Yana eMahlweni U Famba Hi Ripfumelo

1. Hikwalahokayini Pawulo swi n’wi tsakisile loko a ehleketa hi ndlela leyi a hanyeke hayona?

MUAPOSTOLA PAWULO a a swi tiva leswaku a a ta dlayiwa ku nga ri khale kambe a a nga tisoli hikwalaho ka ndlela leyi a hanyeke hayona. Loko a ehleketa hi vutomi byakwe u vule a ku: “Ndzi tsutsume mphikizano kukondza ndzi heta, ndzi hlayise ripfumelo.” (2 Tim. 4:​6-8) Pawulo u endle swiboho leswinene loko a ri karhi a tirhela Yehovha naswona a a tiyiseka leswaku Yehovha wa tinyungubyisa hi yena. Na hina hi lava ku endla swiboho leswinene leswi nga ta tsakisa Yehovha. Kambe xana hi nga swi endlisa ku yini sweswo?

2. Swi vula yini ku famba hi ripfumelo?

² Xana Pawulo a a vula yini loko a vula leswi hi yena ni hi Vakreste van’wana vo tshembeka: “Hi famba hi ripfumelo ku nga ri hi ku vona”? (2 Kor. 5:7) EBibeleni rito “ripfumelo” mikarhi yin’wana ri nga vula ndlela leyi munhu a hlawulaka ku hanya hayona. Loko munhu a famba hi ku vona u endla swiboho ntsena hikwalaho ka swilo leswi a swi vonaka, a swi twaka ni hi kwalaho ka ndlela leyi a titwaka hayona. Kambe loko munhu a famba hi ripfumelo, u endla swiboho leswi kombisaka leswaku u tshemba Yehovha. Nakambe swiendlo swa yena swi kombisa leswaku wa tiyiseka ku Xikwembu xi ta n’wi katekisa nileswaku u ta vuyeriwa loko a yingisa xitsundzuxo xa xona lexi kumekaka eRitweni ra xona.—Ps. 119:66; Hev. 11:6.

3. Hi vuyeriwa hi yini loko hi famba hi ripfumelo? (2 Vakorinto 4:18)

³ I ntiyiso leswaku hinkwerhu hi endla swiboho hikwalaho ka swilo leswi hi swi vonaka ni ku swi twa. Kambe loko hi endla tano ni le ka swiboho swa nkoka evuton’wini, hi ta va ni swiphiqo hikuva hi endla swiboho hikwalaho ka leswi hi swi vonaka ni ku swi twa ntsena. Hikwalahokayini? Hikuva leswi hi swi vonaka ni ku swi twa swi nga hi kanganyisa mikarhi yin’wana. Niloko sweswo swo ka swi nga endleki, loko hi famba hi ku vona ntsena hi nga ha tshika ku endla ku rhandza ka Xikwembu hambi ku ri ku yingisa ndzayo ya xona. (Ekl. 11:9; Mat. 24:​37-39) Hambiswiritano, loko hi famba hi ripfumelo hi ta endla swiboho “leswi tsakisaka Hosi.” (Efe. 5:10) Hi ta va ni ku rhula ka ntiyiso ni ku tlhela hi tsaka loko hi yingisa xitsundzuxo xa Xikwembu. (Ps. 16:​8, 9; Esa. 48:​17, 18) Nakambe loko hi ya emahlweni hi famba hi ripfumelo, hi ta hanya hilaha ku nga heriki.—Hlaya 2 Vakorinto 4:18.

4. I yini leswi nga pfunaka munhu ku vona loko a famba hi ripfumelo kumbe hi ku vona?

⁴ Hi nga swi vona njhani loko hi famba hi ripfumelo kumbe hi ku vona? Leswi nga hi pfunaka i ku tiva leswi hi kongomisaka loko hi endla swiboho. Xana hi kongomisiwa ntsena hi leswi hi swi vonaka kumbe hi xitsundzuxo xa Yehovha? A hi kambisiseni swiyimo swinharhu swa nkoka leswi hi nga kombisaka ha swona leswaku hi ya emahlweni hi famba hi ripfumelo ku nga loko hi hlawula ntirho, munghana wa vukati ni loko hi kuma nkongomiso lowu humaka eka nhlangano. Eka xiyimo ha xin’we, hi ta bula hi leswi hi faneleke hi swi tekela enhlokweni leswaku hi kota ku endla swiboho leswinene.

LOKO U HLAWULA NTIRHO

5. Hi fanele hi ehleketisisa hi yini loko hi hlawula ntirho?

⁵ Hinkwerhu hi lava ku tikhathalela ku katsa ni mindyangu ya hina. (Ekl. 7:12; 1 Tim. 5:8) Mitirho yin’wana yi holela swi nyawula lerova mutirhi u kota ku tikhathalela ni ku tlhela a veka mali yo karhi etlhelo. Kasi yin’wana a yi holeli, mutirhi wo kota ku fikelela swilaveko swa ndyangu wa yena ntsena. Loko hi hlawula ntirho wo karhi, i ntiyiso leswaku hi lava ku tiva ku hi ta hola mali muni. Kambe loko munhu a languta sweswo ntsena, u kombisa leswaku u famba hi ku vona.

6. Hi nga swi kombisa njhani leswaku hi famba hi ripfumelo loko hi hlawula ntirho? (Vaheveru 13:5)

⁶ Loko hi famba hi ripfumelo, hi ta anakanyisisa hi ndlela leyi ntirho lowu hi wu hlawulaka wu nga ta khumba vuxaka bya hina na Yehovha hayona. Hi nga ha tivutisa leswi: ‘Xana ntirho lowu wu ta endla leswaku ndzi endla swilo leswi Yehovha a swi vengaka?’ (Swiv. 6:​16-19) ‘Xana wu ta kavanyeta ndlela leyi ndzi gandzelaka hayona hambi ku ri ku endla leswaku ndzi nga ha kumi nkarhi wo va ni ndyangu wa mina?’ (Filp. 1:10) Loko ku ve nhlamulo ya swivutiso leswi i ina, ku ta va ku ri vutlhari ku ala ntirho wo tano. Leswi hi fambaka hi ripfumelo, hi endla swiboho leswi kombisaka leswaku ha tshemba ku Yehovha u ta khathalela swilaveko swa hina.—Mat. 6:33; hlaya Vaheveru 13:5.

7-8. Makwerhu un’wana wa le Amerika Dzonga u swi kombise njhani leswaku u famba hi ripfumelo? (Nakambe vona xifaniso.)

⁷ Xiya ndlela leyi makwerhu Javier,a wa le Amerika Dzonga a xiyeke nkoka wo famba hi ripfumelo hayona. U ri: “Ndzi lave ntirho lowu a wu ta ndzi holela swi nyawula ni ku tlhela wu endla ndzi tsaka.” Hambiswiritano, Javier a a lava ku phayona hi mbilu hinkwayo. Kutani u ya emahlweni a ku: “Mininjhere u ndzi vitanile leswaku ndzi ta eka inthavhiyu. Leswi a ndzi tiyiseka leswaku Yehovha u tiva leswi ndzi faneleke, ndzi khongerile ndzi nga si ya vonana na mininjhere. A ndzi wu lava ntirho lowu kambe a ndzi nga ta wu amukela loko a wu ta ndzi sivela ku fikelela leswi ndzi swi lavaka entirhweni wa Yehovha.”

⁸ Javier u ri: “Hi nkarhi wa inthavhiyu, mininjhere u ndzi byele leswaku nkarhi ni nkarhi ndzi ta boheka ku tirha tiawara to tala. Ndzi n’wi byele leswaku a ndzi nge swi koti ku tirha tiawara toleto hikwalaho ka mitirho ya vugandzeri.” Javier u wu arile ntirho wolowo naswona endzhaku ka mavhiki mambirhi u sungule ku phayona. Nakambe endzhaku ka tin’hweti ti nga ri ti nga ni u kume xikoropo. U ri: “Yehovha u hlamule swikhongelo swa mina naswona u ndzi nyike ntirho lowu a wu ndzi pfumelela ku phayona. Ndzi tsakile hileswi ndzi kumeke ntirho lowu ndzi pfumelelaka ku tirhela Yehovha ni vamakwerhu.”

9. U dyondza yini eka Trésor?

⁹ Ku vuriwa yini loko ntirho lowu hi nga na wona sweswi wu nga hi pfumeleli ku famba hi ripfumelo? Xiya ntokoto wa makwerhu Trésor wa le Congo. U ri: “A ndzi kume ntirho lowu swi tikaka ku wu kuma. Mali a ndzo yi nusa kunene naswona a ndzi xiximiwa.” Hambiswiritano, xiphiqo a ku ri leswaku Trésor a a nga vonaki etidyondzweni naswona a a tshamela ku tirha yi nga chayi. Nakambe vatirhikulobye a va n’wi sindzisa leswaku a hemba. Trésor a a nga ha wu lavi ntirho wolowo kambe a a tivutisa loko a ta kuma wun’wana. U pfuniwe hi yini? U ri: “Habakuku 3:​17-19 yi ndzi pfune ndzi twisisa leswaku hambi loko ndzo heleriwa hi ntirho, Yehovha a a ta ndzi khathalela. Hikwalaho ndzi wu tshikile ntirho wolowo.” U gimeta hi ku vula leswi: “Vathori vo tala va ehleketa leswaku loko munhu a kume ntirho lowu holelaka kahle, u fanele a tshika hinkwaswo ku katsa ndyangu wakwe ni vuxaka bya yena Yehovha. Ndzi tsakile hileswi ndzi nga lahlekeriwangiki hi vuxaka bya mina na Yehovha ni ndyangu wa mina. Endzhaku ka lembe, u ndzi pfunile leswaku ndzi kuma ntirho lowu a ndzi kota ku fikelela swilaveko swa ndyangu wa mina ni ku tlhela ndzi kuma nkarhi wo gandzela. Loko hi rhangisa Yehovha, hi nga ha koka exilogweni ku ringana nkarhi wo karhi kambe hi nga tiyiseka leswaku Yehovha u ta hi khathalela.” Loko hi tshemba switsundzuxo swa Yehovha ni switshembiso swa yena, hi ta ya emahlweni hi famba hi ripfumelo naswona u ta hi katekisa.

LOKO U HLAWULA MUNHU LOYI U NGA TA TEKANA NA YENA

10. I yini leswi nga endlaka hi famba hi ku vona loko hi hlawula loyi hi lavaka ku tekana na yena?

¹⁰ Vukati i nyiko leyi humaka eka Yehovha naswona i swa ntumbuluko ku va munhu a lava ku byi nghenela. Loko makwerhu waxisati a ri karhi a ehleketa hi makwerhu loyi a lavaka ku tekana na yena, a nga ha languta vumunhu bya yena, ndlela leyi a langutekaka hayona, ndhuma yakwe, xikhwama xakwe, vutihlamuleri lebyi a nga na byona bya ndyangu ni ndlela leyi a n’wi endlaka a titwa hayona.b Swilo leswi hinkwaswo i swa nkoka. Hambiswiritano, loko a languta swona ntsena u ta va a famba hi ku vona.

11. Hi nga swi kombisa njhani leswaku hi famba hi ripfumelo loko hi hlawula munghana wa vukati? (1 Vakorinto 7:39)

¹¹ Yehovha wa tinyungubyisa hi vamakwerhu lava yingisaka xitsundzuxo xakwe loko va hlawula munghana wa vukati. Hi xikombiso, va xi tekela enhlokweni xilemukiso xa leswaku va fanele va rindza kukondza va ‘kula ku ringana’ va nga si nghenela vukati. (1 Kor. 7:36) Loko va ri karhi va lava munhu loyi va nga tekanaka na yena, va languta ngopfu swilo leswi Yehovha a vulaka leswaku munhu u fanele a va na swona leswaku a va nuna kumbe nsati lonene. (Swiv. 31:​10-13, 26-28; Efe. 5:33; 1 Tim. 5:8) Loko va laviwa hi munhu loyi a nga riki Mbhoni, va yingisa xitsundzuxo xa leswaku va teka kumbe ku tekiwa “eHosini ntsena” lexi kumekaka eka 1 Vakorinto 7:39. (Yi hlaye.) Va ya emahlweni va famba hi ripfumelo naswona va tiyiseka leswaku Yehovha u ta va seketela ku tlula ndlela leyi munhu un’wana a a ta endla hakona.—Ps. 55:22.

12. U dyondza yini eka Rosa?

¹² Twana leswi endlekeleke Rosa loyi a nga phayona eColombia. Hikwalaho ka ntirho wakwe, a a tshamela ku hlangana ni wanuna loyi a nga riki Mbhoni loyi a a n’wi lava. Rosa na yena a a ti fela hi yena. U ri: “A a vonaka a ri munhu lonene, a a tikhome kahle, a a rhandza ku pfuna vanhu naswona a yi ndzi tsakisa ndlela leyi a a ndzi khome hayona. A a ri ni swilo leswi a ndzi swi lava eka munhu loyi a ndzi lava ku tekiwa hi yena kambe a a nga ri Mbhoni.” U ya emahlweni a ku: “A swi ndzi tikela ku n’wi ala hikuva a a ndzi yive mbilu. Hi nkarhi wolowo, a ndzi lava ku cata kambe a ndzi nga n’wi kumi makwerhu loyi a fanelekaka kutani sweswo swi endle leswaku ndzi titwa ndzi ri ni xivundza.” Rosa u anakanyisise hi ndlela leyi xiboho xakwe a xi ta khumba vuxaka bya yena na Yehovha hayona naswona sweswo swi n’wi pfune leswaku a nga anakanyisisi ntsena hi leswi a a swi vona. Hikwalaho, u tshike ku tihlanganisa ni wanuna yoloye ivi a sungula ku khomeka hi ku tirhela Xikwembu. Endzhaku ka sweswo u rhambiwe eXikolweni xa Vachumayeri va Mfumo naswona sweswi i phayona ro hlawuleka. Rosa u ri: “Yehovha u ndzi katekisile swinene naswona ndzi tsakile.” Hambileswi swi nga oloviki ku famba hi ripfumelo eka timhaka to fana ni leti, mikarhi hinkwayo swi ni vuyelo lebyinene.

LOKO NHLANGANO WU HI NYIKA NKONGOMISO

13. I yini leswi nga endlaka hi lava ku famba hi ku vona loko hi kuma nkongomiso?

¹³ Nkarhi ni nkarhi hi kuma nkongomiso eka vakulu, valanguteri va miganga, rhavi kumbe eka Huvo leyi Fumaka lowu hlamuselaka ndlela leyi hi faneleke hi gandzela hayona. Kambe ku vuriwa yini loko nkarhi wun’wana hi nga wu twisisi nkongomiso lowu hi wu kumaka? Hi nga sungula ku solasola nkongomiso wolowo hikwalaho ka ndlela leyi hi titwaka hayona. Xo biha no tlurisa, hi nga sungula ku xopaxopa lava hi nyikeke nkongomiso.

14. I yini leswi nga ta hi pfuna hi famba hi ripfumelo loko hi kuma nkongomiso lowu humaka eka nhlangano wa Yehovha? (Vaheveru 13:17)

¹⁴ Loko hi famba hi ripfumelo, hi kombisa leswaku ha tshemba ku Yehovha hi yena a hi kongomisaka nileswaku wa swi tiva swiyimo swa hina. Hikwalaho ka sweswo, hi ku swi rhandza hi hatla hi yingisa. (Hlaya Vaheveru 13:17.) Ha swi xiya leswaku ku yingisa ka hina swi endla leswaku ku va ni vun’we evandlheni. (Efe. 4:​2, 3) Hambileswi vamakwerhu lava rhangelaka va nga riki tintsumi, a hi kanakani leswaku loko hi yingisa Yehovha u ta hi katekisa. (1 Sam. 15:22) Ha tshemba leswaku loko ku ri ni leswi lavaka ku lulamisiwa, Yehovha u ta swi lulamisa hi nkarhi wakwe.—Mik. 7:7.

15-16. I yini leswi pfuneke makwerhu un’wana leswaku a famba hi ripfumelo hambileswi a a kanakana nkongomiso lowu a wu kumeke? (Nakambe vona xifaniso.)

¹⁵ Xiya ntokoto lowu kombisaka vuyelo lebyi kumiwaka hi lava fambaka hi ripfumelo. Hambileswi Xipaniya xi vulavuriwaka etindhawini to tala ePeru, vaakatiko vo tala va vulavula tindzimi ta vona ta xintu. Xiquechua i rin’wana ra tindzimi toleto. Ku ringana malembe yo tala, vamakwerhu lava vulavulaka Xiquechua a va lavana ni vanhu lava vulavulaka Xiquechua leswaku va ta va chumayela. Hambiswiritano, leswaku va kota ku yingisa milawu ya mfumo va cince tindlela leti va ti tirhisaka to lava vanhu lava vulavulaka ririmi rero. (Rhom. 13:1) Hikwalaho ka sweswo, vamakwerhu van’wana va tivutisile loko va ha ta swi kota ku va chumayela. Hikwalaho ka leswi vamakwerhu va yingiseke nkongomiso wolowo, Yehovha u katekise matshalatshala ya vona yo lava vanhu vo tala lava vulavulaka Xiquechua.

¹⁶ Kevin, loyi a nga nkulu evandlheni ra Xiquechua, i un’wana wa lava a va vilerisiwa hi ku cinca loku. U ri: “Ndzi tivutise leswi, ‘Se hi ta va kuma njhani vanhu lava vulavulaka Xiquechua?’” Xana u endle yini? U ri: “Ndzi tsundzuke Swivuriso 3:5 nileswi endlekeleke Muxe. A a fanele a humesa Vaisrayele eEgipta a va yisa endhawini leyi swi vonakaka onge va pfalelekile naswona Vaegipta a va ta va hlasela hi ku olova. Hambiswiritano u yingisile naswona Yehovha u n’wi katekisile hikwalaho ka sweswo.” (Eks. 14:​1, 2, 9-11, 21, 22) Xana ku endleke yini loko Kevin a tiyimisela ku cinca ndlela leyi a a chumayela hayona? U ri: “Yi ndzi hlamarisile ndlela leyi Yehovha a hi katekiseke hayona. Khale a hi famba mpfhuka naswona mikarhi yin’wana a ho kuma munhu un’we kumbe vambirhi lava vulavulaka Xiquechua. Kambe sweswi hi tirha ensin’wini leyi nga lo mphaa, hi vanhu lava vulavulaka Xiquechua naswona hikwalaho ka sweswo hi kota ku sungula mabulo ni vanhu vo tala, hi endla maendzo yo vuyela ni ku tlhela hi fambisa tidyondzo ta Bibele. Hambi ku ri nhlayo ya vanhu lava taka etidyondzweni yi tlakukile.” Mikarhi hinkwayo Yehovha wa hi katekisa loko hi famba hi ripfumelo.

17. U dyondze yini eka nhlokomhaka leyi?

¹⁷ Hi bule hi swiyimo swinharhu swa nkoka laha hi nga yaka emahlweni hi famba hi ripfumelo. Kambe hi fanele hi ya emahlweni hi famba hi ripfumelo eka swilo hinkwaswo leswi hi swi endlaka evuton’wini ku nga ha va loko hi hlawula vuhungasi, dyondzo kumbe ndlela leyi hi nga ta va kurisa hayona vana. Eka swiboho hinkwaswo leswi hi faneleke hi swi endla, a hi fanelanga hi kongomisiwa ntsena hileswi hi swi vonaka kambe hi fanele hi ehleketa hi vuxaka bya hina na Yehovha, switsundzuxo swakwe ni xitshembiso xakwe xa leswaku u ta hi khathalela. Loko hi endla sweswo, hi ta “famba evitweni ra Yehovha Xikwembu xa hina hilaha ku nga heriki.”—Mik. 4:5.