Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w24 April matl. 8-13
  • Tshemba Nhlangano Wa Yehovha Swinene

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Tshemba Nhlangano Wa Yehovha Swinene
  • Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2024
  • Swihloko
  • Tinhlokomhaka Tin'wana Leti Yelana Na Yona
  • NHLANGANO WA HINA WU LANDZELA XIKOMBISO XA YESU
  • YANA EMAHLWENI U KOMBISA KU TLANGELA EKA NHLANGANO WA YEHOVHA
  • U NGA PFUMELELI VAN’WANA VA KU TSHIKISA KU TSHEMBA NHLANGANO
  • Xana Wa Swi Kota Ku Hambanisa Ntiyiso Eka Mavunwa?
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2024
  • Endla Swiboho Leswi Kombisaka Leswaku U Titshega Hi Yehovha
    Xibukwana Xa Nhlengeletano Ya Mahanyelo Ni Ntirho Wa Hina Wo Chumayela—2023
  • Hi Ku Titsongahata, Amukela Leswi U Nga Swi Tiviki
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2025
  • Tiphine Hi Ntsako Lowu Tisiwaka Hi Ku Nyika
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2024
Vona Swo Tala
Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2024
w24 April matl. 8-13

NHLOKOMHAKA LEYI DYONDZIWAKA YA VU 15

RISIMU 124 Ku Tshama Hi Tshembekile

Tshemba Nhlangano Wa Yehovha Swinene

“Tsundzukani lava rhangelaka exikarhi ka n’wina, lava mi byeleke rito ra Xikwembu.”—HEV. 13:7.

LESWI HI NGA TA SWI DYONDZA

Leswi hi nga swi endlaka leswaku hi tshama hi ri karhi hi xixima ni ku tshemba nhlangano wa Yehovha.

1. Mavandlha ya Vakreste vo sungula a ma kongomisiwa hi ndlela yihi?

MIKARHI hinkwayo loko Yehovha a nyika vanhu vakwe ntirho wo karhi, u lava va wu endla hi ndlela leyi hlelekeke. (1 Kor. 14:33) Hi xikombiso, ku rhandza ka Xikwembu hileswaku mahungu lamanene ma chumayeriwa emisaveni hinkwayo. (Mat. 24:14) Yehovha u veke Yesu leswaku ku va yena murhangeri wa ntirho wolowo. Kutani Yesu u tiyisekile leswaku ntirho lowu wu endliwa hi ndlela leyi hlelekeke. Emikarhini ya vaapostola, loko mavandlha ma ri karhi ma simekiwa etindhawini to hambanahambana, ku vekiwe vakulu leswaku va nyika mavandlha nkongomiso ni ku tlhela va rhangela. (Mit. 14:23) Huvo ya vakulu vo sungula va le Yerusalema, leyi a yi katsa vaapostola ni vakulukumba, yi endle swiboho leswi mavandlha hinkwawo a ma fanele ma swi landzela. (Mit. 15:2; 16:4) Leswi va yingiseke nkongomiso lowu va wu kumeke, “mavandlha a ma ya ma tiya eripfumelweni ni ku andza.”—Mit. 16:5.

2. Ku sukela hi 1919, Yehovha u va kongomise njhani vanhu vakwe ni ku tlhela a va nyika switsundzuxo leswi humaka eRitweni rakwe?

2 Ninamuntlha, Yehovha wa ha ya emahlweni a kongomisa vanhu vakwe. Ku sukela hi 1919, Yesu u tirhise ntlawa lowutsongo wa vavanuna leswaku wu kongomisa ntirho wo chumayela ni ku nyika valandzeri vakwe switsundzuxo leswi humaka eRitweni ra Xikwembu hi nkarhi lowu faneleke.a (Luka 12:42) Swi le rivaleni leswaku Yehovha u katekisa ntirho wa ntlawa wolowo.—Esa. 60:22; 65:​13, 14.

3-4. (a) Nyika xikombiso xa ndlela leyi hi vuyeriwaka hayona loko hi kongomisiwa. (b) Hi ta bula hi yini eka nhlokomhaka leyi?

3 Loko a hi nga kongomisiwi, a hi nga ta swi kota ku endla ntirho lowu Yesu a hi rhumeke wona. (Mat. 28:​19, 20) Hi xikombiso, loko vamakwerhu a va nga kongomisi ntirho wo chumayela lowu endliwaka etindhawini hinkwato leti nga emavandlheni ya hina, un’wana ni un’wana a a ta chumayela kun’wana ni kun’wana laha a lavaka kona. Tindhawu tin’wana a ti ta tirhiwa hi ku phindhaphindha hi vahuweleri vo hambanahambana, loko hi hala tlhelo tindhawu letin’wana ti nga tirhiwi hi ku helela. Xana u nga ehleketa hi tindlela tin’wana leti hi vuyeriwaka ha tona loko hi kongomisiwa?

4 Ninamuntlha, Yesu wa ha ya emahlweni a kongomisa vanhu va Xikwembu hilaha a a kongomisa valandzeri vakwe hakona loko a ha ri laha misaveni. Eka nhlokomhaka leyi, hi ta bula hi xikombiso lexi Yesu a hi vekeleke xona ni ndlela leyi nhlangano wu xi landzelaka hayona. Hi ta tlhela hi bula hi ndlela leyi hi nga swi kombisaka hayona leswaku hi tlangela nhlangano wa Yehovha.

NHLANGANO WA HINA WU LANDZELA XIKOMBISO XA YESU

5. Hi yihi ndlela leyi hi landzelaka xitsundzuxo xa Yesu hayona? (Yohane 8:28)

5 Yesu u dyondze leswi a a swi vula ni ku swi endla eka Tata wakwe wa le matilweni. Nhlangano wa Yehovha wu landzela xikombiso xa Yesu hi ku tirhisa Rito ra Xikwembu loko wu hi dyondzisa ni ku hi kongomisa. (Hlaya Yohane 8:28; 2 Tim. 3:​16, 17) Nkarhi ni nkarhi hi kuma switsundzuxo swa ku hlaya ni ku tirhisa leswi hi swi dyondzaka eRitweni ra Xikwembu. Hi vuyeriwa njhani loko hi swi landzela?

6. Hi yihi ndlela yin’wana ya nkoka leyi hi vuyeriwaka hayona loko hi dyondza Bibele?

6 Ha vuyeriwa swinene loko hi hlaya Bibele hi ku pfuniwa hi mikandziyiso ya hina. Hi xikombiso, hi kota ku vona ndlela leyi leswi Bibele yi swi dyondzisaka swi fambisanaka hayona ni nkongomiso lowu hi wu kumaka eka nhlangano. Loko hi vona leswaku nkongomiso lowu hi wu kumaka wu huma eMatsalweni, ndlela leyi hi wu tshembaka hayona nhlangano wa Yehovha yi ya yi kula.—Rhom. 12:2.

7. Hi wahi mahungu lawa Yesu a a ma chumayela naswona lava nga enhlanganweni wa Yehovha va xi landzela njhani xikombiso xakwe?

7 Yesu u chumayele “mahungu lamanene ya Mfumo wa Xikwembu.” (Luka 4:​43, 44) U tlhele a lerisa vadyondzisiwa vakwe leswaku va chumayela hi Mfumo wa Xikwembu. (Luka 9:​1, 2; 10:​8, 9) Namuntlha hinkwavo lava nga enhlanganweni wa Yehovha va chumayela hi Mfumo wa Xikwembu, swi nga ri na mhaka laha va tshamaka kona kumbe vutihlamuleri bya vona enhlanganweni.

8. Hi ni nkateko wo endla yini?

8 Hi swi teka ku ri nkateko ku chumayela van’wana ntiyiso hi Mfumo wa Xikwembu! A hi vangani va nga na nkateko lowu. Hi xikombiso, loko Yesu a ri laha misaveni a nga yi pfumelelanga mimoya yo biha yi nyikela vumbhoni hi yena. (Luka 4:41) Ninamuntlha, loko munhu a nga si sungula ku chumayela ni Timbhoni ta Yehovha, u fanele a rhanga a hanya hi ndlela leyi tsakisaka Yehovha. Hi kombisa leswaku ha wu tlangela nkateko wo chumayela van’wana, hi ku nyikela vumbhoni loko hi pfulekeriwe hi nkarhi kun’wana ni kun’wana laha hi nga kona. Leswi hi lavaka ku fana na Yesu, hi endla hinkwaswo leswi hi nga swi kotaka leswaku hi chumayela ni ku dyondzisa van’wana ntiyiso.—Mat. 13:​3, 23; 1 Kor. 3:6.

9. Nhlangano wa Yehovha wu endle yini leswaku vito ra Xikwembu ri tiveka?

9 Yesu u endle vito ra Xikwembu ri tiviwa. Hi xikhongelo, Yesu u byele Tata wakwe wa le tilweni a ku: “Ndzi va tivise vito ra wena.” (Yoh. 17:26) Leswi wu landzelaka xikombiso xa Yesu, nhlangano wa Yehovha wu endla hinkwaswo leswi wu nga swi kotaka ku pfuna vanhu va tiva vito ra Xikwembu. Vuhundzuluxeri Bya Misava Leyintshwa Bya Matsalwa Yo Kwetsima byi endle ntirho wa nkoka emhakeni leyi, hi ku vuyisela vito ra Xikwembu laha a ri susiwe kona. Vuhundzuluxeri lebyi bya Bibele bya kumeka hi xiphemu kumbe byi helerile hi tindzimi leti tlulaka 270. Eka Xiengetelo A4 na A5 xa vuhundzuluxeri lebyi, u ta dyondza swo tala mayelana ni ku vuyiseriwa ka vito ra Xikwembu eBibeleni. Xiengetelo C lexi kumekaka eka Study Bible, xi hi nyika vumbhoni lebyi engetelekeke bya leswaku vito ra Xikwembu ri fanele ri humelela eka Matsalwa Ya Vukreste Ya Xigriki ka 237.

10. U dyondza yini eka leswi vuriweke hi wansati wa le Myanmar?

10 Ku fana na Yesu, hi lava ku pfuna vanhu hilaha hi nga kotaka hakona leswaku va tiva vito ra Xikwembu. Wansati wa le Myanmar loyi a nga ni malembe ya 67 loko a dyondza leswaku Xikwembu xi ni vito u ririle, ivi a ku: “I ro sungula evuton’wini bya mina ndzi twa leswaku vito ra Xikwembu i Yehovha. . . . U ndzi dyondzise nchumu wa nkoka swinene ku tlula leswi ndzi tshameke ndzi swi dyondza.” Hilaha ntokoto lowu wu swi kombisaka hakona, loko vanhu va tiva vito ra Xikwembu swi nga cinca vutomi bya vona.

YANA EMAHLWENI U KOMBISA KU TLANGELA EKA NHLANGANO WA YEHOVHA

11. Vakulu va nga swi kombisa njhani leswaku va tlangela nhlangano wa Yehovha? (Nakambe vona xifaniso.)

11 Hi yihi ndlela leyi vakulu va nga swi kombisaka hayona leswaku va wu tlangela nhlangano wa Yehovha? Loko va kuma nkongomiso, va fanele va wu hlaya hi vukheta ni ku endla hinkwaswo leswi va nga swi kotaka leswaku va tirhisa leswi wu swi vulaka. Hi xikombiso, a va kumi nkongomiso wa ku fambisa tinhlengeletano ta vandlha ni ku yimela vandlha hi xikhongelo ntsena kambe ni ku khathalela tinyimpfu ta Kreste. Vakulu lava landzelaka nkongomiso lowu humaka eka nhlangano, va pfuna lava va va khathalelaka leswaku va titwa va sirhelelekile ni ku rhandziwa.

Swifaniso: 1. Vakulu vanharhu va hlangane eHolweni ya Mfumo leswaku va bula hi nsimu ya vandlha ra vona. 2. Endzhaku, un’wana wa vakulu volavo u letela vamakwerhu vambirhi vaxisati ndlela yo veka swigolonyana endhawini leyi hlayisekeke.

Vakulu va hi pfuna ku tshemba nkongomiso lowu humaka eka nhlangano wa Yehovha (Vona ndzimana 11)b


12. (a) Hikwalahokayini hi fanele hi tirhisana ni lava rhangelaka? (Vaheveru 13:​7, 17) (b) Hikwalahokayini hi fanele hi languta ntsena leswinene eka lava rhangelaka?

12 Loko vakulu va hi nyika nkongomiso, hi fanele hi wu landzela hi ku swi rhandza. Sweswo swi ta olovisela lava rhangelaka leswaku va endla ntirho wa vona. Bibele yi hi khutaza ku yingisa lava rhangelaka ni ku tlhela hi titsongahata eka vona. (Hlaya Vaheveru 13:​7, 17.) Sweswo swi nga ha tika mikarhi yin’wana. Hikwalahokayini? Hikuva vavanuna lava va swi endla swihoxo. Kambe loko hi tshamela ku languta swihoxo swa vona ku ri ni ku languta swilo leswinene leswi va swi endlaka, hi ta va hi pfuneta valala va hina. Njhani? Hi ta va hi nga wu tshembi nhlangano wa Xikwembu, ku nga leswi laviwaka hi valala va hina. Hi fanele hi endla yini leswaku hi kota ku vona mavunwa ya valala va hina ni ku tlhela hi ma papalata?

U NGA PFUMELELI VAN’WANA VA KU TSHIKISA KU TSHEMBA NHLANGANO

13. Valala va Xikwembu va ringeta njhani ku endla nhlangano wu vonaka onge wu bihile?

13 Vakaneti va ringeta hi matimba leswaku va hi endla hi vona onge swilo leswinene leswi nhlangano wu hi dyondzisaka swona swi bihile. Hi xikombiso, Matsalwa ma hi dyondzise leswaku Yehovha u langutele ku vona vagandzeri vakwe va va lava baseke emirini, emahanyelweni ni ku n’wi gandzela hi ndlela leyi a yi amukelaka. U vula leswaku un’wana ni un’wana loyi a yaka emahlweni a endla swo biha naswona a nga laveki ku hundzuka, a susiwa evandlheni. (1 Kor. 5:​11-13; 6:​9, 10) Hi yingisa nawu wolowo wa le Matsalweni. Hikwalaho ka sweswo, vakaneti va hina va vula leswaku a hi va rhandzi vanhu, ha va avanyisa naswona hi va tekela ehansi hileswi va hambaneke na hina.

14. I mani muvangi lonkulu wa mavunwa hi nhlangano wa Yehovha?

14 Xiya leswaku i mani muhlaseri wa nhlangano. Sathana hi yena loyi a hlohlotelaka mavunwa hi nhlangano. I “tata wa mavunwa.” (Yoh. 8:44; Gen. 3:​1-5) Hikwalaho, hi fanele hi langutela leswaku Sathana u ta tirhisa vakaneti vakwe ku kucetela mavunwa hi nhlangano wa Yehovha. Sweswo swi endlekile enkarhini wa Yesu ni wa Vakreste vo sungula.

15. Varhangeri va vukhongeri va n’wi endle yini Yesu ni valandzeri vakwe?

15 Enkarhini lowu nga hundza, valandzeri va Sathana va vulavule mavunwa hi Yesu N’wana wa Xikwembu loyi a a nga ri na xidyoho naswona a endleke masingita yo hlamarisa. Hi xikombiso, varhangeri va vukhongeri va byele vanhu leswaku matimba lawa Yesu a a hlongola madimona ha wona, a a ma kuma eka “hosi ya madimona.” (Mar. 3:22) Loko a ri karhi a tengisiwa, varhangeri va vukhongeri va n’wi hehle hi ku va mukanganyisi ni ku tlhela va kucetela mitshungu leswaku yi kombela ku a dlayiwa. (Mat. 27:20) Hi ku famba ka nkarhi, loko valandzeri va Kreste va ri karhi va chumayela mahungu lamanene, vakaneti va vona va “hlohlotel[e] vanhu va matiko” leswaku va va xanisa. (Mit. 14:​2, 19) Leswaku xi kandziyisa leswi nga eka Mitirho 14:​2, Xihondzo xo Rindza xa December 1, 1998 xi te: “Leswi a va nga enerisekanga hi ku bakanya rungula ntsena, vakaneti va Vayuda va tlhele va sungula tsima ro va hembela mavunwa, va ringeta ku byala moya wa xihlawuhlawu eka Vamatiko leswaku va lwa ni Vakreste.”

16. Hi fanele hi tsundzuka yini loko hi twa switori leswi nga riki ntiyiso?

16 Ninamuntlha, Sathana wa ha ya emahlweni ni mavunwa yakwe. Wa ha ‘hambukisa misava hinkwayo.’ (Nhlav. 12:9) Loko u twa switori leswi nga riki swinene hi nhlangano wa Yehovha kumbe vamakwerhu lava rhangelaka, tsundzuka ndlela leyi valala va Xikwembu va n’wi khomeke hayona Yesu ni Vakreste vo sungula. Hilaha Bibele yi vuleke hakona, namuntlha vanhu va Yehovha va xanisiwa ni ku vulavuriwa ku biha. (Mat. 5:​11, 12) Switori leswi nga riki ntiyiso a swi nge hi hambukisi loko hi tiva muvangi wa swona ni ku hatla hi teka goza ro swi bakanya. Hi rihi goza ra kona?

17. Hi nga swi papalata njhani ku vavisiwa hi switori leswi nga riki ntiyiso? (2 Timotiya 1:13) (Nakambe vona bokisi leri nge, “Leswi U Nga Swi Endlaka Loko U Twa Switori Leswi Nga Riki Ntiyiso.”)

17 Bakanya switori leswi nga riki ntiyiso. Muapostola Pawulo u hi byele leswi hi faneleke hi swi endla loko hi twa switori leswi nga riki ntiyiso. U byele Timotiya a “tshinya vanhu van’wana leswaku va nga . . . yingisel[i] switori leswi nga riki ntiyiso” ni ku tlhela va swi “fularhela.” (1 Tim. 1:​3, 4; 4:7) Ehleketa hi mhaka leyi, n’wana a nga ha teka nchumu wo karhi ehansi a wu dya kambe munhu lonkulu a nge swi endli sweswo hikuva wa swi tiva leswaku swi nga n’wi vabyisa. Hilaha ku fanaka, na hina a hi swi yingisi switori leswi nga riki ntiyiso hikuva ha swi tiva leswaku swi huma eka mani. Kambe hi yingisa ntsena “marito lamanene” lama nga ntiyiso.—Hlaya 2 Timotiya 1:13.

Swifaniso: Ndlela leyi switori swa mavunwa swi hangalasiwaka hayona. 1. Wanuna a ri karhi a rhekhoda. 2. Wansati a ri karhi a hlevetela. 3. Tiimeyili leti nga riki tinene. 4. Papila ebokisini ra poso. Makwerhu waxisati a ri karhi a handzula papila.

Leswi U Nga Swi Endlaka Loko U Twa Switori Leswi Nga Riki Ntiyiso

Hi nga twa switori leswi nga riki ntiyiso hi tindlela to hambanahambana. Hi xikombiso, hi nga swi twa eka vamakwerhu lava hi byelaka mahungu yo karhi hi xikongomelo xo hi khutaza kambe va nga tinyikanga nkarhi wo swi kambisisa loko ku ri ntiyiso. Nakambe van’wana va nga hi rhumela tiimeyili leti nga ni switori swo tala. Kumbe hi nga swi twa eka vagwinehi lava hi hlanganaka na vona loko hi ri entirhweni wo chumayela, lava endlaka onge va yi tsakela Bibele.

1. Switori leswi humaka eka vamakwerhu:

Vutisa munghana wa wena loko a yi kambisisile leswaku mhaka yoleyo i ya ntiyiso. Loko a nga yi kambisisanga, u nga yi yingisi kumbe ku yi hundzisela emahlweni.—Swiv. 14:15.

2. Tiimeyili leti nga ni switori swo nyanyula hi vanhu va Yehovha:

Mikarhi yin’wana, tiimeyili leti ti nga ha vonaka onge munghana wa hina u hi rhumele tona hi imeyili yakwe. N’wi vutise, u tiyiseka loko ku ri yena a nga yi rhumela niloko a yi kambisisile loko ku ri ntiyiso. Loko a nga yi rhumelanga kumbe ku yi kambisisa loko ku ri ntiyiso, yi suli.—Swiv. 27:12.

3. Vagwinehi lava ti endlaka onge va tsakela leswi hi swi chumayelaka:

Loko u ri karhi u bula ni munhu wo karhi ivi u xiya leswaku se u sungula ku vulavula ku biha hi nhlangano kumbe a ku byela rungula leri humaka eka vagwinehi, tsema mabulo wolawo hi vutlhari.—2 Yoh. 10.

18. Hi nga swi kombisa njhani leswaku ha wu tlangela nhlangano wa Yehovha?

18 Hi lo bula ntsena hi tindlela tinharhu leti nhlangano wa Xikwembu wu tekelelaka Yesu ha tona. Loko u ri karhi u dyondza Bibele, xiya tindlela tin’wana leti engetelekeke leti nhlangano wu landzelaka xikombiso xa Yesu ha tona. Pfuna van’wana evandlheni leri u nga eka rona leswaku va tshemba nhlangano wa Yehovha. Nakambe yana emahlweni u kombisa ku tlangela ni ku tirhela Yehovha hi ku tshembeka swin’we ni nhlangano lowu a wu tirhisaka ku endla ku rhandza kakwe. (Ps. 37:28) Onge hi nga ya emahlweni hi tlangela nkateko wa ku va xiphemu xa vanhu va Yehovha lava nga ni rirhandzu ni lava tshembekaka.

U NGA HLAMULA NJHANI?

  • Hi tihi tindlela leti vanhu va Xikwembu va tekelelaka Yesu ha tona?

  • Hi nga endla yini ku kombisa leswaku hi ya emahlweni hi tlangela nhlangano wa Yehovha?

  • Hi fanele hi endla yini loko hi twa switori leswi nga riki ntiyiso?

RISIMU 103 Varisi I Tinyiko Leti Nga Vanhu

a Vona bokisi leri nge, “Ku Humelele Yini Hi 1919?” leri nga eka buku leyi nge, Eku Heteleleni Yehovha U Pfuxete Vugandzeri Lebyi Tengeke! matl. 102-103.

b NHLAMUSELO YA XIFANISO: Endzhaku ko va vakulu va burisana hi tindlela to chumayela etindhawini ta mani na mani, mulanguteri wa ntlawa u komba vahuweleri ndlela leyi va faneleke va yima hayona loko va ri etlhelo ka khumbi.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela