Vantshwa Va Vutisa . . .

Xana Ndzi Nga Endla Njhani Leswaku Swi Tsakisa Swinene Ku Hlaya Bibele?

“Minkarhi yin’wana swa nonon’hwa ku twisisa Bibele, naswona sweswo swi nga ha heta munhu matimba.”—Annalieza, la nga ni malembe ya 17 hi vukhale.

“Bibele a yi ndzi phirha.”—Kimberly, la nga ni malembe ya 22 hi vukhale.

VANHU vo tala a va swi tsakeli ku hlaya. Kutani buku leyikulu ku fana ni Bibele yi nga ha vonaka yi chavisa—hambi ku ri eka lava rhandzaka ku hlaya. Tammy, la nga ni malembe ya 17 hi vukhale, u ri: “Eka mina, Bibele a ku ri buku leyikulu leyi tameleke marito lama nga tolovelekangiki, lama a ma ndzi nonon’hwela ku ma twisisa. Ku hlaya Bibele swi lava nyingiso lowukulu ni ku tiyisela.”

Ku tlula kwalaho, ntirho wa xikolo lowu endleriwaka ekaya, swintirhwana swa le kaya ni vuhungasi swi nga ha ku hetela nkarhi wo tala ni matimba. Naswona leswi swi nga endla leswaku swi ku nonon’hwela ku nyikela nyingiso ni ku tsakela ku hlaya Bibele. Alicia, la nga Mbhoni ya Yehovha, na yena u tinyika nkarhi wo tala wo lunghiselela ni ku hlanganyela eminhlanganweni ya Vukreste swin’we ni ku byela van’wana leswi a swi pfumelaka. Wa pfumela: “Swi nga ha nonon’hwa ku hlaya Bibele hikuva swi vonaka onge ku ni swo tala leswi munhu a faneleke a swi endla.”

Kambe, Alicia, Tammy ni vantshwa van’wana vo tala va swi kotile ku hlula xihinga lexi. Sweswi, va hlaya Bibele nkarhi ni nkarhi naswona va yi tsakela. Na wena u nga swi kota! Xiya swilo swinharhu leswi u nga swi endlaka leswaku u swi tsakela ku hlaya Bibele.

Tivekele Nkarhi Wo Hlaya Bibele

“Ndzi ehleketa leswaku vantshwa va vula leswaku ku hlaya Bibele ka phirha hikuva a va si yi hlaya kahle,” ku vula Kelly la nga ni malembe ya 18. Ku fana ni leswi hakanyingi u tsakelaka ntlango wo karhi lowu u tshamelaka ku wu tlanga, u ta tsakela ku hlaya Bibele loko u yi hlaya nkarhi ni nkarhi.

Kambe ku vuriwa yini hiloko u ri hava nkarhi? Muapostola Pawulo wa tsundzuxa: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.” (Vaefesa 5:15, 16) U nga “tixavela nkarhi” hi ku tirhisa nkarhi wuntsongo eka swilo leswi nga pfuniki nchumu, swo tanihi ku hlalela TV. Rito leri Pawulo a ri tirhiseke leri nge “nkarhi” ri nga ha vula nkarhi lowu vekeriweke xikongomelo xo karhi. Xana hi wihi nkarhi lowu u nga ta tivekela wona wa ku hlaya Bibele?

Vo tala va hlaya Bibele nimixo, endzhaku ka loko va langute ndzimana ya Matsalwa ni tinhlamuselo leti kumekaka eka buku leyi nge Ku Kambisisa Matsalwa Siku Ni Siku.a Van’wana va tsakela ku yi hlaya va nga si ya eku etleleni ni madyambu. Hlawula nkarhi lowu pfumelelanaka ni swiyimo swa wena naswona u endla mindzulamiso leyi lavekaka. Alicia u ri: “Ku pfumelelana ni swiyimo hi swona swi ndzi pfunaka leswaku ndzi namarhela xiyimiso xa mina xo hlaya.”

Vantshwa van’wana lava nga Vakreste va hlela 10 ku ya eka 15 wa timinete siku ni siku, ta ku hlaya Bibele. Hi ku endla tano, va swi kotile ku hlaya Bibele hinkwayo hi lembe rin’we kumbe mambirhi! Hambiloko swi ku tsandza ku endla tano, swi endle pakani ya wena ku hlaya Bibele siku ni siku. Loko u namarhela nkarhi lowu u tivekeleke wona wa ku hlaya Bibele, rirhandzu ra wena hi Rito ra Xikwembu ri ta kula.—Pisalema 119:97; 1 Petro 2:2.

Kombela Vutlharhi Hi Xikhongelo

Entiyisweni, hambi ku ri lava hlayaka Bibele nkarhi ni nkarhi va kuma swi tika ku twisisa swiyenge swin’wana swa Rito ra Xikwembu. Mutsari wa Bibele, ku nga Yehovha Xikwembu, u lava leswaku u twisisa Rito rakwe. Buku ya Mintirho yi vulavula hi mufambi wa Muetiyopiya loyi a a nga byi twisisi kahle vuprofeta lebyi nga eka Esaya ndzima 53. Wanuna loyi a a lava ku kombela mpfuno, naswona ntsumi ya Yehovha yi rhume Filipi lowa murhumiwa leswaku a n’wi hlamusela vuprofeta byebyo.—Mintirho 8:26-39.

Kutani ku hlaya Bibele loku pfunaka a ku sunguli hi ku hlaya ntsena, kambe hi xikhongelo. Van’wana va swi endla mukhuva ku rhanga va khongela eka Yehovha va nga si hlaya Bibele, leswaku a va nyika vutlharhi byo twisisa ni ku yingisa tidyondzo leti va ti hlayeke. (2 Timotiya 2:7; Yakobo 1:5) Moya wa Xikwembu wu nga ha ku tsundzuxa tindzimana ta Bibele leti nga ta ku pfuna leswaku u hlamula swivutiso ni ku langutana ni miringo.

Muntshwa un’wana la nga Mukreste u ri: “Tata wa mina u siye ndyangu wa ka hina, loko ndza ha ri ni malembe ya 12. Siku rin’wana ni madyambu a ndzi ri karhi ndzi khongela loko ndzi etlela, ndzi kombela Yehovha leswaku a endla leswaku tatana a vuya ekaya. Kutani ndzi teke Bibele yanga ndzi hlaya eka Pisalema 10:14 leyi nge: ‘La nga ni khombo, la nga riki na tatana, u titshega ha wena [Yehovha]. Wena u mupfuni wakwe.’ Ndzi yime swa xinkarhana. A ndzi swi twa leswaku Yehovha u vulavula na mina, u ndzi byela leswaku hi yena mupfuni wa mina; hi yena Tata wa mina. Xana ndzi nga n’wi kuma kwihi tatana wo antswa ku tlula yena?”

Xana u nga swi endla mukhuva ku khongela nkarhi ni nkarhi loko u lava ku hlaya Bibele? Adrian wa ringanyeta: “Khongela u nga si hlaya—u khongela niloko u heta—kutani u ta va u bula na Yehovha.” Xikhongelo lexi humaka embilwini xi ta ku tiyisa leswaku u namarhela xiyimiso xa wena xo hlaya Bibele naswona xi ta tiyisa vuxaka bya wena ni Xikwembu.—Yakobo 4:8.

Endla Ku Hlaya Ka Wena Ku Hanya

Kimberly, loyi a tshahiweke eku sunguleni, a a phirheka hi ku hlaya Bibele. I ntiyiso, Bibele i buku ya khale swinene—leyi tsariweke ku nga si endliwa khompyuta, thelevhixini kumbe xihaha-mpfhuka naswona vanhu lava ku vulavuriwaka ha vona eBibeleni va fe khale swinene. Hambiswiritano, muapostola Pawulo u tsarile: “Rito ra Xikwembu ra hanya naswona ri ni matimba.” (Vaheveru 4:12) Xana buku leyi ya khale yi nga va ni matimba hi ndlela yihi?

Emasikwini ya Ezra lowa mukopi, vavanuna ni vavasati va magidi ni “hinkwavo lava nga kotaka ku yingisa” a va hlengeletanile eYerusalema leswaku va ta yingisela loko ku hlayiwa Nawu wa Muxe. Hi nkarhi wolowo, Nawu ana se a wu ri ni malembe lama tlulaka 1 000 hi vukhale! Kambe, Ezra ni vapfuni vakwe “va ya emahlweni va hlayela ehenhla ku suka ebukwini, enawini wa Xikwembu xa ntiyiso, wu endliwa wu va erivaleni, va wu hlamusela; va ya emahlweni va endla leswaku swi twisisiwa leswi hlayiwaka.” Xana ku ve ni vuyelo byihi loko vavanuna lava va hlamusele Matsalwa ni ku endla leswi hlayiwaka swi hanya? “Vanhu hinkwavo va famba va ya dya, va nwa ni ku rhumela swiphemu, va hambeta va tsaka ngopfu, hikuva va twisise marito lawa va byeriweke wona.”—Nehemiya 8:1-12.

U nga endla njhani leswaku leswi u swi hlayaka eBibeleni swi va ni ‘nhlamuselo’? Cathy loyi swi n’wi nonon’hwelaka ku hlaya, u hlayela ehenhla leswaku a kota ku yisa nyingiso eka leswi a swi hlayaka. Nicki u ringeta ku tivona a ri exiyin’weni xa mhaka leyi a hlayaka ha yona. U ri: “Ndzi anakanya leswi a ndzi ta titwisa xiswona exiyin’weni xexo. Minkarhi hinkwayo rungula leri ndzi ri tsakelaka ngopfu i ra Rhuti na Nawomi. Ndzi nga ri hlaya hi ku phindha-phindha. Loko ndzi rhurhela endhawini leyintshwa, ndzi kume nchavelelo eka rungula leri hikuva a ndzi anakanya hi leswi Rhuti a titwiseke xiswona loko a ya endhawini yimbe naswona a nga tivi munhu. Ndzi vone ndlela leyi a tshembeke Yehovha ha yona, naswona swi ndzi pfune ku endla tano.”—Rhuti, tindzima 1-4.

Ku anakanyisisa swa laveka leswaku Bibele yi va ‘ni matimba.’ Nkarhi wun’wana ni wun’wana lowu u hlayaka ha wona, tinyike nkarhi wo anakanyisisa hi matsalwa lawa u ma hlayaka ni ku xiya ndlela leyi u nga swi tirhisaka ha yona leswi u swi dyondzeke. U nga ha tsakela ku kamba swipfuno swo dyondza Bibele leswi kandziyisiweke hi Timbhoni ta Yehovha leswaku u ta vuyeriwa eka ku hlaya ka wena.b

Tiyisela!

Ku namarhela xiyimiso xo hlaya Bibele a hi matlangwana. Hambi xiyimiso xa ku hlaya Bibele xi nga ha lava ku cinciwa nkarhi ni nkarhi. Xana u nga yi namarhela njhani pakani ya wena yo hlaya Bibele siku ni siku?

Vanghana va wena ni vandyangu, va nga ku pfuna. Amber loyi a nga ni malembe ya 15 hi vukhale, u ri: “Ndzi tshama ni makwerhu ekamareni rin’we. Madyambu man’wana ndzi titwa ndzi karhele lerova ndzi lava ku etlela, kambe makwerhu u ndzi tsundzuxa leswaku ndzi hlaya. Hikwalaho a ndzi si tshama ndzi rivala!” Loko u kuma tsalwa ro karhi kumbe xiyenge lexi tsakisaka, vulavula ha xona ni van’wana. Leswi swi ta endla leswaku u ri tlangela ngopfu Rito ra Xikwembu naswona swi nga ha endla leswaku na vona va tsakela ku hlaya Bibele. (Varhoma 1:11, 12) Loko u honisa ku hlaya ka wena Bibele siku rin’we kumbe ku tlula, u nga heli matimba! Tlhela u sungula laha u yimeke kona, naswona tiyimisele ngopfu ku namarhela xiyimiso xa wena.

U nga yi rivali mimbuyelo leyi fuweke leyi vaka kona hikwalaho ko hlaya Bibele siku ni siku. Hi ku yingisa Yehovha hi Rito rakwe, u nga va ni vuxaka lebyikulu na yena. U ta twisisa miehleketo ni mintlhaveko yakwe. (Swivuriso 2:1-5) Ntiyiso lowu wa risima lowu humaka eka Tata wa hina wa le matilweni wu ta ku sirhelela. Mupisalema u vutisile: “Xana jaha ri nga yi tengisisa ku yini ndlela ya rona? Hi ku tshama ri rindzile hi ku landza rito ra wena.” (Pisalema 119:9) Kutani sungula—naswona u namarhela—xiyimiso xa ku hlaya Bibele nkarhi ni nkarhi. U ta kuma swi tsakisa ngopfu ku tlula hilaha a wu ehleketa hakona!

[Tinhlamuselo ta le hansi]

[Swifaniso leswi nga eka tluka 28]

Xikhongelo ni ku lavisisa swi ta antswisa ku hlaya ka wena Bibele ni ku ku pfuna ku twisisa Matsalwa

[Xifaniso lexi nga eka tluka 29]

Ku tiveka exiyin’weni xa mhaka ya kona swi ta endla leswaku Matsalwa ma hanya