Ndlela Yo Tirhisa Rungula Leri Yingiseriwaka Kunene
1. Ku engetela eka minkandziyiso ya hina, hi xihi xitirhisiwa xin’wana lexi hi nga na xona?
1 Vanhu vo tala va swi tsakela ku tirhisa jw.org ku hlaya marito lama tsakisaka yo lulama ya ntiyiso. (Ekl. 12:10) Xana u tshame u ri tirhisa rungula leri rhekhodiweke leri yingiseriwaka kunene? Rungula leri ri endla swi koteka ku yingisela rungula ro tala leri nga eka website ya hina. Xana rungula leri ri nga hi pfuna njhani?
2. Hi nga ri tirhisa njhani rungula leri rhekhodiweke eka dyondzo ya munhu hi yexe kumbe ya ndyangu?
2 Eka Dyondzo Ya Munhu Hi Yexe Kumbe Ya Ndyangu: Ku yingisela rungula leri rhekhodiweke ra Bibele, timagazini kumbe minkandziyiso yin’wana loko hi ri eku fambeni kumbe loko hi endla mintirho yin’wana ya siku ni siku swi ta hi pfuna leswaku hi tirhisa nkarhi wa hina hi vutlhari. (Efe. 5:15, 16) Eka vugandzeri bya hina bya ndyangu hi nga ha engetela eka leswi hi swi dyondzaka hi ku yingisela rungula ro karhi, hi ri karhi hi fambisana na rona eka tikopi ta hina. Ku yingisela rungula leri rhekhodiweke loko hi endla dyondzo ya munhu hi yexe swa pfuna, ngopfungopfu loko hi lava ku antswisa ndlela leyi hi hlayaka ha yona kumbe ku dyondza ririmi rin’wana.
3. I vamani ensin’wini ya hina lava nga vuyeriwaka hi rungula leri rhekhodiweke?
3 Loko Hi Ri eNsin’wini: Ensin’wini ya hina, vanhu lava vulaka leswaku a va nge swi koti ku hlaya nkandziyiso wo karhi hileswi va tshamaka va khomekile va nga ha swi tsakela ku yingisela rungula leri rhekhodiweke. Kumbe hi nga ha kuma lava vulavulaka ririmi rin’wana, lava nga tsakelaka rungula ra Mfumo loko vo ri twa hi “ririmi ra vona.” (Mint. 2:6-8) Etindhawini tin’wana ku yingisela i swa nkoka, i ndhavuko wa vona. Hi xikombiso, eka ndhavuko wa Mahmong, vanhu lavakulu va hlamusela lavantsongo hi ndhavuko wa vona, kutani lavatsongo va hlayisa rungula leri va byeriweke rona. Vanhu va mindhavuko yo tala laha Afrika va swi rhandza ku dyondza hi ku rungulelana switori.
4. Hi swihi swivutiso leswi hi nga tivutisaka swona malunghana ni ku pfuna vanhu ensin’wini ya hina?
4 Xana swi nga pfuna loko ensin’wini ya n’wina wo tlangela n’wini wa muti rungula leri rhekhodiweke hi ririmi ra yena? Xana van’wana va nga vuyeriwa loko wo va rhumela rungula leri rhekhodiweke hi e-mail? Xana hi nga kopa rungula leri rhekhodiwe eka CD kutani hi ri nyika n’wini wa muti la tsakelaka swin’we ni kopi ya nkandziyiso lowu rhekhodiweke? Rungula hinkwaro leri rhekhodiweke, ku nga ha va ku ri buku, broxara, magazini kumbe xiphephana, loko hi ri fambisela munhu hi fanele hi tsala eka S-4. Rungula leri rhekhodiweke ri endleriwe leswaku hi ri tirhisa eka dyondzo ya hina ya munhu hi yexe ni ku byala mbewu ya ntiyiso ya Mfumo.—1 Kor. 3:6.