Ku Hlaya Bibele Siku Ni Siku

Xana swa ku tikela ku namarhela xiyimiso xa wena xa ku hlaya Rito ra Xikwembu siku ni siku hileswi u nga ni swo tala swa ku swi endla? (Yox. 1:8) Loko swi ri tano, ringeta swin’wana swa swiringanyeto leswi:

• Veka swilo leswi nga ta ku tsundzuxa siku na siku. Seta alamu efonini ya wena leyi nga ta ku tsundzuxa ku hlaya Bibele.

• Veka Bibele ya wena erivaleni. Loko ku ve u tirhisa Bibele leyi printiweke, yi veke endhawini leyi u nga ta yi vona hi ku olova siku ni siku.—Det. 11:18.

• Yingisela tibuku ta Bibele leti rhekhodiweke. U nga yingisela Bibele loko u ri karhi u endla mitirho ya wena ya siku ni siku. Tara loyi a nga phayona tlhelo mhani loyi a tirhaka nivusiku u ri: “Ku yingisela Bibele leyi rhekhodiweke loko ndzi ri karhi ndzi endla mitirho ya le kaya, swi endla leswaku ndzi nga xi tluli xiyimiso xa mina xa ku hlaya Bibele.”

• Yi hlaye masiku hinkwawo. Loko ku nghenelela swin’wana eka xiyimiso xa wena, ringeta ku hlaya tindzimana ti nga ri tingani u nga si ya eku etleleni. Hambiloko wo hlaya tindzimana letitsongo swi ta ku pfuna.—1 Pet. 2:2.