Hikwalaho Ka Yini Xikwembu Xi Nga Hlamuli Swikhongelo Hinkwaswo?
Tata wa hina la nge matilweni Yehovha Xikwembu, u tsakela ku twa swikhongelo swa hina leswi humaka embilwini. Kambe ku ni swilo leswi nga endlaka a nga swi hlamuli swikhongelo swa hina. Hi swihi swilo swa kona naswona i yini leswi hi faneleke hi swi tsundzuka loko hi khongela? Hi leswi swin’wana leswi nga ku pfunaka ku suka eBibeleni.
“Loko u khongela, u nga vuli marito lama fanaka hi ku phindhaphindha.”—Matewu 6:7.
Yehovha a nga lavi hi krema swikhongelo kumbe hi n’wi hlayela swikhongelo leswi tsariweke ebukwini ya swikhongelo. Kambe u lava hi n’wi phofulela ta le mbilwini. Ehleketa ndlela leyi a wu ta titwa ha yona loko munghana wa wena a ku hlayela marito man’we masiku hinkwawo lama tsariweke ehansi loko a vulavula na wena. Vanghana lavanene va phofulelana ta le mbilwini hi ku ntshunxeka. Loko hi vulavula ni Tata wa hina wa le tilweni hi marito ya hina, swi kombisa leswaku hi n’wi teka a ri munghana wa hina.
“Loko mi kombela a mi kumi nchumu hikuva mi kombela hi xikongomelo lexi hoxeke.” —Yakobo 4:3.
Loko hi kombela Xikwembu swilo leswi hi tivaka leswaku a xi lavi hi swi endla kumbe hi va na swona, a hi nge languteli leswaku xi hlamula swikhongelo swo tano. Hi xikombiso, xana Xikwembu xi nga hlamula xikhongelo xa munhu loyi a gembulaka loyi a khongelelaka ku wina ku ve xi swi veke erivaleni leswaku a hi fanelanga hi va na makwanga kumbe hi tshembela eka malaki? (Esaya 65:11; Luka 12:15) Hakunene a swi nga ta twala ku va hi langutela leswaku Yehovha a hlamula swikhongelo swo tano! Loko hi lava leswaku Xikwembu xi hlamula swikhongelo swa hina, hi fanele hi tiyiseka leswaku leswi hi swi kombelaka swi fambisana ni leswi xi hi byelaka swona eBibeleni.
“La alaka ku yingisa nawu hambi ku ri xikhongelo xakwe xa nyenyetsa.”—Swivuriso 28:9.
Emikarhini ya ku tsariwa ka Bibele, Xikwembu a xi nga va yingisi lava a va honisa milawu ya xona. (Esaya 1:15, 16) Xikwembu a xi se cinca xa ha titwa tano. (Malakiya 3:6) Loko hi lava leswaku Xikwembu xi hlamula swikhongelo swa hina, hi fanele hi endla hinkwaswo leswi hi nga swi kotaka leswaku hi yingisa milawu ya xona. Ku vuriwa yini loko hi tshame hi endla swilo swo biha? Xana swi vula leswaku Yehovha a nge pfuki a swi yingisile swikhongelo swa hina? Doo! Loko hi hundzuka ivi hi hanya hi ndlela leyi n’wi tsakisaka u ta hi rivalela.—Mitirho 3:19.