela leyi hi langutekaka ha yona. Bibele yi fanisiwe ni xivoni. Ku hlaya Rito ra Xikwembu swi endla hi kota ku vona leswi hi nga swona endzeni, ku nga munhu loyi Yehovha a langutaka yena. (1 Sam. 16:7; Yak. 1:22-24) Rito ra Xikwembu ri nga “twisisa miehleketo ni makungu ya mbilu.” (Hev. 4:12) Ku hlaya ni ku anakanyisisa hi leswi hi swi hlayaka eBibeleni siku ni siku, swi nga hi pfuna njhani ku vona laha hi faneleke hi lulamisa kona, leswaku hi ta va vavuri va evhangeli lava kotaka ku chumayela kahle?—Ps. 1:1-3.
2. Bibele yi nga hi pfuna njhani ku tikambisisa?
2 Endla Bibele Yi Va Xivoni Xa Wena: Marungula ya le Bibeleni ya malandza yo tshembeka ya Yehovha ma hi dyondzisa leswaku hi tihi timfanelo leti a ti rhandzaka. Hi xikombiso, Davhida u hisekele vito ra Xikwembu. (1 Sam. 17:45, 46) Esaya hi xivindzi u tinyiketele ku ya chumayela ensin’wini yo tika. (Esa. 6:8, 9) Ndlela leyikulu leyi Yesu a a rhandza Tata wakwe wa le tilweni ha yona yi n’wi susumetele ku teka ntirho wo chumayela tanihi lowu phyuphyisaka ni lowu enerisaka, ematshan’weni yo wu teka tanihi ndzhwalo lowu nga tsakisiki. (Yoh. 4:34) Vakreste va le minkarhini ya vaapostola va chumayele hi ku hiseka, va titshega hi Yehovha naswona a va tiyimisele ku nga tshiki. (Mint. 5:41, 42; 2 Kor. 4:1; 2 Tim. 4:17) Ku anakanyisisa hi swikombiso swo tano swi hi pfuna ku tikambisisa hi xikongomelo xo antswisa ndlela leyi hi wu endlaka ha yona ntirho wa hina wo kwetsima.
3. Ha yini hi fanele hi hatla hi endla mindzulamiso leyi faneleke?
3 Lulamisa Swihoxo: A swi nge hi pfuni nchumu ku languta exivonini ivi hi nga endli nchumu hi swihoxo leswi hi swi voneke. Hi nga kombela Yehovha a hi pfuna leswaku hi tivona hi ndlela leyinene ni ku hi pfuna leswaku hi endla mindzulamiso leyi faneleke. (Ps. 139:23, 24; Luka 11:13) Leswi nkarhi lowu saleke wu nga wutsongo ni vutomi byi nga le khombyeni, hi fanele hi hatla hi endla mindzulamiso leyi lavekaka.—1 Kor. 7:29; 1 Tim. 4:16.
4. Ku humelela yini hi munhu la kambisisaka Rito ra Xikwembu ivi a teka goza ro lulamisa swihoxo leswi a swi xiyeke?
4 Leswi munhu a nga swona endzeni, ku nga leswi Yehovha a langutaka swona, i swa nkoka swinene ku tlula ndlela leyi a langutekaka ha yona. (1 Pet. 3:3, 4) Ku humelela yini hi munhu la kambisisaka Rito ra Xikwembu ivi a teka goza ro lulamisa swihoxo leswi a swi xiyeke? ‘A nga vangi mutwi loyi a rivalaka, kambe u ve muendli wa ntirho, naswona u ta tsaka eku wu endleni kakwe.’ (Yak. 1:25) Hi ta va vatirheli lava tsakeke ni lava nga ni vuswikoti hikuva hi “vonakarisa ku vangama ka Yehovha.”—2 Kor. 3:18.