Hi Tiva Yini Hi Ndlela Leyi Yehovha A Nga Ta Avanyisa Vanhu eNkarhini Lowu Taka?

1. Hikwalahokayini hi nga vulaka leswaku hi hanya emikarhini yo tsakisa?

HI HANYA emikarhini yo tsakisa swinene! Siku ni siku hi vona vuprofeta bya Bibele byi hetiseka. Hi xikombiso, hi vona “hosi ya le n’walungwini” na “hosi ya le dzongeni” ti vangisana hileswi ti lavaka ku lawula misava. (Dan. 11:40) Hi vona mahungu lamanene ya Mfumo wa Xikwembu ma chumayeriwa hi ndlela leyikulu naswona vanhu va timiliyoni va hlawula ku tirhela Yehovha. (Esa. 60:22; Mat. 24:14) Nakambe hi ni ndzalo ya swakudya leswi hi tiyisaka ripfumelo leswi hi swi kumaka “hi nkarhi lowu faneleke.”—Mat. 24:​45-47.

2. I yini leswi hi nga tiyisekaka ha swona naswona i yini leswi hi faneleke hi swi tekela enhlokweni?

² Yehovha u ya emahlweni a hi pfuna hi swi twisisa kahle swiendlakalo swa nkoka leswi nga ta endleka ku nga ri khale. (Swiv. 4:18; Dan. 2:28) Hi nga tiyiseka leswaku loko nhlomulo lowukulu wu sungula, hi ta swi tiva hinkwaswo leswi hi faneleke hi swi tiva leswaku hi kota ku tiyisela hi ku tshembeka ni ku tshama hi ri ni vun’we hi nkarhi wolowo wo tika. Hambiswiritano, hi fanele hi swi tekela enhlokweni leswaku ku ni swilo leswi hi nga swi tiviki leswi nga ta endleka ku nga ri khale. Eka nhlokomhaka leyi, hi ta rhanga hi bula hileswaku hikwalahokayini hi cinca leswi hi swi vuleke mayelana ni swin’wana swa swiendlakalo sweswo. Kutani hi ta kambisisa swin’wana swa swilo leswi hi swi tivaka hi leswi nga ta endleka enkarhini lowu taka ni leswi Tata wa hina wa le tilweni a nga ta swi endla.

LESWI HI NGA SWI TIVIKI

3. Hi vule leswaku ku ta endleka yini hi vanhu lava nga riki na vuxaka na Yehovha loko nhlomulo lowukulu wu sungula naswona hikwalahokayini hi vule tano?

³ Enkarhini lowu hundzeke, hi vule leswaku loko nhlomulo lowukulu wo kala wu sungula, vanhu lava nga riki na vuxaka na Yehovha a va nge he wu kumi nkarhi wo va ni ripfumelo eka yena ivi va pona Armagedoni. Hi vule sweswo hileswi a hi ehleketa leswaku munhu ha un’we ku katsa ni xiendlakalo xin’wana ni xin’wana hi nkarhi wa Ndhambhi, a swi yimela nchumu lowu a wu ta endleka enkarhini lowu taka. Hi xikombiso, a hi ehleketa leswaku hilaha Yehovha a pfaleke nyangwa wa ngalava Ndhambhi yi nga si sungula, hi ndlela yo fanekisela loko ku sungula nhlomulo lowukulu a a ta “pfala nyangwa” emisaveni ya Sathana kutani hi ndlela yoleyo swi nga ha koteki leswaku vanhu va ponisiwa.—Mat. 24:​37-39.

4. Hikwalahokayini hi nga ha vuli leswaku swilo hinkwaswo leswi endlekeke hi nkarhi wa Nowa swi hetiseka hi ndlela leyikulu namuntlha? Hlamusela.

⁴ Xana leswi endlekeke hi nkarhi wa Ndhambhi hi fanele hi ehleketa leswaku swi ta endleka enkarhini lowu taka? Doo! Hikwalahokayini? Hikuva Bibele a yi swi seketeli.a I ntiyiso leswaku Yesu u fanise leswi “endlekeke . . . enkarhini wa Nowa” ni nkarhi lowu a a ta vuya ha wona kambe a nga vulanga leswaku swilo hinkwaswo leswi endlekeke enkarhini wa Nowa a swi ta endleka hi ndlela leyikulu enkarhini lowu taka, ku fana ni loko Yehovha a pfala nyangwa wa ngalava. Hambiswiritano, sweswo a swi vuli swona leswaku a yi kona dyondzo leyi hi yi kumaka eka mhaka ya Nowa ni Ndhambhi.

5. (a) Nowa u endle yini Ndhambhi yi nga si fika? (Vaheveru 11:7; 1 Petro 3:20) (b) Loko swi ta entirhweni wo chumayela, xiyimo xa hina namuntlha xi fana njhani ni xa le nkarhini wa Nowa?

⁵ Loko Nowa a lemukisiwile hi Ndhambhi leyi a yi ta va kona, u kombise leswaku u ni ripfumelo hi ku aka ngalava. (Hlaya Vaheveru 11:7; 1 Petro 3:20.) Hilaha ku fanaka, loko vanhu va twa mahungu lamanene ya Mfumo wa Xikwembu, va fanele va tirhisa leswi va swi dyondzaka. (Mit. 3:​17-20) Petro u vitane Nowa “muchumayeri wa leswo lulama.” (2 Pet. 2:5) Hambiswiritano, hilaha hi dyondzeke hakona eka nhlokomhaka leyi hundzeke, a hi swi tivi loko Nowa a hlele tsima ro chumayela leswaku a kota ku fikelela vanhu hinkwavo Ndhambhi yi nga si fika. Namuntlha hi chumayela emisaveni hinkwayo naswona hi tikarhatela ku hiseka loko hi ri karhi hi endla tano. Hambiswiritano, hambiloko hi ringeta hilaha hi nga kotaka hakona, a swi koteki leswaku hi chumayela vanhu hinkwavo makumu ma nga si fika. Hikwalahokayini?

6-7. Hikwalahokayini hi nga gimetaka hi ku vula leswaku a hi nge swi koti ku chumayela vanhu hinkwavo mahungu lamanene makumu ma nga si fika? Hlamusela.

⁶ Ehleketa hileswi Yesu a swi vuleke hi ntirho wa hina wo chumayela. U vule leswaku mahungu lamanene a ma ta chumayeriwa “emisaveni hinkwayo leswaku byi va vumbhoni ematikweni hinkwawo.” (Mat. 24:14) Vuprofeta byebyo byi le ku hetisekeni hi ndlela leyikulu namuntlha. Rungula ra Mfumo ri kumeka hi tindzimi to tlula 1 000 naswona hi ku tirhisa website ya jw.org, vanhu vo tala namuntlha ra va fikelela.

⁷ Hambiswiritano, Yesu u tlhele a byela vadyondzisiwa vakwe leswaku a va nga ta ‘heta ntirho wa vona emitini’ kumbe va chumayela vanhu hinkwavo a nga si fika. (Mat. 10:23; 25:​31-33) Marito ya Yesu ma ta va tano ni le nkarhini wa hina. Vanhu va timiliyoni namuntlha va tshama etindhawini leti ntirho wa hina wo chumayela wu yirisiweke. Ku engetela eka sweswo, ku tswariwa vana va madzana minete yin’wana ni yin’wana. Hi endla leswi hi nga swi kotaka leswaku hi chumayela mahungu lamanene eka vanhu va “matiko hinkwawo, tinyimba hinkwato [ni] tindzimi hinkwato.” (Nhlav. 14:6) Kambe ntiyiso wa mhaka hileswaku a hi nge swi koti ku chumayela vanhu hinkwavo mahungu lamanene makumu ma nga si fika.

8. Hi nga tivutisa yini mayelana ni ndlela leyi Yehovha a nga ta va avanyisa hayona vanhu enkarhini lowu taka? (Nakambe vona swifaniso.)

⁸ Ku nga ha va ni xivutiso lexi: Ku vuriwa yini hi lava nga wu kumangiki nkarhi wo twa mahungu lamanene nhlomulo lowukulu wu nga si sungula? Xana Yehovha ni N’wana wakwe loyi a n’wi hlawuleke ku va muavanyisi, va ta va avanyisa njhani? (Yoh. 5:​19, 22, 27; Mit. 17:31) Tsalwa ra nhlokomhaka leyi ri vula leswaku Yehovha “a nga naveli leswaku ku lova ni un’we.” Ku ri na sweswo, u lava leswaku “vanhu hinkwavo va hundzuka.” (2 Pet. 3:9; 1 Tim. 2:4) Hambileswi hi tivaka swilo leswi hi Yehovha, a nga hi byelanga ndlela leyi a nga ta va avanyisa hayona vanhu lava nga wu kumangiki nkarhi wo twa mahungu lamanene. I ntiyiso leswaku a nga boheki ku hi byela leswi se a swi endleke kumbe leswi a nga ta swi endla.

9. Yehovha u hi byele yini eBibeleni?

⁹ ERitweni rakwe, Yehovha u hi byele swilo swin’wana leswi a nga ta swi endla. Hi xikombiso, Bibele yi hi byela leswaku Yehovha u ta pfuxa vanhu “lava nga lulamangiki” lava nga wu kumangiki nkarhi wo twa mahungu lamanene ivi va hundzuka. (Mit. 24:15; Luka 23:​42, 43) Mhaka leyi yi endla ku va ni swivutiso swin’wana swa nkoka.

10. Hi swihi swivutiso swin’wana leswi hi nga tivutisaka swona?

¹⁰ Xana vanhu hinkwavo lava faka hi nkarhi wa nhlomulo lowukulu swi ta va swi herile hi vona naswona a va nge he pfuxiwi? Bibele yi swi veka erivaleni leswaku valala lava Yehovha ni mavuthu yakwe va nga ta va lovisa hi nkarhi wa Armagedoni a va nge pfuxiwi. (2 Tes. 1:​6-10) Kambe ku vuriwa yini hi vanhu lava faka hikwalaho ka mavabyi, ku dyuhala, tinghozi kumbe va dlayiwa hi vanhu van’wana? (Ekl. 9:11; Zak. 14:13) Xana van’wana va vanhu volavo va ta va xiphemu xa vanhu “lava nga lulamangiki” lava nga ta pfuxiwa emisaveni leyintshwa? A hi swi tivi.

LESWI HI SWI TIVAKA

11. Xana vanhu va ta avanyisiwa hi ku ya hi yini hi nkarhi wa Armagedoni?

¹¹ Hi tiva swilo swo hlayanyana leswi nga ta endleka enkarhini lowu taka. Hi xikombiso, ha swi tiva leswaku hi nkarhi wa Armagedoni, vanhu va ta avanyisiwa hi ku ya hi ndlela leyi va va khomeke hayona vamakwavo va Kreste. (Mat. 25:40) Lava nga ta avanyisiwa tanihi tinyimpfu va ta va va swi kombisile leswaku va seketela vahlawuriwa na Kreste. Nakambe ha swi tiva leswaku van’wana va vamakwavo va Kreste va ta va va ha ri kona laha misaveni endzhaku ka loko nhlomulo lowukulu wu sungurile naswona va ta yisiwa etilweni loko Armagedoni yi ri ekusuhi ni ku sungula. Loko ntsena vamakwavo va Kreste va ha ri laha misaveni, swi nga endleka leswaku vanhu va timbilu letinene va ta kuma nkarhi wo va seketela ni ku pfuneta eka ntirho lowu va wu endlaka. (Mat. 25:​31, 32; Nhlav. 12:17) Hikwalahokayini mhaka leyi yi ri ya nkoka?

12-13. Van’wana va nga ha endla yini endzhaku ko vona ku lovisiwa ka “Babilona Lonkulu”? (Nakambe vona swifaniso.)

¹² Endzhaku ka loko nhlomulo lowukulu wu sungurile, swi nga endleka leswaku van’wana va vanhu lava vonaka ku lovisiwa ka “Babilona Lonkulu” va ta tsundzuka leswaku Timbhoni ta Yehovha i khale ti vulavule hi xiendlakalo lexi. Xana van’wana va vanhu lava vonaka swiendlakalo sweswo va nga ha khumbeka timbilu kutani va hundzuka?—Nhlav. 17:5; Ezek. 33:33.

¹³ Loko swilo sweswo swi endleka, swi ta fana ni leswi endlekeke eEgipta hi nkarhi wa Muxe. Tsundzuka leswaku “ntlawa lowukulu wa vanhu vo hambanahambana” wu joyine Vaisrayele loko va huma eEgipta. Swi nga endleka leswaku van’wana va vanhu volavo va sungule ku va ni ripfumelo loko va vona Makhombo ya Khume lawa Muxe a va byeleke ha wona ma endleka. (Eks. 12:38) Loko ko endleka swilo leswi fanaka endzhaku ka loko Babilona Lonkulu a lovisiwile, xana swi ta hi hlundzukisa loko vanhu va hi joyina loko ku sale katsongo makumu ka fika? Nikatsongo! Hi lava ku tekelela vumunhu bya Tata wa hina wa le tilweni loyi a nga “Xikwembu xa tintswalo ni ntwelavusiwana, loyi a hlwelaka ku hlundzuka naswona a nga ni rirhandzu ni ntiyiso.”b—Eks. 34:6.

14-15. Xana ku va munhu a pfuxiwa swi titshege hileswaku u fe rini kumbe hi ndhawu leyi a tshamaka eka yona? Hlamusela. (Pisalema 33:​4, 5)

¹⁴ Mikarhi yin’wana hi twa van’wana va ku, “Swa antswa loko xaka ra mina ro fa ku nga si sungula nhlomulo lowukulu leswaku ri ta kota ku pfuxiwa.” I ntiyiso leswaku va vula sweswo hi xikongomelo lexinene. Kambe leswaku munhu yoloye a pfuxiwa a swi titsheganga hileswaku u fe rini. Yehovha i Muavanyisi la hetisekeke naswona u avanyisa hi ndlela yo lulama. (Hlaya Pisalema 33:​4, 5.) Hi nga tiyiseka leswaku “Muavanyisi wa misava hinkwayo” u ta endla leswi lulameke.—Gen. 18:25.

¹⁵ Nakambe swa twisiseka ku vula leswaku ku va munhu a hanya hilaha ku nga heriki a swi titsheganga hi laha a tshamaka kona. Yehovha a nge pfuki a avanyise timiliyoni ta vanhu tanihi “timbuti,” ntsena hikwalaho ka leswi va nga si tshamaka va twa rungula ra Mfumo. (Mat. 25:46) Muavanyisi wo lulama wa misava hinkwayo wa khathala swinene hi vanhu volavo ku tlula ndlela leyi hi nga anakanyaka hayona. A hi yi tivi ndlela leyi Yehovha a nga ta endla swilo hayona hi nkarhi wa nhlomulo lowukulu. Kumbexana van’wana va vanhu volavo va ta kuma nkarhi wo dyondza hi Yehovha, va va ni ripfumelo eka yena kutani va teka goza ro yima na yena loko a tikwetsimisa emahlweni ka matiko hinkwawo.—Ezek. 38:16.

16. I yini leswi hi swi tivaka hi Yehovha? (Nakambe vona xifaniso.)

¹⁶ Hikwalaho ko dyondza Bibele, hi tive ndlela leyi Yehovha a byi tekaka byi ri bya nkoka hayona vutomi bya vanhu. U nyikele hi vutomi bya N’wana wakwe leswaku hinkwerhu hi ta kota ku hanya hilaha ku nga heriki. (Yoh. 3:16) Hinkwerhu hi ri vonile rirhandzu ra Yehovha. (Esa. 49:15) U tiva un’wana ni un’wana wa hina hi vito. U hi tiva kahle lerova hambiloko ho fa, a nga hi pfuxa hikuva u tsundzuka nchumu wun’wana ni wun’wana hi hina ni swilo hinkwaswo leswi hi swi endleke! (Mat. 10:​29-31) Hakunene hi ni xivangelo lexinene xo tiyiseka leswaku Tata wa hina wa le tilweni la nga ni rirhandzu u ta avanyisa un’wana ni un’wana hi ndlela leyinene hikuva u tlharihile, u lulamile naswona u ni tintswalo.—Yak. 2:13.

17. Hi ta bula hi yini eka nhlokomhaka leyi landzelaka?

¹⁷ Ku antswisiwa loku ka matwisiselo ku endla leswaku ntirho wa hina wo chumayela wu ya wu va wa xihatla swinene. Hikwalahokayini hi vula tano? Nakambe i yini lexi endlaka hi ya emahlweni hi chumayela mahungu lamanene hi nga tshiki? Hi ta bula hi tinhlamulo ta swivutiso leswi eka nhlokomhaka leyi landzelaka.