3 | Vuyeriwa Eka Swikombiso Swa Le Bibeleni

BIBELE YI HLAMUSELA . . . Vavanuna ni vavasati vo tshembeka lava a va ri ni mintlhaveko leyi “fanaka ni ya hina.”—YAKOBO 5:17.

Leswi Sweswo Swi Vulaka Swona

Tindzimana ta le Bibeleni ti tele hi swikombiso swa vavanuna ni vavasati lava titweke hi tindlela to hambanahambana. Loko hi ri karhi hi hlaya mitokoto ya vona, hi nga ha kuma leswaku ximunhuhatwa xin’wana xa le Bibeleni xi tshame xi titwa ku fana na hina.

Ndlela Leyi Leswi Swi Nga Hi Pfunaka Hayona

Hinkwerhu ha swi lava leswaku van’wana va twisisa ndlela leyi hi titwaka hayona. Mhaka leyi i ntiyiso, ngopfungopfu loko hi karhatiwa hi ntshikilelo wa mianakanyo. Loko hi hlaya Bibele, hi dyondza hi vanhu van’wana lava ehleketeke ni ku titwa hi ndlela leyi hi titwaka hayona. Sweswo swi hi endla hi titwa hi nga ri hexe loko hi vilela ni loko hi ri ni switirese hikuva ha swi xiya leswaku van’wana na vona va xanisekile ku fana na hina.

Bibele yi tamele marito yo tala lama vuriweke hi vanhu lava titweke va nga ri na mupfuni naswona va nga ha tivi ta vona. Xana u tshama u titwa hi ndlela leyi, ‘Vutomi byi ndzi khele matluka, a ndzi nge swi koti ku ya emahlweni ndzi hanya hi ndlela leyi’? Muxe, Eliya na Davhida va titwe tano.—Tinhlayo 11:14; 1 Tihosi 19:4; Pisalema 55:4.
Bibele yi hi byela hi wansati loyi a vuriwaka Hana, loyi mbilu yakwe “a yi vava ngopfu” hileswi a a nga veleki naswona sweswo a swi endla nkatikulobye wakwe a tshamela ku n’wi dyisa mbitsi hi ndlela ya tihanyi.—1 Samuwele 1:6, 10.
Bibele yi hi byela hi wanuna loyi a vuriwaka Yobo loyi hi nga ha vaka hi titwa ku fana na yena. Hambileswi a a ri ni ripfumelo leri tiyeke eka Yehovha, u tshikilelekile swinene naswona u tshame a ku: “Ndzi venga vutomi bya mina; a ndza ha swi lavi ku ya emahlweni ndzi hanya.”—Yobo 7:16.

Loko hi dyondza ndlela leyi swimunhuhatwa leswi swa le Bibeleni swi humeleleke hayona eka ku lwisana ni miehleketo leyi nga riki yinene, swi ta hi nyika matimba lawa hi ma lavaka leswaku hi kota ku lwisana ni mintshikilelo leyi hi nga na yona.

Ndlela Leyi Bibele Yi Pfunaka Hayona Kevin

Ndlela Leyi Vuvabyi Bya Swi Pfukela Byi Ndzi Khumbeke Hayona

“Ku kumiwe leswaku ndzi ni vuvabyi bya swipfukela loko ndzi ri ekusuhi ni ku hlanganisa malembe ya 50. Ku na mikarhi leyi ndzi twaka onge ndzi nga kota ku hlula xiphiqo xin’wana ni xin’wana evuton’wini. Kambe mikarhi yin’wana ndzi twa onge ku hanya a swi bohi.”

Ndlela Leyi Bibele Yi Ndzi Pfunaka Hayona

“Munhu un’wana wa le Bibeleni loyi a a ri eka xiyimo lexi fanaka ni xa mina i muapostola Petro. U endle swihoxo leswi a swi n’wi endla a titwa a nga pfuni nchumu. Ematshan’weni yo ehleketa hi swihoxo swakwe, u tihlanganise ni vanghana lava a va khathala hi yena. Loko siku ra mina ri nga fambi kahle hikwalaho ka vuvabyi bya swipfukela, xidyoho lexi ndzi velekiweke na xona xi nga ndzi tshikilela ni ku ndzi endla ndzi titwa ndzi nga pfuni nchumu. Ku fana na Petro, ndzi dyondze ku va ekusuhi ni vanghana va mina lava lavaka ku ndzi pfuna leswaku ndzi ya emahlweni ndzi tiphina hi vutomi.

“Ximunhuhatwa xin’wana xa le Bibeleni lexi ndzi chavelelaka i Hosi Davhida. Hakanyingi xiyimo xakwe a xi n’wi endla a titwa a tshikilelekile naswona a tisola hi swihoxo leswi a swi endleke. Xiyimo xa mina xa fana ni xa yena hikuva mikarhi yin’wana ndzi endla kumbe ku vula swilo leswi ndzi salaka ndzi tisola. Marito ya Davhida eka Pisalema 51 ma ndzi chavelela. Eka ndzimana 3, Davhida u te: ‘Hikuva ndzi yi tiva kahle milandzu ya mina, naswona ndzi tshamela ku tsundzuka xidyoho xa mina.’ Leswi swi yi hlamusela kahle ndlela leyi ndzi titwaka hayona loko ndzi tshikilelekile hikuva swa tika ku vona leswinene eka mina n’wini. Kambe ndzi tlhela ndzi titwa ku fana na Davhida eka ndzimana 10: ‘Vumba mbilu yo tenga endzeni ka mina, Xikwembu xanga, naswona u nghenisa moya lowuntshwa lowu tiyeke endzeni ka mina.’ Ndzi tirhisa xikombelo lexi fanaka eka Xikwembu leswaku xi ndzi pfuna ndzi vona leswinene eka mina. Xo hetelela, ndzimana 17 ya ndzi chavelela. Yi ri: ‘A wu nge yi fularheli mbilu leyi tshovekeke yi tlhela yi pfotloseka Xikwembu xanga.’ Ndzimana leyi ya ndzi tiyisekisa leswaku Xikwembu xa ndzi rhandza.

“Ku tshama ndzi ri karhi ndzi ehleketa hi swikombiso swa le Bibeleni ni leswi Xikwembu xi ndzi nyikaka swona sweswi, swi ndzi nyika matimba yo tiyisa ntshembo wa mina hi vumundzuku. Switshembiso swa le Bibeleni i swa xiviri eka mina naswona swi ndzi nyika matimba yo ya emahlweni ndzi tiyisela.”