U Nga Dyondza Yini Eka Tinsimu Ta Vuhaxi Bya JW?

Hi tihi tinsimu ta vuhaxi bya JW leti ku tsakisaka? Hikwalaho ka yini ti ku tsakisa? Xana u ehleketa leswaku tivhidiyo leti ti vulavula hi swilo leswi endlekaka evuton’wini? Leswi ti nga ni tinhlokomhaka to hambana naswona tiqambiweke hi tindlela to hambana un’wana ni un’wana a nga kuma leyi a yi tsakelaka. Hambiswiritano, tivhidiyo leti ta vuyimbeleri a ti endleriwanga ku hi hungasa ntsena.

Leswi hi nga Vakreste, risimu rin’wana ni rin’wana ri hi dyondzisa swilo leswi nga hi pfunaka evuton’wini ni le vutirhelini bya nsimu. Tinsimu tin’wana ti vulavula hi ku va ni malwandla, vun’we, xinghana, xivindzi, rirhandzu ni ripfumelo. Tin’wana ti vulavula hi ku tlhelela eka Yehovha, ku rivalela, ku tshembeka ni ku fikelela tipakani to tirhela Yehovha. Nakambe ku ni risimu leri hi lemukisaka hi ndlela yo tirhisa tifoni. I yini leswi u swi dyondzeke eka tinsimu ta vuhaxi bya JW?

HLALELANI VHIDIYO YA RISIMU LERI NGE, KWALA NYONGENI, KUTANI MI HLAMULA SWIVUTISO LESWI LANDZELAKA:

• Hi yihi mikateko leyi vatekani lava va dyuhaleke va ehleketaka ha yona, leyi nga ta endleka enkarhini lowu taka?—Gn 12:3

• I yini leswi nga hi pfunaka leswaku hi tshemba ku Yehovha u ta swi endla leswi a swi tshembisaka?

• Hi swihi swilo leswinene leswi nga ta endleka ku nga ri khale?

• Ku va ni ntshembo eka switshembiso swa Mfumo wa Xikwembu swi hi pfuna njhani ku tiyisela swiphiqo?—Rhm 8:25