Xana U Tilunghiselela Ku Va Kona eXitsundzuxweni?

A ku ri Nisani 13 hi 33 C.E. Yesu a a swi tiva leswaku a a salele hi madyambu man’we yo hetelela leswaku a va ni vanghana vakwe lavakulu loko a nga si dlayiwa. A a ta tlangela Paseka ya yena yo hetelela na vona ivi endzhaku ka sweswo a simeka nkhuvo lowuntshwa, ku nga Xilalelo xa Hosi. Xiendlakalo xexo xa nkoka a xi lava leswaku ku endliwa malunghiselelo. Hikwalaho, u rhume Petro na Yohane leswaku va endla malunghiselelo ya kona. (Luka 22:7-13) Ku sukela hi nkarhi wolowo, lembe ni lembe Vakreste lava lavaka ku va kona eXitsundzuxweni va fanele va tilunghiselela ku va kona eka xiendlakalo lexi. (Luka 22:19) Hi swihi swilo swa nkoka leswi hi faneleke hi swi endla leswaku hi lunghekela Xitsundzuxo lexi nga ta va kona hi April 3?

Malunghiselelo Lama Endliwaka Hi Vakulu:

Endlani malunghiselelo yo tirhisa Holo ya Mfumo kumbe ndhawu yin’wana leyi fanelekaka. Yi fanele yi va ni switulu leswi ringaneke, mavoni lama voningaka kahle naswona ku nghena moya lowu ringaneke. Endlani malunghiselelo ya leswaku yi basisiwa kahle ka ha ri ni nkarhi.
Hlawulani xivulavuri lexi fanelekaka, mutshamaxitulu la fanelekaka ni vamakwerhu lava fanelekaka lava nga ta khongelela swifanekiselo.
Loko ndhawu yoleyo yi ta tirhisiwa hi mavandlha yo hlayanyana, mi fanele mi twanana hi mikarhi leyi mi nga ta sungula ha yona ni ndlela leyi ku nga ta ngheniwa ku tlhela ku humiwa ha yona emuakweni lowu nga ta tirhisiwa swin’we ni le ndhawini leyi ku nga ta va ku pakiwe timovha eka yona.
Hlawulani vamakwerhu lava nga ta va varindzi ni lava nga ta fambisa swifanekiselo, mi tlhela mi va hlela hi ku ya hi mintirho leyi va nga ta yi endla.
Hlelani leswaku ku va ni swifanekiselo leswi faneleke, swin’we ni tipuleti, tinghilazi ta vhinyo, tafula leri faneleke ni nguvu yo funengeta tafula.

Malunghiselelo Lama Endliwaka Hi Vahuweleri:

Hlelani leswaku mi tirha hilaha mi nga kotaka hakona eka tsima ro fambisa swirhambo swa Xitsundzuxo.
Tsalani mavito ya swichudeni swa n’wina swa Bibele, maxaka, lava mi nghenaka na vona xikolo, vatirhikuloni ni van’wana lava mi va toloveleke, kutani mi va rhamba.
Hlayani mi tlhela mi anakanyisisa hi ku hlaya ka Bibele ka Xitsundzuxo.
Tanani eXitsundzuxweni mi lunghekele ku amukela vaendzi.