Xivutiso Xo Olova Xi Nga Va Ni Vuyelo Lebyinene

Mary ni nuna wakwe John,a va tshama endhawini leyi va kotaka ku chumayela vahlapfa lava humaka ePhilippines. Hi nkarhi wa COVID-19, Mary u kote ku sungula tidyondzo ta Bibele leti endleke nhluvuko, ku nga ri laha a tshamaka kona ntsena kambe ni le matikweni man’wana. Xana u swi kote njhani?

Mary a a vutisa vanhu lava a a dyondza na vona Bibele a ku: “Xana u tiva un’wana loyi a nga tsakelaka ku dyondza Bibele?” Loko va ku ina, a a kombela leswaku va n’wi hlanganisa na vona. Hi xitalo ku vutisa swivutiso leswi swo olova swi ni vuyelo leyinene. Hikwalahokayini? Hikuva vanhu lava tekaka Rito ra Xikwembu ri ri ra nkoka, hi xitalo va byela vanghana ni maxaka ya vona leswi va swi dyondzeke. Byi ve byihi vuyelo bya ku vutisa swivutiso leswi?

Jasmin loyi a dyondzaka na Mary u n’wi hlanganise ni van’wana va mune lava a va tsakela ku dyondza Bibele. Un’wana wa vona ku nga Kristine u swi tsakerile ku dyondza Bibele lerova u kombele ku dyondza kambirhi hi vhiki. Loko Mary a vutisa Kristine loko a tiva un’wana loyi a tsakelaka ku dyondza Bibele, u hlamule a ku: “Vanghana va mina va nga swi tsakela.” Eka mavhiki ma nga ri mangani lama landzeleke, Kristine u rhambe vanghana vakwe va mune leswaku va sungula ku dyondza Bibele na Mary. Hi ku famba ka nkarhi, vanghana va Kristine na vona va rhambe van’wana leswaku va dyondza Bibele.

Kristine a a lava leswaku ni ndyangu wakwe ePhilippines na wona wu sungula ku dyondza. Kutani u vulavule ni ntombhi yakwe Andrea. Eku sunguleni Andrea a a ehleketa leswaku ‘Timbhoni ta Yehovha i vukhongeri lebyi nga tolovelekangiki, a ti pfumeli eka Yesu naswona ti tirhisa Testamente ya Khale ntsena.’ Kambe endzhaku ko dyondza kan’we, langutelo ra yena ri cincile. Loko va ri karhi va dyondza a a ta ku, “Loko ntsena swi vuriwa hi Bibele, ku fanele ku ri ntiyiso!”

Hi ku famba ka nkarhi, Andrea u rhambe vanghana vakwe vambirhi ni mutirhikulobye leswaku va sungula ku dyondza Bibele na Mary. Nakambe Mary a a nga swi tivi leswaku hahani wa Andrea, ku nga Angela loyi a nga voniki a a va yingisela loko va ri karhi va dyondza. Kutani siku rin’wana Angela u byele Andrea leswaku a n’wi hlanganisa na Mary naswona u kombele ku dyondzeriwa Bibele. Angela a a swi rhandza leswi a a swi dyondza. Ku nga si hela n’hweti, a a khome matsalwa yo tala hi nhloko naswona a a lava ku dyondza ka mune hi vhiki! Andrea u pfune Angela leswaku a kota ku va kona nkarhi ni nkarhi etinhlengeletanweni ta vandlha hi ku tirhisa vhidiyo.

Loko Mary a twa leswaku Joshua nuna wa Kristine a a yingisela a ri ekule loko va ri karhi va dyondza, u n’wi kombele leswaku a va joyina. Joshua u te, “Ndzi to yingisela kunene kambe mi nga ndzi vutisi swivutiso, loko mo ndzi vutisa ndzi ta famba.” Kambe swi nga siya kwihi, u sungule ku vutisa swivutiso swo tala ku tlula na Kristine naswona na yena se a a lava ku dyondzeriwa Bibele.

Xivutiso xa Mary xo olova xi endle leswaku a kuma tidyondzo to tala ta Bibele. Eka lava tshamaka ematikweni man’wana, u endle malunghiselelo ya leswaku vamakwerhu va le matikweni wolawo va dyondza na vona. Hi ku tirhisa xivutiso xo olova, u kote ku sungula tidyondzo ta Bibele ta 28 ematikweni ya mune.

Jasmin xichudeni xo sungula xa Mary xi khuvuriwe hi April 2021. Kristine u khuvuriwe hi May 2022 naswona u tlhelele ePhilippines leswaku a ya va ni ndyangu wakwe. Vanghana vambirhi va Kristine na vona va khuvuriwile. Angela na yena u khuvuriwile endzhaku ka tin’hweti ti nga ri tingani leti landzeleke naswona sweswi i phayona ra nkarhi hinkwawo. Joshua nuna wa Kristine ni ntombhi ya vona Andrea ku katsa ni swichudeni swin’wana na vona va le ku endleni ka nhluvuko.

Hi nkarhi wa Yesu ni vaapostola, mahungu lamanene a ma hangalaka hi ku hatlisa hileswi vanhu a va byela swirho swa ndyangu ni vanghana leswi va swi dyondzeke. (Yoh. 1:​41, 42a; Mit. 10:​24, 27, 48; 16:​25-33) Hikwalaho, u ta va u endla kahle loko u vutisa swichudeni swa wena swa Bibele ku katsa ni van’wana lava tsakelaka xivutiso lexi nge, “Xana u tiva un’wana loyi a nga tsakelaka ku dyondza Bibele?” Ku tiva mani kumbexana u nga kota ku sungula tidyondzo ta Bibele hi ku va u vutisa xivutiso xexo xo olova.