2 | “Nchavelelo Lowu Humaka eMatsalweni”

BIBELE YI RI: “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” —VARHOMA 15:4.

Leswi Sweswo Swi Vulaka Swona

Bibele yi tamele marito lama nga hi pfunaka leswaku hi tiyisela ni ku hi pfuna loko hi ehleketa hi swilo leswi nga riki swinene. Yi tlhela yi hi nyika ntshembo wa leswaku ku nga ri khale a ku nge he vi ni swilo leswi nga hi twisaka ku vava.

Ndlela Leyi Leswi Swi Nga Hi Pfunaka Hayona

Hinkwerhu hi ni mikarhi leyi hi pfaka hi titwa hi nga tsakanga kambe lava karhatiwaka hi ntshikilelo wa miehleketo kumbe ku vilela, va nga ha tshama va nga tsakanga mikarhi hinkwayo. Xana Bibele yi nga va pfuna njhani?

Bibele yi ni swilo swo tala leswinene leswi hi nga ehleketaka hi swona, leswi nga hi pfunaka leswaku hi nga ehleketi hi swilo swo biha. (Vafilipiya 4:8) Yi nga tata miehleketo ya hina hi swilo leswi chavelelaka ni ku hi phyuphyisa, leswi nga ta hi pfuna leswaku hi kota ku lawula mintlhaveko ya hina.—Pisalema 94:18, 19.
Bibele yi nga hi pfuna leswaku hi lwisana ni miehleketo ya ku titwa hi nga ri va nkoka.—Luka 12:6, 7.
Matsalwa yo tala ya le Bibeleni ma hi tiyisekisa leswaku a hi hexe, nileswaku Xikwembu lexi nga Muvumbi wa hina xi yi twisisa kahle ndlela leyi hi titwaka hayona.—Pisalema 34:18; 1 Yohane 3:19, 20.
Bibele yi hi tshembisa leswaku Xikwembu xi ta endla hi nga ha ehleketi hi swilo swa khale leswi nga tsakisiki. (Esaya 65:17; Nhlavutelo 21:4) Loko hi xaniseka hikwalaho ko ehleketa hi swilo leswi hi twisaka ku vava, xitshembiso lexi xi nga hi nyika matimba ya leswaku hi tiyisela.

Ndlela Leyi Bibele Yi Pfunaka Hayona Jessica

Ndlela Leyi Ntshikilelo Wa Mianakanyo Wu Ndzi Khumbaka Hayona

“Loko ndzi ri ni malembe ya 25, ku kumeke leswaku ndzi ni ntshikilelo wa mianakanyo. A ndzi xanisiwa hi miehleketo leyi taka kwala ni kwala ni leyi nga lawulekiki ya swilo swo vava leswi endlekeke khale. Madokodela ma ndzi pfunile ndzi twisisa leswaku ntshikilelo wa mianakanyo lowu a ndzi ri na wona, a wu vangiwa hi swilo swo vava leswi nga tshama swi endleka evuton’wini bya mina. Ku engetela eka mimirhi leyi a ndzi yi kuma, a ndzi lava dokodela loyi a a ta ndzi pfuna ndzi kuma leswi endlaka ndzi ehleketa hi swilo leswi nga riki swinene naswona a ndzi pfuna leswaku ndzi nga ha ehleketi tano.”

Ndlela Leyi Bibele Yi Ndzi Pfunaka Hayona

“Loko ndzi tshikilelekile a ndzi tela hi ku chava, ndzi vilela swinene naswona vurhongo a byi nga phahi. Mikarhi yo tala nivusiku a ndzi karhatiwa hi ku vilela loku nga lawulekiki. Hilaha Pisalema 94:19 yi vulaka hakona, Xikwembu xi nga hi chavelela ni ku hi endla hi tsaka loko hi karhatiwa hi ku vilela. Hikwalaho, ndzi veke Bibele etlhelo ka mubedo wa mina ni buku ya tinotsi leyi a ndzi tsale matsalwa lama khutazaka. Loko vurhongo byi nga phahi, a ndzi ta hlaya tindzimana ta le Bibeleni naswona hi ku endla tano, a ndzi pfumelela miehleketo ya Xikwembu leswaku yi ndzi chavelela.

“Bibele yi hi khutaza ku bakanya miehleketo leyi kanetaka leswi hi swi tivaka hi Xikwembu. Khale a ndzi tibyela leswaku a ndzi wa nkoka naswona a ndzi rhandziwi. Kambe ndzi dyondze leswaku mavonelo wolawo ma lwisana nileswi Bibele yi swi vulaka, ku nga leswaku Xikwembu i Tatana loyi a nga ni rirhandzu ni ntwelavusiwana naswona u khathala hi un’wana ni un’wana wa hina. Ndzi swi kotile ku lawula miehleketo ya mina, ematshan’weni yo yi pfumelela ku va yona yi ndzi lawulaka. Ndzi dyondze ku titeka hilaha Xikwembu xi ndzi tekaka hakona. Leri a ku ri goza ra nkoka leri ndzi ri tekeke leswaku ndzi lwisana ni miehleketo yo biha ya ndlela leyi a ndzi titeka hayona.

“Ndzi wu langutele hi mahlongati nkarhi lowu eka wona ku nga ta va ku nga ha ri na miehleketo yo biha ya swilo swo vava leswi endlekeke khale. Ku tiva leswaku ntshikilelo wa mianakanyo wu ta va wu nga ha ri kona, swi ndzi nyika matimba yo kota ku langutana ni ku tsana ka mina sweswi ni ku langutela vumundzuku lebyi eka byona ndzi nga ta va ndzi nga ha ri na ntshikilelo wa mianakanyo.”