Lunghiselela Xitsundzuxo Hi Mbilu Leyi Tsakeke
1. Nguva ya Xitsundzuxo i nkarhi wo hlawuleka wo endla yini?
1 Xitsundzuxo lexi nga ta khomiwa hi Ravumbirhi, March 26 xi hi nyika nkarhi lowunene ngopfu wo tsaka hi leswi Xikwembu xi swi endleke leswaku xi hi ponisa. (Esa. 61:10) Ku va ni moya wa ntsako swi ta hi pfuna leswaku hi tilulamisela kahle, hambiloko xiendlakalo lexi xi nga si fika. Njhani?
2. I yini lexi hi susumetelaka ku endla malunghiselelo ya Xitsundzuxo?
2 Ku Lunghiselela Xitsundzuxo: Xilalelo xa Hosi i xiendlakalo xa nkoka kambe xa olova. Hambiswiritano, xi lava leswaku ku hleriwa ka ha ri emahlweni leswaku ku nga honisiwi swilo swa nkoka. (Swiv. 21:5) Ku fanele ku hlawuriwa ndhawu ni nkarhi leswi faneleke. Ku fanele ku kumiwa swifanekiselo leswi faneleke. Laha xitsundzuxo xi nga ta khomeriwa kona ku fanele ku basisiwa ku tlhela ku lunghisiwa kahle. Xivulavuri lexi hlawuriweke xi fanele xi lunghiselela kahle, naswona lava nga ta fambisa swifanekiselo ni varindzi va fanele va nyikiwa swiletelo leswi twisisekaka. A swi kanakanisi leswaku swo tala swa swilo leswi se swi endliwile. Ku tlangela nkutsulo swi hi susumetela ku xi lunghiselela kahle xiendlakalo lexi xo kwetsima.—1 Pet. 1:8, 9.
3. Hi nga endla njhani leswaku timbilu ta hina ti lunghekela Xilalelo xa Hosi?
3 Ku Lunghiselela Mbilu: Nakambe i swa nkoka ku lunghiselela timbilu ta hina leswaku hi ta twisisa nkoka wa Xitsundzuxo. (Ezra 7:10) Leswaku hi endla tano, hi fanele hi tivekela nkarhi wo fambisana ni ku hlaya ka Bibele ko hlawuleka ka nkarhi wa Xitsundzuxo, kutani hi anakanyisisa hi masiku yo hetelela ya Yesu loko a ha ri laha misaveni. Ku anakanyisisa hi moya wa Yesu wa ku tinyikela swi ta hi susumetela ku n’wi tekelela.—Gal. 2:20.
4. Hi byihi vuyelo bya nkutsulo lebyi ku endlaka u tsaka swinene?
4 Rifu ra Kreste ri lwela vuhosi bya Yehovha. Ri hi kutsula eka xidyoho ni rifu. (1 Yoh. 2:2) Ri endla leswaku hi va ni vuxaka lebyinene ni Xikwembu ri tlhela ri hi pfulela ndlela yo kuma vutomi lebyi nga heriki. (Kol. 1:21, 22) Ri tlhela ri hi pfuna ku tiyisa ku tiyimisela ka hina ku hanya hi ku pfumelelana ni ku tinyiketela ka hina eka Yehovha ni ku yima hi tiyile tanihi vadyondzisiwa va Kreste. (Mat. 16:24) Onge ntsako wa wena wu nga engeteleka loko u ri karhi u lunghiselela Xitsundzuxo lexi nga ta va kona ivi u tlhela u va kona!