MAHANYELO YA VAKRESTE

Leswi Hi Nga Swi Endlaka Leswaku Hi Dyondza Matsalwa Hi Ndlela Leyi Vuyerisaka

Xana loko u langutane ni miringo u ta tshama u tshembekile hilaha Daniyele a endleke ha kona? Daniyele a a dyondza Rito ra Xikwembu hi ku hiseka swin’we ni vuprofeta lebyi dzikeke. (Dn 9:2) Dyondza ya Bibele leyi vuyerisaka yi nga hi pfuna leswaku hi tshama tshembekile. Yi nga hi pfuna njhani? Yi nga endla leswaku u va ni ripfumelo leri tiyeke ra leswaku switshembiso swa Yehovha swi ta hetiseka. (Yx 23:14) Nakambe yi ta ku pfuna leswaku u ya u rhandza Xikwembu swinene naswona sweswo swi ta endla leswaku u endla leswinene. (Ps 97:10) Xana u nga swi endla njhani sweswo? Xiya swiringanyeto leswi landzelaka.

Daniyele a ri karhi a dyondza Rito ra Xikwembu

I yini leswi ndzi nga dyondzaka hi swona? Ndlela leyinene yo dyondza nkarhi ni nkarhi yi katsa ni ku lunghiselela minhlangano. U nga vuyeriwa swinene eka ku hlaya ka Bibele ka vhiki ni vhiki loko u endla ndzavisiso hi tinhla leti u nga ti twisisiki. Ku engetela kwalaho, van’wana va hlawule ku dyondza leswi engetelekeke hi vuprofeta bya Bibele, timfanelo to hambanahambana leti hi ti kumaka hi ku pfuniwa hi moya lowu kwetsima wa Xikwembu, maendzo ya vurhumiwa ya muapostola Pawulo kumbe hi ntumbuluko wa Yehovha. Loko ku ri na xivutiso lexi u nga xi twisisiki xa le Bibeleni, xi tsale ehansi kutani u xi kambisisa eka dyondzo ya wena leyi landzelaka.
Ndzi nga ri kuma kwihi rungula? Leswaku u kuma swiringanyeto swin’wana, hlalela vhidiyo leyi nge Switirhisiwa Swa Ndzavisiso Swo Cela Xuma Xa Moya. Leswaku u kambela vuswikoti bya wena, endla ndzavisiso hi mimfumo ya misava leyi fanekiseriwaka hi xivandzana lexi hlamuseriwaka eka Daniyele ndzima 7.
Xana ndzi fanele ndzi heta nkarhi wo tanihi kwihi ndzi ri karhi ndzi dyondza? Loko u tshama u ri karhi u dyondza u ta va ni vuxaka lebyinene ni Xikwembu. U nga sungula hi ku dyondza nkarhi wo koma ivi hi ku famba ka nkarhi u engetela nkarhi. Ku dyondza Rito ra Xikwembu swi fana ni ku cela xuma lexi fihliweke, loko u xi kuma u ta lava ku ya emahlweni u cela! (Swiv 2:3-6) U ta ya u ri rhandza swinene Rito ra Xikwembu naswona u ta ya emahlweni u ri hlaya nkarhi na nkarhi.—1Pe 2:2.

Leswaku u kuma swiringanyeto swa ndlela leyi u nga tsakelaka ku dyondza ha yona, vona Xalamuka! ya February 2012 matl. 18-20

XANA SWIVANDZANA LESWI NGA EKA DANIYELE NDZIMA 7 SWI YIMELA YINI?

Xivandzana lexi fanaka ni nghala xi tlhela xi va ni timpapa ta gama

XIVUTISO LEXI ENGETELEKEKE:

Daniyele 7:8, 24 yi hetiseke njhani?

Rimhondzo leritsongo leri nga ni mahlo swin’we ni nomu lowu humaka exikarhi ka timhondzo ta khume kutani ri hundzuka timhondzo tinharhu

LESWI NDZI NGA SWI DYONDZAKA ENKARHINI LOWUTAKA:

Swivandzana leswi nga eka Nhlavutelo ndzima 13 swi fanekisela yini?