Xikhongelo—Ndlela Leyi Xi Nga Ku Pfunaka Ha Yona

Loko u nga si sungula ku endla swo karhi, u nga ha tivutisa: ‘Xana swi ta ndzi pfuna njhani?’ Xana swa twala ku va hi vutisa hi ndlela leyi emhakeni ya xikhongelo? A swi twali hakunene. Hi ntumbuluko hi lava ku tiva loko nchumu wo karhi wu ta hi pfuna. Hambi ku ri Yobo wanuna wo lulama u tshame a vutisa a ku: “Loko ndzi xi vitana, xana xi ta ndzi hlamula?”—Yobo 9:16.

Eka swihloko leswi hundzeke, hi vulavule hi vumbhoni lebyi kombisaka leswaku xikhongelo a ko va nchumu lowu endliwaka hi vapfumeri. Xikwembu xa ntiyiso xa swi yingisa swikhongelo. Loko hi khongela hi ndlela leyi faneleke ni ku khongelela swilo leswinene, xi ta hi twa. Entiyisweni, xi hi khutaza leswaku hi tshinela eka xona. (Yakobo 4:8) I yini leswi hi nga swi rindzelaka loko hi hanya hi xikhongelo? A hi kambisiseni swin’wana leswi xi hi pfunaka eka swona.

Ku rhula ka mianakanyo.

Loko u va ni swiphiqo evuton’wini bya wena, xana u titwa u hela matimba? Eminkarhini yo tano Bibele yi hi khutaza leswaku hi ‘khongela minkarhi hinkwayo’, hi tlhela hi ‘tivisa Xikwembu swikombelo swa hina.’ (1 Vatesalonika 5:17; Vafilipiya 4:6) Bibele ya hi tiyisekisa leswaku loko hi khongela eka Xikwembu, “ku rhula ka Xikwembu loku tlulaka miehleketo hinkwayo ku ta rindza timbilu ta [hina] ni matimba ya [hina] ya mianakanyo.” (Vafilipiya 4:7) Ku rhula koloko hi nga va na kona loko hi phofula leswi hi karhataka eka Tata wa hina wa le tilweni. Entiyisweni eka Pisalema 55:22, u hi khutaza a ku: “Lahlela ndzhwalo wa wena eka Yehovha, u ta ku seketela.”

Vanhu va ntsandzavahlayi emisaveni va swi kotile ku va ni ku rhula loku. Hee Ran wa le South Korea u ri: “Hambileswi ndzi nga ni swiphiqo leswikulu, loko ndzi khongela hi swona ndzi titwa ndzi rhuliwe ndzhwalo ndzi tlhela ndzi va ni matimba ya ku swi tiyiselela.” Cecilia wa le Philippines u ri: “Leswi ndzi nga manana, ndzi karhateka ngopfu hi swinhwanyetana swa mina ni mana wa mina loyi a vabyaka naswona a nga ha kotiki ni ku ndzi tsundzuka. Kambe xikhongelo xi ndzi pfuna leswaku siku ni siku ndzi langutana ni ku vilela ka mina. Ndza swi tiva leswaku Yehovha u ta ndzi pfuna leswaku ndzi kota ku va khathalela.”

Nchavelelo ni matimba loko ndzi ri ni swiphiqo.

Xana u ni swiphiqo leswikulu kumbe leswi nga ha vangaka rifu kumbe swi ku tikisela vutomi swinene? Ku khongela eka “Xikwembu xa nchavelelo hinkwawo” swi hi nyika ku rhula. Bibele yi vula leswaku xi hi ‘chavelela enhlomulweni wa hina hinkwawo.’ (2 Vakorinto 1:3, 4) Hi xikombiso, siku rin’wana loko Yesu a karhateke swinene, ‘u nkhinsame hi matsolo a sungula ku khongela.’ Xana ku endleke yini? ‘Ntsumi leyi humaka etilweni yi humelele eka yena, yi n’wi tiyisa.’ (Luka 22:41, 43) Nehemiya wanuna un’wana wo tshembeka, a a tshamela ku xungetiwa hi vanhu vo homboloka lava a va ringeta ku n’wi tshikisa ku endla ntirho wa Xikwembu. U khongele a ku: “Tiyisa mavoko ya mina sweswi.” Leswi endlekeke endzhaku ka sweswo, swi komba leswaku Xikwembu xi n’wi pfunile ku hlula ku chava ni ku endla ntirho wakwe kahle. (Nehemiya 6:9-16) Reginald wa le Ghana loko a vulavula hi xikhongelo u ri: “Loko ndzi khongela, ngopfungopfu loko ndzi ri ni swiphiqo, ndzi titwa ndzi swi byele munhu loyi a nga ta ndzi pfuna a tlhela a ndzi tiyisekisa leswaku ndzi nga ha karhateki.” I ntiyiso, Xikwembu xa hi chavelela loko hi khongela eka xona.

Vutlhari bya Xikwembu.

Swiboho swin’wana leswi hi swi endlaka, swi nga ha vavisa hina ni van’wana. Hi nga swi endla njhani swiboho swa vutlhari? Bibele yi ri: “Loko mani na mani eka n’wina a kayivela vutlhari [ngopfungopfu loko a ri ni swiphiqo], a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona.” (Yakobo 1:5) Loko hi kombela vutlhari eka Xikwembu, xi ta tirhisa moya wa xona lowo kwetsima leswaku xi hi kongomisa hi endla swiboho swa vutlhari. Hi nga wu kombela moya lowo kwetsima hikuva Yesu u hi tiyisekisile leswaku “Tatana la nge tilweni u ta nyika moya lowo kwetsima eka lava n’wi kombelaka!”—Luka 11:13.

Yesu na yena u kombele Tata wakwe leswaku a n’wi pfuna loko a lava ku endla swiboho swa nkoka. Bibele yi hi byela leswaku loko a lava ku hlawula vavanuna va 12 lava a va ta va vaapostola vakwe, ‘u hambete a khongela Xikwembu vusiku hinkwabyo.’—Luka 6:12.

Ku fana na Yesu, vo tala namuntlha va khutazeka loko va vona ndlela leyi Xikwembu xi va hlamuleke ha yona loko va khongela leswaku va kota ku endla swiboho swa vutlhari. Regina wa le Philippines, u hi byela hi swiphiqo leswi a veke na swona, swo tanihi ku khathalela yena ni ndyangu wakwe endzhaku ka ku feriwa hi nuna, a heleriwa hi ntirho ni xiyimo xo tika xa ku kurisa vana. I yini lexi n’wi pfuneke leswaku a endla swiboho swa vutlhari? U ri: “Ndzi pfuniwa hi ku khongela eka Yehovha.” Kwabena wa le Ghana u hlamusela xivangelo xa ku va a khongela eka Xikwembu, u ri: “Ndzi heleriwe hi ntirho lowu a wu ndzi hakela kahle.” U ya emahlweni a ku: “A ndzi tshamela ku khongela eka Yehovha leswaku a ndzi kongomisa leswaku ndzi endla xiboho lexinene. Ndza tiyiseka leswaku Yehovha u ndzi pfunile leswaku ndzi hlawula ntirho lowu endlaka ndzi va ni nkarhi wa ku va ni vuxaka na yena ndzi tlhela ndzi kota ku khathalela swilaveko swa mina.” Na wena u nga wu kuma nkongomiso wa Xikwembu hi ku khongela hi swilo leswi nga ha kavanyetaka vuxaka bya wena na xona.

Hi vulavule hi swilo switsongo leswi xikhongelo xi nga ku pfunaka eka swona. (Leswaku u kuma swikombiso swin’wana, hlaya bokisi leri nge “Leswi Xikhongelo Xi Pfunaka Ha Swona.”) Kambe leswaku u pfuneka u fanele u sungula u tiva Xikwembu ni ku rhandza ka xona. Loko u swi lava hakunene, ha ku khutaza leswaku u kombela Timbhoni ta Yehovha ti ku pfuna leswaku u dyondza Bibele.a Leri ri ta va goza ra wena ro sungula ra leswaku u tshinela eka “Mutwi wa xikhongelo.”—Pisalema 65:2.