Khutazanani Ku Endla Mintirho Leyinene Hi Ku Hiseka

Vaheveru 10:24 yi hi khutaza leswaku hi “[khathalelana] leswaku hi khutazana erirhandzwini ni le mintirhweni leyinene.” Hi nga khutaza vamakwerhu hi ku va xikombiso lexinene ni hi ndlela leyi hi kombisaka ripfumelo ha yona. Byela van’wana evandlheni mintokoto ya wena leyi tsakisaka. Va endle va vona ntsako lowu u wu kumaka hi ku tirhela Yehovha. Hi nkarhi lowu fanaka, papalata ku va ringanisa na wena kumbe ni van’wana. (Gal. 6:4) Tirhisa vuswikoti bya wena ku khutaza van’wana “erirhandzwini ni le mintirhweni leyinene,” ematshan’weni yo va endla va tivona nandzu. (Vona buku leyi nge, Xikolo Xa Vutirheli tl. 158, ndzim. 4.) Loko hi khutazana erirhandzwini, kutani mintirho leyinene—yo tanihi ku endlela van’wana leswinene hi tlhelo ra nyama kumbe hi ku va chumayela—yi ta landzela.—2 Kor. 1:24.