Minhlangano Yi Hi Susumetela Ku Endla Mintirho Leyinene
1 Swiyenge swimbirhi swa nkoka evugandzerini bya hina i ku va kona eminhlanganweni ya vandlha ni ku hlanganyela entirhweni wa nsimu. Swilo leswimbirhi swa fambisana. Xin’wana xi nyika lexin’wana matimba. Minhlangano ya Vukreste yi hi susumetela ku endla mintirho leyinene, lowu nga wunene ngopfu i ku chumayela hi Mfumo ni ntirho wa ku endla vadyondzisiwa. (Hev. 10:24) Loko ho tshika ku ya eminhlanganweni, hi ku hatlisa hi nga ha tshika ku chumayela hikuva hi ta va hi nga khutaziwi ku endla tano.
2 Eminhlanganweni ya vhiki na vhiki, hi kuma ndzetelo wa moya lowu endleriweke ku hi susumetela ku chumayela. Hi hambeta hi tsundzuxiwa hi minkarhi leyi ya xihatla, leswi hi susumetelaka ku yisa rungula ra Bibele leri nyikaka vutomi eka van’wana. Hi khutaziwa ni ku tiyisiwa leswaku hi tiyisela entirhweni wa ku chumayela. (Mt. 24:13, 14) Hi ku tirhisa lunghelo ro hlamula eminhlanganweni, hi sungula ku tolovelana swinene ni ndlela yo phofula ripfumelo ra hina emahlweni ka van’wana. (Hev. 10:23) Hi ku tsarisa eXikolweni xa Vutirheli bya le Tilweni, hi kuma ndzetelo wa ku va vatirheli lava humelelaka swinene ni ku antswisa vutshila bya hina bya ku dyondzisa.—2 Tim. 4:2.
3 Ndlela Leyi Minhlangano Ya Ntirho Yi Hi Susumetelaka Ha Yona Ku Chumayela: Hinkwerhu ka hina hi khutaziwa ku lunghiselela rungula leri nga eka Vutirheli Bya Hina Bya Mfumo ka ha ri emahlweni. Kutani rungula leri ra tshama emianakanyweni ya hina loko hi va kona eNhlanganweni wa Ntirho ni ku vona swingheniso swi kombisiwa exitejini. Loko hi ri entirhweni wa nsimu, hi nga tirhisa Vutirheli Bya Hina Bya Mfumo, hi titsundzuxa swingheniso leswi kombisiweke, kutani hi nyikela vumbhoni lebyi humelelaka swinene. Vahuweleri vo tala va swi endlile leswi.
4 Tanihi ndlela yo tirhisa leswi dyondziweke eNhlanganweni wa Ntirho, van’wana va kunguhata ka ha ri emahlweni leswaku va ta famba swin’we evutirhelini. Hi nkarhi wolowo vahuweleri va va va ha ti tsundzuka kahle tinhla to ti tirhisa ensin’wini naswona va susumeteleka ku ti tirhisa hikuva minhlangano leyi yi va khutaze ku hlanganyela entirhweni wo chumayela vhiki rin’wana ni rin’wana.
5 Swa hi boha ku ya eminhlanganweni ya Vukreste, laha hi hlengeletanaka kona ni vagandzeri-kulorhi ni laha hi khutazanaka kona ku endla mintirho leyinene. Leswaku vutirheli bya hina byi va ni mihandzu, hi fanele hi va kona eminhlanganweni ya vandlha nkarhi na nkarhi. Onge hi nga kombisa ku tlangela lunghiselelo leri ro hlamarisa leri humaka eka Yehovha hi ku ka “hi nga tshiki ku hlengeletana.”—Hev. 10:25.