Ndlela Leyi Xikhongelo Xi Nga Ku Pfunaka Ha Yona

Loko Pamela a ri karhi a vabya swinene u lave mpfuno eka madokodela. U tlhele a khongela eka Xikwembu leswaku xi n’wi pfuna a kota ku tiyisela xiyimo xakwe. Xana xikhongelo xi n’wi pfunile?

Loko Pamela a hlamusela u ri: “Loko ndzi ri karhi ndzi ya ehansi na le henhla leswaku ndzi tshunguriwa khensa, a ku ri ni mikarhi leyi a ndzi titwa ndzi chava. Kambe loko ndzi khongela eka Yehovha Xikwembu, a ndzi va ni ku rhula ka miehleketo, ndzi nga ha chavi. Switlhavi swa ha ri kona kambe xikhongelo xi endla ndzi kota ku va ni langutelo lerinene hi xiyimo xa mina. Loko vanhu va ndzi vutisa leswaku ndzi titwa njhani, ndzi va byela ndzi ku, ‘swa ha tikanyana, kambe ndzi tsakile!’”

A swi kali swi lava hi khomiwa hi mavabyi lamakulu leswaku hi ta sungula ku khongela. Hinkwerhu hi dodombisana ni swiphiqo swo hambanahambana naswona hi lava ku pfuniwa leswaku hi kota ku swi hlula. Xana xikhongelo xi nga pfuna?

Bibele yi ri: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a wa.” (Pisalema 55:22) Hakunene leyi i mhaka leyi chavelelaka! Xikhongelo xi nga ku pfuna njhani? Loko u khongela eka Xikwembu hi ndlela leyinene, xi ta ku pfuna leswaku u kota ku tiyisela swiphiqo swa wena.—Vona bokisi leri nge, “Ndlela Leyi Xikhongelo Xi Nga Ku Pfunaka Ha Yona.”

Ndlela Leyi Xikhongelo Xi Nga Ku Pfunaka Ha Yona

U ta va na ku rhula ka miehleketo

“Kombelani Xikwembu; kutani ku rhula ka Xikwembu loku tlulaka ku twisisa hinkwako ku ta rindza timbilu ta n’wina ni mianakanyo ya n’wina ha Kreste Yesu.” (Vafilipiya 4:6, 7) Loko u phofulela Xikwembu leswi ku karhataka xi ta ku pfuna leswaku u va na ku rhula ka miehleketo ni ku tiva leswi u faneleke u swi endla loko u ri na xitirese.

U ta kuma vutlhari lebyi humaka eka Xikwembu

“Loko ku ri ni loyi a pfumalaka vutlhari exikarhi ka n’wina, a a ye emahlweni a kombela eka Xikwembu hikuva xi nyika hinkwavo hi mbilu yo basa handle ko xopaxopa swihoxo kutani xi ta n’wi nyika byona.” (Yakobo 1:5) Loko hi ri na xitirese hi tala ku endla swiboho leswi hoxeke. Loko u khongelela vutlhari, Xikwembu xi ta ku pfuna leswaku u kota ku tsundzuka milawu ya xona leyi nga ku pfunaka leyi nga eRitweni ra xona ku nga Bibele.

U ta kuma matimba u tlhela u chaveleleka

“Eka hinkwaswo ndzi ni matimba hikwalaho ka loyi a ndzi nyikaka matimba.” (Vafilipiya 4:13) Yehovha Xikwembu xa matimba hinkwawo u ta ku nyika matimba yo tiyisela miringo ni ku tlhela u yi hlula. (Esaya 40:29) Bibele yi vula leswaku Yehovha i “Xikwembu xa nchavelelo hinkwawo.” U ta hi chavelela “emiringweni ya hina hinkwayo.”—2 Vakorinto 1:3, 4.

XIKHONGELO XI NGA KU PFUNA

Yehovha a nga ku sindzisi leswaku u khongela. Kambe u hi khutaza leswaku hi khongela swi suka embilwini. (Yeremiya 29:11, 12) Ku vuriwa yini loko u tshame u twa onge swikhongelo swa wena a swi hlamuriwi? U nga wi mapa. Swi nga ha endleka loko vana va lava ku pfuniwa hi vatswari va nga va pfuni hi ndlela leyi a va lava ku pfuniwa ha yona kumbe hi nkarhi wolowo. Sweswo swi nga ha vangiwa hi leswi vatswari va nga ni ndlela yo antswa yo va pfuna ha yona. Kambe swi le rivaleni leswaku vatswari va ta hetelela va va pfunile vana va vona.

Yehovha Xikwembu i mutswari la nga ni rirhandzu ku tlula hinkwavo naswona u lava ku ku pfuna. Loko u kambisisa swilo leswi hi buleke ha swona u tlhela u endla leswi u nga swi kotaka leswaku u hanya ha swona, Xikwembu xi ta hlamula swikhongelo swa wena!—Pisalema 34:15; Matewu 7:7-11.