Leswi Nga Ku Pfunaka Ku Dyondza

Rhangisa Swilo Swa Nkoka

Hinkwerhu hi ni nkarhi wo karhi lowu hi tivekeleke ku endla dyondzo ya munhu hi yexe. Hi nga wu tirhisa njhani nkarhi wolowo leswaku wu hi vuyerisa? Xo sungula, u nga vi na magugu. Kahlekahle u ta vuyeriwa ngopfu loko u dyondza rungula ro koma hi vurhon’wana ku ri ni ku hlaya rungula ro tala hi ku hatlisa.

Kutani rhangisa swilo swa nkoka. (Efe. 5:15, 16) Hi leswi swiringanyeto leswi nga ku pfunaka:

• Hlaya Bibele siku ni siku. (Ps. 1:2) Swi nga va swinene loko wo sungula hi ku hlaya tindzima leti nga eka xiyimiso xa hina xa ku hlaya ka Bibele ka vhiki ni vhiki xa nhlengeletano ya le xikarhi ka vhiki.

• Lunghiselela nhlengeletano ya le xikarhi ka vhiki ni Xihondzo xo Rindza lexi Dyondziwaka eVandlheni. Ringeta ku lunghiselela kahle leswaku u ta hlamula.—Ps. 22:22.

• Nakambe loko u va ni nkarhi, ringeta ku hlaya timagazini ta vanhu hinkwavo, u hlalela tivhidiyo ni swin’wana leswi humesiwaka eka jw.org.

• Endla ndzavisiso hi timhaka leti ku tsakisaka. U nga endla ndzavisiso hi ntlhontlho lowu u langutaneke na wona, xivutiso lexi u nga na xona kumbe mhaka yo karhi ya le Bibeleni leyi u tsakelaka ku yi twisisa kahle. Leswaku u vona ku u nga swi endla njhani leswi, kambisisa xiyenge lexi nge, “Switoloveto Swa Timhaka Ta Bibele” eka jw.org.