Vanhu Hinkwavo Va Lava Vumundzuku Lebyinene
U navela ku va ni vumundzuku bya njhani? Ku fana ni vanhu vo tala, na wena wa swi lava ku va ni vumundzuku lebyinene laha u nga ta tiphina ni ndyangu wa wena mi tsakile, mi ri ni rihanyo lerinene, ku rhula naswona swilo swi mi fambela kahle.
Vanhu vo tala va kanakana leswaku va nga va na byona vumundzuku lebyinene. Va tivonele hi ya vona ndlela leyi swiendlakalo leswi nga languteriwangiki swo tanihi ntungu wa COVID-19, swi cinceke ndlela leyi vanhu va hanyaka hayona, swi vanga vusiwana ni ku dlaya vanhu vo tala. Sweswo swi endla va karhateka hi vumundzuku bya vona.
Leswi vanhu vo tala va kanakanaka hi vumundzuku, va wa va pfuka va lava leswi nga va pfunaka leswaku va va ni vumundzuku lebyinene. Vanhu vo tala va tshemba leswaku va ta tsaka loko va ri ni mali yo tala. Van’wana va lwela ku va ni dyondzo ya xiyimo xa le henhla ni rifuwo, hi ku tshemba leswaku sweswo swi ta va pfuna va kuma leswi va swi lavaka. Kasi van’wana va tshemba leswaku ku va munhu lonene hi swona leswi nga ta endla va tsaka.
Xana swilo leswi nga laha henhla swi ta endla u va ni vumundzuku lebyinene? Leswaku u kuma nhlamulo, u fanele u kambisisa swivutiso leswi:
Mikhuva ya wena yi kombisa leswaku u ta va ni vumundzuku bya njhani?
Xana ku dyondzeka ni ku va ni mali swi nga endla u hanya vutomi byo antswa?
Xana ku va munhu lonene swi ta endla u va ni vumundzuku lebyinene?
U nga wu kuma kwihi nkongomiso lowu tshembekaka wo va ni vumundzuku lebyinene?
Magazini lowu wa Xihondzo xo Rindza wu ta ku pfuna u kuma tinhlamulo ta swivutiso leswi.