Tekelela Ripfumelo Ra Vona
1. Hi yihi buku leyi hi nga ta yi dyondza eka Dyondzo ya Bibele ya Vandlha ku sukela hi vhiki ra October 19?
1 Ku sukela hi vhiki ra October 19, 2015, hi ta sungula ku hlaya buku leyi nge Tekelela Ripfumelo Ra Vona eka Dyondzo ya Bibele ya Vandlha. Buku leyi yi vulavula hi vavanuna ni vavasati va 14 va le Bibeleni lava kombiseke ripfumelo. Yi va hlamusela hi ndlela leyi hi pfunaka leswaku hi kota ku va vona hi mahlo ya mianakanyo, leswi hi pfunaka ku va vona tanihi vanhu va xiviri lava langutaneke ni miringo loko va ri karhi va tirhela Yehovha. Buku leyi yi tlhela yi hi dyondzisa tidyondzo leti hi nga kotaka ku ti tirhisa namuntlha.—Hev. 6:12.
2. Hlamusela swin’wana leswi buku leyi nge Tekelela Ripfumelo Ra Vona yi hi khomeleke swona.
2 Leswi Buku Leyi Yi Hi Khomeleke Swona: Buku leyi yi ni nkarhi wa swiendlakalo ni mimepe leyi nga hi pfunaka ku tiva leswaku munhu wo karhi u hanye rini naswona kwihi. Ku engetela kwalaho, ndzima ha yin’we yi ni bokisi leri nge “Swivutiso Swo Anakanyisisa Ha Swona . . . ,” leri nga ta hi pfuna ku anakanyisisa hi rungula ra kona kutani hi tirhisa leswi hi swi dyondzeke. Nakambe buku leyi yi ni swifaniso swo xonga swinene leswi ku endliweke vulavisisi hi vukheta loko swi nga si dirowiwa, leswi endlaka leswaku rungula leri nga kwalaho ri twisiseka.
3. I yini leswi hi nga swi endlaka leswaku hi vuyeriwa loko hi dyondza buku leyi?
3 Ndlela Leyi U Nga Vuyeriwaka Ha Yona: Papila leri humaka eka Huvo leyi Fumaka leri kumekaka eka buku yoleyo ri hi khutaza hi marito lawa: “Tirhisa mianakanyo ya wena; endla leswaku switwi swa wena swi katseka. Ringeta ku titwa hi ndlela leyi vanhu va le Bibeleni a va titwa ha yona, ku vona leswi va swi voneke. Fanisa ndlela leyi va anguleke ha yona loko swilo swi va humelela ni ndlela leyi a wu ta va u angule ha yona.” Ku tirhisa mianakanyo ya hina a swi vuli ku mbambela kambe swi vula ku swi vona hi mahlo ya mianakanyo leswi rungula leri huhuteriweke ri swi vulaka ni ku va twela vusiwana vanhu lava ku vulavuriwaka ha vona. Swi lava nkarhi ni ku anakanyisisa leswaku hi kota ku endla tano. (Neh. 8:8) Loko dyondzo ya vhiki ro karhi yi sungula exikarhi ka ndzima, mufambisi wa dyondzo u ta tirhisa 30 ku ya ka 60 wa tisekoni a pfuxeta dyondzo ya vhiki leri hundzeke. Eka dyondzo leyi ku nga riki na bokisi leri nge “Swivutiso Swo Anakanyisisa Ha Swona . . . ,” mufambisi a nga ha vutisa xivutiso xin’we kumbe swimbirhi swo pfuxeta ha swona loko a gimeta.
4. Ha yini hi fanele hi dyondza buku leyi nge Tekelela Ripfumelo Ra Vona?
4 Hi hanya emisaveni leyi siku ni siku yi lavaka ku onha kumbe ku tsanisa ripfumelo ra hina hi tindlela to hambanahambana. Buku leyi—ku katsa ni swihloko leswi kumekaka eka Xihondzo xo Rindza leswi buku leyi yi sekeriweke eka swona—i nyiko leyi humaka eka Yehovha leyi hi pfunaka ku tiyisa ripfumelo ra hina. (Yak. 1:17) A hi tikarhateleni ku va kona eka Dyondzo ya Bibele ya Vandlha minkarhi hinkwayo naswona hi hlamula hilaha hi nga kotaka hakona loko hi ri karhi hi dyondza buku leyi evandlheni.