Tekelela Ndlela Leyi Yesu A A Hiseka Hayona eNtirhweni Wo Chumayela

1. Hi wihi nchumu lowu hambanisaka vanhu va Yehovha eka vanhu van’wana?

NCHUMU wun’we lowu hambanisaka malandza ya Yehovha ni Vakreste va mavunwa i ndlela leyi ma wu hisekelaka hayona ntirho wo chumayela. (Tito 2:14) Hambiswiritano, mikarhi yin’wana u nga titwa u loloha ku chumayela. Kumbexana u pfa u titwa ku fana ni nkulu un’wana la tirhaka hi matimba loyi a nga te, “Mikarhi yin’wana ndzi titwa ndzi nga swi naveli ku chumayela.”

2. I yini leswi nga endlaka leswaku mikarhi yin’wana swi hi tikela ku hisekela ntirho wo chumayela?

² Hikwalahokayini hi nga ha tsakisiwaka hi mitirho yin’wana yo kwetsima ku ri ni ku chumayela? Hileswi hi tsakaka loko hi hatla hi vona vuyelo bya mitirho leyi hi yi endlaka, yo fana ni ku lunghisa ni ku aka miako ya nhlangano, ku pfuneta eka ntirho wo phalala kumbe loko hi khutaza vamakwerhu. Nakambe swa hi tsakisa ku tirha hi ku rhula ni vamakwerhu lava hi rhandzaka naswona ha swi tiva leswaku va swi tlangela leswi hi va endlelaka swona. Kambe loko swi ta eka ntirho wo chumayela, swi nga endleka se hi ri na malembe yo tala hi ri karhi hi chumayela ensin’wini leyi vanhu va kona va nga tsakeliki. Kumbexana hi hlangana ni vanhu lava nga laviki no twa hi rungula leri hi va chumayelaka rona. Nakambe ha swi tiva leswaku leswi makumu ma yaka ma tshinela, vanhu va ta hi xanisa hikwalaho ka rungula leri hi ri chumayelaka. (Mat. 10:22) I yini leswi nga hi pfunaka leswaku hi tshama hi karhi hi hiseka entirhweni wo chumayela?

3. Hi dyondza yini eka Yesu hilaha swi hlamuseriweke hakona eka Luka 13:​6-9?

³ Hi nga dyondza swo karhi eka Yesu loko swi ta eka ku hisekela ntirho wo chumayela. A nga si tshama a tshika ku hisekela ntirho wo chumayela naswona loko nkarhi wu ri karhi wu famba, u ye emahlweni a wu hisekela swinene. (Hlaya Luka 13:​6-9.) Ku fana ni mutirhi loyi a heteke malembe manharhu a ri karhi a khathalela nkuwa lowu a wu nga tswali, Yesu u hete malembe manharhu a ri karhi a chumayela Vayuda, lava vo tala a va nga yingisi. Leswi mutirhi yoloye a nga hatliselangiki ku tsema nkuwa wolowo, hilaha ku fanaka Yesu a nga va lan’wanga Vayuda kumbe a tshika ku hisekela ntirho wo chumayela. Ku ri na sweswo, u ye emahlweni a tikarhatela ku va fikelela timbilu.

4. Hi swihi swilo swa mune leswi hi swi dyondzaka eka Yesu?

⁴ Eka nhlokomhaka leyi, hi ta bula hi ndlela leyi Yesu a swi kombiseke hayona leswaku wa hiseka, ngopfungopfu eka tin’hweti to hetelela ta tsevu ta ntirho wakwe wo chumayela. Loko hi dyondza eka swilo leswi a swi dyondziseke ni ku tekelela leswi a swi endleke, swi ta hi pfuna leswaku hi tshama hi ri karhi hi hiseka. A hi kambisiseni swilo swa mune leswi Yesu a swi endleke: (1) A a rhangisa ku endla ku rhandza ka Yehovha, (2) a a byi teka byi ri bya nkoka vuprofeta bya Bibele, (3) a a titshega hi Yehovha naswona (4) a a tshemba leswaku van’wana va ta n’wi yingisela.

U RHANGISE KU ENDLA KU RHANDZA KA YEHOVHA

5. Yesu u swi kombise njhani leswaku a a rhangisa ku endla ku rhandza ka Xikwembu?

⁵ Yesu u chumayele “mahungu lamanene ya Mfumo” hi ku hiseka hikuva a a swi tiva leswaku Xikwembu xi lava a endla tano. (Luka 4:43) Ku chumayela a swi ri swa nkoka swinene evuton’wini bya yena. Loko a ri ekusuhi ni ku heta ntirho wa yena, “[u fambe] a nghena emitini ni le swimitanini” a dyondzisa vanhu. (Luka 13:22) U tlhele a letela vadyondzisiwa vo tala leswaku va tirha na yena tanihi vachumayeri.—Luka 10:1.

6. Ntirho wo chumayela wu fambisana njhani ni mitirho yin’wana leyi hi yi endlaka enhlanganweni wa Yehovha? (Nakambe vona xifaniso.)

⁶ Ninamuntlha, ku chumayela mahungu lamanene i ntirho wa nkoka swinene lowu Yehovha na Yesu va lavaka hi wu endla. (Mat. 24:14; 28:​19, 20) Ntirho wun’wana ni wun’wana lowu hi wu endlaka enhlanganweni wa Yehovha wa fambisana ni ntirho wo chumayela. Hi xikombiso, hi aka miako ya nhlangano kumbe hi tirha eBethele leswaku hi seketela ntirho wo chumayela. Loko ku ri ni mhangu, ha tiyiseka leswaku vamakwerhu va kuma leswi va swi lavaka, leswi va pfunaka leswaku va kota ku tlhela va ya etidyondzweni ni ku chumayela. Loko hi teka ntirho wo chumayela wu ri wa nkoka ni ku tsundzuka leswaku hi wona lowu Yehovha a lavaka leswaku hi wu endla, swi ta hi pfuna leswaku hi chumayela nkarhi ni nkarhi. János, nkulu wa le Hungary u ri, “Ndzi titsundzuxa leswaku eka mitirho hinkwayo leyi hi yi endlelaka Yehovha, ntirho wo chumayela hi wona wa nkoka swinene naswona a wu kona lowu nga ta wu siva.”

7. Hikwalahokayini Yehovha a lava leswaku hi nga tshiki ku chumayela? (1 Timotiya 2:​3, 4)

⁷ Loko hi ri ni langutelo leri fanaka ni ra Yehovha hi vanhu, swi ta endla leswaku hi hisekela ntirho wo chumayela hikuva u lava leswaku vanhu vo tala va twa mahungu lamanene va tlhela va ma amukela. (Hlaya 1 Timotiya 2:​3, 4.) Leswaku sweswo swi koteka, u hi letela leswaku hi wu endla kahle ntirho lowu, lowu ponisaka vutomi. Hi xikombiso, broxara leyi nge, Rhandza Vanhu—Endla Vadyondzisiwa yi ni swiringanyeto leswi nga hi pfunaka leswaku hi sungula mabulo hi xikongomelo xo endla vadyondzisiwa. Hambiloko vanhu va nga ma yingisi mahungu lamanene sweswi, va nga ha kuma nkarhi wo ma amukela nhlomulo lowukulu wu nga si hela. Leswi hi va byelaka swona sweswi, swi nga endla leswaku va amukela mahungu lamanene enkarhini lowu taka. Kambe sweswo swi ta endleka ntsena loko hi nga tshiki ku chumayela.

A A BYI TWISISA KAHLE VUPROFETA BYA BIBELE

8. Ku tiva vuprofeta bya Bibele swi n’wi pfune njhani Yesu leswaku a tirhisa nkarhi wakwe hi vutlhari?

⁸ Yesu a a swi twisisa leswaku vuprofeta bya Bibele a byi ta hetiseka njhani. A a swi tiva leswaku a a ta endla ntirho wo chumayela malembe manharhu ni hafu. (Dan. 9:​26, 27) Nakambe a a byi tiva vuprofeta lebyi a byi vulavula hi leswaku a a ta fa njhani naswona rini. (Luka 18:​31-34) Sweswo swi endle leswaku a wu tirhisa kahle nkarhi wakwe. Hikwalaho ka sweswo, u chumayele hi ku hiseka leswaku a heta ntirho lowu a a nyikiwe wona.

9. Ku twisisa vuprofeta bya Bibele swi hi pfuna njhani leswaku hi chumayela hi ku hiseka?

⁹ Ku twisisa vuprofeta bya Bibele swi ta hi pfuna leswaku hi hisekela ntirho wo chumayela hikuva ha swi tiva leswaku nkarhi lowu saleke i wutsongo. Ha swi xiya leswaku swilo leswi endlekaka namuntlha ku katsa ni matikhomelo ya vanhu, swi fambisana kahle ni leswi Bibele yi swi vuleke hi masiku yo hetelela. Nakambe ha swi tiva leswaku nkwetlembetano lowu nga kona exikarhi ka Mfumo wa Misava wa Manghezi ni Maamerika na tiko ra Rhaxiya ni matiko lama ri seketelaka, swi hetisisa vuprofeta bya Bibele hi hosi ya le dzongeni na hosi ya le n’walungwini “enkarhini wa makumu.” (Dan. 11:40) Nakambe ha swi twisisa leswaku Mfumo wa Misava wa Manghezi ni Maamerika wu yimeriwa hi mikondzo ya xifaniso lexi hlamuseriweke eka Daniyele 2:​43-45. Hilaha vuprofeta byi kombiseke hakona, ha tiyiseka leswaku ku nga ri khale Mfumo wa Xikwembu wu ta herisa mifumo ya vanhu. Vuprofeta lebyi hinkwabyo byi kombisa nkarhi lowu hi hanyaka eka wona ni ku endla leswaku hi wu hisekela swinene ntirho wo chumayela lowu nga wa xihatla.

10. Vuprofeta bya Bibele byi nga hi pfuna njhani leswaku hi chumayela hi ku hiseka?

¹⁰ Vuprofeta bya Bibele byi ni rungula leri endlaka hi swi lava hi mbilu hinkwayo ku ri byela van’wana. Makwerhu wa xisati Carrie, wa le Dominican Republic u ri: “Switshembiso swa Yehovha hi vumundzuku lebyinene swi ndzi endla ndzi lava ku chumayela van’wana.” U tlhela a ku: “Loko ndzi vona leswi vanhu va langutanaka na swona namuntlha, ndza swi xiya leswaku na vona va fanele va swi twa switshembiso leswi.” Vuprofeta bya Bibele byi hi khutaza leswaku hi nga lolohi hikuva ha swi tiva leswaku Yehovha wa hi seketela eka ntirho lowu wo chumayela. Leila loyi a tshamaka eHungary u ri: “Esaya 11:​6-9 yi ndzi khutaza leswaku ndzi chumayela hambi ku ri vanhu lava langutekaka onge a va nge ma amukeli mahungu lamanene. Ndza swi tiva leswaku un’wana ni un’wana a nga cinca hi ku pfuniwa hi Yehovha.” Christopher, makwerhu loyi a humaka eZambia u ri: “Hilaha Marka 13:10 yi profeteke hakona, mahungu lamanene ma le ku chumayeriweni emisaveni hinkwayo naswona ndzi titwa ndzi katekile ku pfuneta ku hetisisa vuprofeta lebyi.” Hi byihi vuprofeta bya le Bibeleni lebyi ku pfunaka leswaku u nga tshiki ku chumayela?

U TITSHEGE HI YEHOVHA

11. Hikwalahokayini Yesu a a fanele a titshega hi Yehovha leswaku a ya emahlweni a chumayela hi ku hiseka? (Luka 12:​49, 53)

¹¹ Yesu a a titshega hi Yehovha leswaku a kota ku chumayela mahungu lamanene hi ku hiseka. Hambileswi Yesu a a ri ni vuxiyaxiya loko a chumayela, a a swi tiva leswaku mahungu lamanene ya Mfumo a ma ta hlundzukisa vanhu ni ku endla leswaku a kanetiwa swinene. (Hlaya Luka 12:​49, 53.) Hikwalaho ka sweswo, varhangeri va vukhongeri va ringete ko tala ku n’wi dlaya. (Yoh. 8:59; 10:​31, 39) Kambe Yesu u ye emahlweni a chumayela hikuva a a swi tiva leswaku Yehovha wa n’wi seketela. U te: “Tatana loyi a ndzi rhumeke u na mina. . . . A nga ndzi lahlanga, hikuva ndzi endla swilo leswi n’wi tsakisaka nkarhi hinkwawo.”—Yoh. 8:​16, 29.

12. Yesu u va lunghiselele njhani vadyondzisiwa vakwe leswaku va nga tshiki ku chumayela loko va xanisiwa?

¹² Yesu u tsundzuxe vadyondzisiwa vakwe leswaku va titshega hi Yehovha leswaku a va seketela. U va byele ko tala leswaku Yehovha a a ta va pfuna hambiloko va xanisiwa. (Mat. 10:​18-20; Luka 12:​11, 12) Nilokoswiritano, u va byele leswaku va va ni vuxiyaxiya. (Mat. 10:16; Luka 10:3) U va lerise leswaku va nga sindzisi vanhu ku va yingisa loko va nga swi lavi. (Luka 10:​10, 11) Nakambe u va byele leswaku va baleka loko va xanisiwa. (Mat. 10:23) Hambileswi Yesu a a hiseka ni ku tlhela a tshemba Yehovha, a nga ti hoxanga ekhombyeni swi nga fanelanga.—Yoh. 11:​53, 54.

13. Hikwalahokayini u tiyiseka leswaku Yehovha u ta ku pfuna?

¹³ Hi lava mpfuno wa Yehovha leswaku hi chumayela hi ku hiseka hambiloko hi kanetiwa kumbe hi xanisiwa. (Nhlav. 12:17) U nga tiyiseka njhani leswaku Yehovha wa ku seketela? Ehleketa hi xikhongelo xa Yesu lexi nga eka Yohane ndzima 17. Yesu u kombele Yehovha leswaku a sirhelela vaapostola naswona Yehovha u xi hlamurile xikombelo xexo. Buku ya Mitirho yi vulavula hi ndlela leyi Yehovha a pfuneke vaapostola leswaku va chumayela hi ku hiseka hambiloko va xanisiwa. Yesu u tlhele a kombela Yehovha leswaku a sirhelela lava a va ta va ni ripfumelo eka leswi vaapostola a va ta va dyondzisa swona. Vanhu volavo va katsa na wena. Yehovha wa ha ya emahlweni a hlamula xikhongelo xa Yesu naswona U ta ku pfuna hilaha A pfuneke vaapostola.—Yoh. 17:​11, 15, 20.

14. Hi swi tiva njhani leswaku hi ta swi kota ku ya emahlweni hi chumayela hi ku hiseka? (Nakambe vona xifaniso.)

¹⁴ Hambiloko swi hi tikela ku chumayela mahungu lamanene hileswi makumu ma yaka ma tshinela, Yesu u hi tiyisekisa leswaku hi ta kuma mpfuno lowu hi wu lavaka. (Luka 21:​12-15) Ku fana na Yesu ni vadyondzisiwa vakwe, a hi va sindzisi vanhu loko va nga lavi ku yingisela naswona hi papalata ku phikizana na vona. Hambiloko ntirho wa hina wu yirisiwile, vamakwerhu va ya emahlweni va chumayela mahungu lamanene hileswi va titshegaka hi Yehovha, ku nga ri hi matimba ya vona. Hilaha Yehovha a endleke hakona eka malandza yakwe ya le mikarhini ya Bibele, namuntlha u hi nyika matimba leswaku hi “chumayela mahungu lamanene hi ku helela,” hilaha a lavaka hakona. (2 Tim. 4:17) U nga tiyiseka leswaku loko u titshega hi Yehovha, u ta swi kota ku ya emahlweni u chumayela hi ku hiseka.

U TSHAME A RI NI LANGUTELO LERINENE

15. I yini leswi kombisaka leswaku Yesu a a ri ni langutelo lerinene hi ntirho wo chumayela?

¹⁵ Yesu u tshame a ri ni langutelo lerinene entirhweni wo chumayela naswona sweswo swi n’wi pfune leswaku a tshama a ri karhi a wu hisekela. Hi xikombiso, eku heleni ka 30 C.E., Yesu u swi vonile leswaku vanhu vo tala a va swi lunghekerile ku chumayeriwa naswona u va fanise ni nsimu leyi lunghekeleke ku tshoveriwa. (Yoh. 4:35) Endzhaku ka lembe, u byele vadyondzisiwa vakwe a ku: “Ntshovelo i wukulu.” (Mat. 9:​37, 38) Nakambe u tlhele a ku: “Ntshovelo i wukulu . . . kombelani N’wini wa ntshovelo a rhumela vatirhi entshovelweni wakwe.” (Luka 10:2) Yesu a nga tshikanga ku tshemba leswaku vanhu a va ta amukela mahungu lamanene naswona a a tsaka loko va endla tano.—Luka 10:21.

16. Swifaniso swa Yesu swi pfune vanhu leswaku va va ni langutelo lerinene hi ntirho wo chumayela hi ndlela yihi? (Luka 13:​18-21) (Nakambe vona xifaniso.)

¹⁶ Yesu u dyondzise vadyondzisiwa vakwe leswaku va tshama va ri ni langutelo lerinene hi mahungu lamanene, leswi a swi ta va pfuna leswaku va tshama va ri karhi va hiseka. Hi xikombiso, xiya swifaniso swakwe swimbirhi. (Hlaya Luka 13:​18-21.) Yesu u tirhise ndzoho ya sinapi ku dyondzisa leswaku rungula ra Mfumo a ri ta hangalaka hi ndlela leyikulu swinene naswona a nga kona munhu loyi a a ta ri sivela. U tlhele a tirhisa xifaniso xa comela ku kombisa ndlela leyi rungula ra Mfumo a ri ta andza hayona ni ku endla leswaku vanhu va cinca hambiloko van’wana va nga hatli va ku vona ku cinca koloko. Hi ku endla sweswo, Yesu u pfune vadyondzisiwa vakwe va vona leswaku rungula leri a va ri chumayela a ri ta va ni vuyelo lebyinene.

17. Hi swihi swivangelo leswi hi nga na swona leswi endlaka hi tshama hi ri ni langutelo lerinene hi ntirho wo chumayela?

¹⁷ Loko hi vona ndlela leyi ntirho wo chumayela wu pfunaka vanhu vo tala hayona emisaveni hinkwayo, swi endla leswaku hi chumayela hi ku hiseka. Lembe ni lembe vanhu va timiliyoni va va kona eXitsundzuxweni ni ku tlhela va dyondza na hina Bibele. Kasi vanhu va magidi va khuvuriwa ni ku tlhela va chumayela na hina. Hambileswi hi nga swi tiviki leswaku i vanhu vangani lava nga ta amukela mahungu lamanene kambe ha swi tiva leswaku Yehovha u le ku hlengeleteni ka ntshungu lowukulu, lowu nga ta pona nhlomulo lowukulu lowu taka. (Nhlav. 7:​9, 14) N’wini wa ntshovelo wa swi vona leswaku ka ha ri ni lava nga ta amukela mahungu lamanene kutani a hi tshiki ku chumayela.

18. I yini leswi hi lavaka vanhu va swi xiya eka hina?

¹⁸ Vadyondzisiwa va Yesu a va tiveka tanihi vachumayeri lava hisekaka. Loko vanhu va vona xivindzi lexi vaapostola a va ri na xona, “va sungul[e] ku tsundzuka leswaku a va tshama va ri na Yesu.” (Mit. 4:13) Loko vanhu va hi vona hi ri karhi hi va chumayela, onge va nga swi xiya leswaku na hina hi hiseka ku fana na Yesu.