MAHANYELO YA VAKRESTE
Leswaku Hi Endla Vadyondzisiwa—Hi Fanele Hi Chumayela Hi Tlhela Hi Dyondzisa
Yesu u lerise valandzeri vakwe leswaku va ya endla vadyondzisiwa. (Mt 28:19) Leswi swi katsa ku chumayela ni ku dyondzisa. Hinkwerhu hi fanele hi tivutisa xivutiso lexi nge: ‘Ndzi nga yi antswisa njhani ndlela leyi ndzi dyondzisaka ha yona loko swi ta emhakeni ya ku endla vadyondzisiwa?
KU CHUMAYELA
Ematshan’weni yo yimela vanhu leswaku va ta eka hina, hi fanele hi tikarhatela ku lavisisa lava “fanelekaka.” (Mt 10:11) Loko hi ri ensin’wini, xana hi tikarhatela ku chumayela vanhu hinkwavo laha hi va kumaka? (Min 17:17) Lidiya u ve mudyondzisiwa hikwalaho ka leswi muapostola Pawulo a chumayela hi ku hiseka.—Min 16:13-15.
“Byala mbewu ya wena nimixo, naswona u nga ri wisisi voko ra wena ku fikela nimadyambu” (Ekl 11:6)
HLALELANI VHIDIYO LEYI NGE “HAMBETA U CHUMAYELA U NGA KARHALI”—HI XITSHUKETA NI LEYI NGE HI YINDLU NI YINDLU, KUTANI MI HLAMULA SWIVUTISO LESWI LANDZELAKA:
Samuwele u swi kombise njhani leswaku a a tshama a lunghekele ku byala mbewu ya ntiyiso?
Hikwalaho ka yini hi fanele hi tiyisela loko hi chumayela mahungu lamanene?
I mani loyi u nga n’wi chumayelaka rungula ra Mfumo loko u ri karhi u endla mitirho ya wena ya siku ni siku?
KU DYONDZISA
Leswaku hi kota ku endla vadyondzisiwa, a hi fanelanga hi siyela vanhu mikandziyiso ntsena. Hi fanele hi endla maendzo yo vuyela ni ku fambisa tidyondzo ta Bibele, loko hi endla tano hi ta va pfuna leswaku va va ni vuxaka lebyinene na Yehovha. (1Ko 3:6-9) Ku vuriwa yini loko munhu loyi hi dyondzaka na yena a nga endli nhluvuko? (Mt 13:19-22) Hi fanele hi hambeta hi lava vanhu lava nga ni timbilu leti fanaka ni “misava leyinene.”—Mt 13:23; Min 13:48.
“Mina ndzi byarile, Apolosi a cheleta, kambe Xikwembu hi xona lexi hambeteke xi swi kurisa” (1Ko 3:6)
HLALELANI VHIDIYO LEYI NGE HAMBETA U CHUMAYELA “U NGA KARHALI” ETINDHAWINI TA MANI NA MANI NI LEYI NGE KU ENDLA VADYONDZISIWA, KUTANI MI HLAMULA SWIVUTISO LESWI LANDZELAKA:
Solomon na Mary va yi chelete njhani mbewu ya ntiyiso embilwini ya Ezekiel na Abigail?
Hi yihi pakani leyi hi faneleke hi tivekela yona loko hi ri karhi hi chumayela mahungu lamanene ku katsa ni loko hi chumayela etindhawini ta mani na mani?
Hi nga swi kombisa njhani leswaku hi swi teka swi ri swa nkoka swinene ku dyondzisa van’wana ntiyiso?