Xana A Wu Swi Tiva?
Hikwalahokayini vanhu lava nga riki Vaisrayele va pfumeleriwe ku va masocha ya Hosi Davhida?
EXIKARHI ka masocha ya Davhida lama nga riki Vaisrayele a ku ri na Seleke wa Muamoni, Uriya wa Muheti na Itima wa Mumowabu.a (1 Tikr. 11:39, 41, 46) Nakambe masocha ya Davhida a ma katsa “Vakereti, Vapeleti ni Vagati.” (2 Sam. 15:18) Vakereti ni Vapeleti a va ehleketeleriwa ku va maxaka ya le kusuhi ni Vafilista. (Ezek. 25:16) Vagati a va huma eka muti wa Vafilista eGati.—Yox. 13:2, 3; 1 Sam. 6:17, 18.
Hikwalahokayini Davhida a pfumelele vavanuna volavo lava nga riki Vaisrayele leswaku va va masocha yakwe? Hileswi a a tiyiseka leswaku a va tshembekile eka yena naswona xa nkoka swinene, a va tshembeke eka Yehovha. Hi xikombiso, loko Bibele yin’wana yi vulavula hi Vakereti ni Vapeleti, yi ri: “Va tshame va tshembekile eka Davhida hambiloko a langutane ni swiyimo swo tika hi nkarhi wa ku fuma kakwe.” Va swi kombise njhani? Loko “vavanuna hinkwavo va Israyele” va tshike ku landzela Hosi Davhida ivi va landzela “munhu loyi a a ri xipandzanhloko, [loyi] vito ra yena a ku ri Xeba,” Vakereti ni Vapeleti a va tshikanga ku tshama va tshembekile eka Davhida naswona va n’wi pfunile leswaku a herisa mfumo lowu a wu sungule hi Xeba. (2 Sam. 20:1, 2, 7) Siku rin’wana, Adoniya loyi a a ri n’wana wa Hosi Davhida u ringete ku wutla vuhosi ematshan’weni ya Solomoni. Ni le ka xiyimo xexo, Vakereti ni Vapeleti va tshame va tshembekile eka Davhida naswona hi vona lava vekeke Solomoni leswaku a va hosi leyi hlawuriweke hi Yehovha leswaku yi fuma endzhaku ka Davhida.—1 Tih. 1:24-27, 38, 39.
Nakambe socha rin’wana leri tshameke ri tshembekile eka Davhida, a ku ri Itayi wa le Gati. Itayi ni masocha yakwe ya 600 va seketele Hosi Davhida loko Absalomu n’wana wa Davhida a n’wi xandzukela ni ku tlhela a kucetela Vaisrayele leswaku va n’wi endla hosi ematshan’weni ya Davhida. Davhida u byele Itayi leswaku a a nga fanelanga a n’wi lwela hileswi a a nga ri Muisrayele. Kambe Itayi u te: “Ndza hlambanya emahlweni ka Yehovha Xikwembu lexi hanyaka ni le mahlweni ka wena hosi yanga, laha hosi yanga yi nga ta va kona, hambi ku ri eku feni kumbe eku hanyeni, nandza wa wena u ta va kwalaho!”—2 Sam. 15:6, 18-21.
Itayi a a tshembekile eka Davhida hosi leyi hlawuriweke hi Yehovha
Hambileswi Vakereti, Vapeleti ni Vagati a va nga ri Vaisrayele, va swi xiyile leswaku Yehovha a ku ri yena Xikwembu xa ntiyiso naswona a a hlawule Davhida. A swi kanakanisi leswaku Davhida u swi tlangerile swinene ku va ni vavanuna volavo vo tshembeka.
a Nawu wa Yehovha lowu nga eka Deteronoma 23:3-6, a wu yirisa Vaamoni ni Vamowabu leswaku va ya etindhawini ta vugandzeri ta le Israyele. Hambiswiritano, swi vonaka onge nawu lowu a wu kombetela eka vaakatiko lava a va ri ni mpfumelelo wo tshama etikweni naswona a wu nga va yirisi vanhu lava nga riki Vaisrayele leswaku va tihlanganisa ni vanhu va Xikwembu kumbe ku tshama na vona. Vona Insight on the Scriptures, Vholumo 1, tl. 95.