Tirhisa jw.org Loko U Ri eNsin’wini

Web site ya hina yi pfuna swinene eku chumayeleni ka mahungu lamanene “ku ya fika endhawini ya le kule swinene ya misava.” (Mint. 1:8) Vini va miti vo tala a va yi tivi jw.org. Va sungula ku twa hi yona endzhaku ka loko muhuweleri a va byele hi yona. Hambiswiritano, loko u nga si tirhisa xitirhisiwa xa wena xa elektroniki ensin’wini, rhanga u xiyisisa loko swi nga ri na khombo ku xi tirhisa. Vana ni vuxiyaxiya etindhawini leti ku nga ni vugevenga swinene. Loko u nga ri na xona xitirhisiwa xa elektroniki, u nga ha kombela n’wini wa muti hi vukheta loko a nga swi tsakela leswaku u nghena eka jw.org hi xitirhisiwa xa yena xa elektroniki.

Mulanguteri wa muganga u kope vhidiyo leyi nge Ha Yini U Fanele U Dyondza Bibele? eka foni ya yena, naswona u komba munhu un’wana ni un’wana loko nkarhi wu n’wi pfulekela. Hi xikombiso, loko a chumayela hi yindlu ni yindlu, u ri: “Ndzi endze swa xinkarhana leswaku ndzi pfuna vanhu va kuma tinhlamulo ta swivutiso swinharhu swa nkoka leswi nge: Ha yini misava yi ri ni swiphiqo swo tala swinene? Xikwembu xi ta swi lulamisa njhani? Hi nga langutana njhani na swona sweswi? Vhidiyo leyi yo koma ya swi hlamula swivutiso swoleswo.” U namba a yi tlanga, ivi a vona leswaku n’wini wa muti u ta endla yini. Vhidiyo leyi yi koka rinoko lerova vanhu vo tala va yi hlalela yi kala yi hela. Endzhaku ka sweswo mulanguteri wa muganga u ri: “U swi twile leswaku u nga endla xikombelo xo dyondzeriwa Bibele eka Internet. Leswi ndza ha riki kwala, ndzi nga namba ndzi ku kombisa sweswi ndlela leyi yi dyondziwaka ha yona.” Loko n’wini wa muti a pfumela, u n’wi komba ndlela leyi ku dyondziwaka ha yona a tirhisa broxara leyi nge Mahungu Lamanene. Loko n’wini wa muti a nga ri na nkarhi, u endla malunghiselelo yo n’wi komba enkarhini lowu taka. Loko a ya exitolo xo xavisa kofi leswaku a ya wisanyana, u vula leswi fanaka eka munhu la tshameke ekusuhi na yena endzhaku ko va ni bulo lerinene na yena. Xana wa yi tirhisa jw.org loko u ri ensin’wini?